Ngaahi Fehuʻi Angamaheni kau ki he Tohi ʻa Molomoná

Ko e Tohi ʻa Molomoná ko ha tohi folofola ia ʻoku tatau pē mo e Tohi Tapú. Ko ha fakamoʻoni ia ʻe taha ʻo Sīsū Kalaisi.¹ ʻOku fakatefito e fakamatala ʻa e Tohi Tapú ʻi he moʻui mo e ngaahi akonaki ki ʻIsileli he kuonga muʻá. ʻOku ʻi he Tohi ʻa Molomoná ha ngaahi tohi ʻa ha falukunga kakai naʻe haʻu ki he Ongo ʻAmeliká, kau ai ha fāmili naʻe mavahe mei Selusalema ʻi he 600 K.M. Ko e kakaí ni ko ha hako foki ia ʻo e fale ʻo ʻIsilelí. Ko ia ai ko e Tohi Tapú mo e Tohi ʻa Molomoná naʻe tohi ia ʻe ha kakai tukufakaholo tatau ka ʻi ha ngaahi tapa kehekehe ʻo e māmaní.

Ko e Tohi ʻa Molomoná, hangē pē ko e Tohi Tapú, ʻoku mahulu hake ia he fakamatala fakahisitōliá pē. ʻOku ʻi ai “hono kakato ʻo e ongoongolelei ʻo Sīsū Kalaisí” (T&F 20:9): ʻa e ngaahi akonakí, tokāteliné, mo e ngaahi kikité ʻoku fakamoʻoni ki he ʻOtua ko e Tamaí pea mo Hono ʻAlo ko Sīsū Kalaisí.

Naʻe fakamatalaʻi ʻe he Palōfita ko Siosefa Sāmitá ko e Tohi ʻa Molomoná naʻá ne “tala mai kiate kitautolu naʻe hā ʻa hotau Fakamoʻuí ʻi he konitinēniti ko ʻení [ʻa e Ongo ʻAmeliká] hili ʻa ʻEne toetuʻú; pea naʻá Ne fokotuʻu ʻa e Ongoongoleleí ʻi heni ʻi hono tuʻunga kakató mo hono ngaahi leleí, mālohí, mo e tāpuakí; pea naʻe ʻi ai hanau kau ʻAposetolo, kau Palōfita, kau Faifekau, kau Akonaki, mo e kau ʻEvangeliō, ʻi he founga tatau, mo e lakanga fakataulaʻeiki tatau, ngaahi ouau tatau, ngaahi meʻafoaki, ngaahi mālohi, mo e ngaahi tāpuaki, ʻo hangē ko ia naʻe maʻu ʻi he konitinēniti ʻo e hahaké; … pea naʻe fekau ki honau palōfita fakamuimuitaha naʻe kei moʻuí ke ne hiki ha fakanounou ʻo e ngaahi kikité, hisitōliá mo e ngaahi alā meʻa peheé, pea fūfuuʻi ia ʻi he kelekelé, pea ʻoku totonu ke hoko mai ia ʻo fakatahaʻi mo e Tohi Tapú ke fakahoko ʻaki ʻa e ngaahi taumuʻa ʻa e ʻOtuá ʻi he ngaahi ʻaho fakaʻosí.”²

ʻOku fakatou ako ʻe he kāingalotu ʻo e Siasí ʻa e Tohi Tapú pea mo e Tohi ʻa Molomoná. Ko hono moʻoní, ko e taʻu ʻe ua mei he taʻu ʻe fā kotoa pē ʻoku tukutaha ai e lēsoni ʻo e Lautohi Faka-Sāpaté ki hono ako e Tohi Tapú. (Ki ha fakamatala lahi ange ki he kaveingá ni, vakai, peesi 16, 24, mo e 52 ʻi he makasini ko ʻení.)

Naʻe hiki ia ʻe ha kau palōfita ʻo e kuonga muʻá, hangē ko Nīfai, Sēkope, mo e foha ʻo Molomona ko Molonaí. Naʻe fakatahatahaʻi mo fakanounouʻi ʻe Molomona ʻa e ʻū lekooti naʻe tauhi ʻe he kau palōfitá ki honau hisitōliá, ngaahi kikité, mo e ngaahi akonakí. Naʻá ne toe fakakau atu ki ai mo ʻene ngaahi aʻusiá. Naʻe tongi ʻe Molomona ʻa e lekōtí ni ʻi ha ʻū lauʻi ukamea naʻe fakatahatahaʻi—naʻe lanu koula—ʻa ia naʻe faʻa ui ko e ʻū lauʻi peleti koulá.

Hili e mālōlō ʻa Molomoná, naʻe fakaʻosi leva ʻe Molonai ʻa e lekōtí pea tanu ia ʻi ha moʻunga ke fakatolonga ia maʻa hotau kuongá. Naʻe hā mai ʻa e ʻāngelo ko Molonaí kia Siosefa Sāmita he 1823 ʻo fakahā kiate ia ʻa e feituʻu ʻoku tanu ai e lekōtí. Hili ha taʻu ʻe fā naʻe fakangofua leva ʻa Siosefa ke ne maʻu e ʻū lekōtí. Naʻá ne “liliu e lekōtí ʻi he meʻafoaki mo e mālohi ʻo e ʻOtuá” ki he lea faka-Pilitāniá mei he lea fakakuongamuʻa naʻe hiki aí.³ Naʻá ne pulusi pea tufaki atu leva e Tohi ʻa Molomoná. (Ki ha fakamatala lahi ange ki he kaveingá ni, vakai ki he peesi 22 mo e 72 ʻi he makasini ko ʻení.)

Naʻe maʻu ʻe Siosefa Sāmita ʻa e ʻū lauʻi peletí ʻi Sepitema 1827 peá ne tauhi ia ʻo aʻu ki he faʻahitaʻu māfana ʻo e 1829. Naʻá ne fakamatalaʻi ʻi heʻene hiki hono hisitōliá he 1838, ʻa e meʻa naʻe hoko ki he ʻū lauʻi peletí: “ ʻI he taimi naʻe haʻu ai ʻa e talafekaú [Molonai] ke maʻu iá, ʻo fakatatau mo e aleá, naʻá ku tuku ia ki hono nimá; pea ʻokú ne tauhi ia ʻo aʻu mai ki he ʻahó ni, ʻa ia ko e ʻaho hono ua ʻo Mē, ʻo e taʻu taha afe valungeau tolungofulu mā valú” (Siosefa Sāmita—Hisitōlia 1:60).

Naʻe ʻi ai ha kau tangata mo ha kau fefine kehe naʻe mamata ki he ʻū lauʻi peletí pea nau fakamoʻoni ki hono moʻoní, makehe ia meia Siosefa Sāmita. Naʻe lekooti ʻe ha kau tangata ʻe toko hongofulu mā taha, naʻe ʻiloa ko e kau Fakamoʻoni ʻe Toko Tolú mo e kau Fakamoʻoni ʻe Toko Valú, ʻenau fakamoʻoní ki heʻenau mamata ki he ʻū lauʻi peletí, pea ko e kau Fakamoʻoni ʻe Toko Valú ʻi heʻenau ala ki he ʻū lauʻi peletí. ʻOku fakakau ʻenau ngaahi fakamoʻoní ʻi muʻa ʻi he tatau kotoa pē ʻo e Tohi ʻa Molomoná.

Naʻe fakapapauʻi mai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe tuʻu ʻa e kau tangatá ni ko ha kau fakamoʻoni mālohi ʻo e Tohi ʻa Molomoná, mahalo pē he koeʻuhí naʻe ʻi ai hanau niʻihi naʻe “fakafetau ʻi ha taimi kia Siosefa.” Ka neongo iá, naʻa nau “fakamoʻoni ʻo aʻu ki heʻenau maté ne nau mamata ki ha ʻāngelo pea mo nau ala ki he ʻū lauʻi peletí. Naʻa nau talaki, ‘Kuo fakahā ia kiate kimautolu ʻi he māfimafi ʻo e ʻOtuá kae ʻikai ʻo e tangatá. Ko ia ʻoku mau ʻilo pau ai ʻoku moʻoni ʻa e ngaahi meʻá ni.’”⁴

Neongo ʻoku ʻikai fakatefito ʻetau tuí he fakamoʻoni fakatuʻasinó, ka ʻoku ʻi ai e fakamoʻoni ʻo e Tohi ʻa Molomoná ʻi he fakatotolo leá, fakahisitōliá, mo e fakatotolo kuo fai ki he kuohilí. Hangē ko ʻení, naʻe manukiʻi e fakakaukau ko ia ne lava ke fai ha tohi ʻi he ʻū lauʻi peleti ukameá, ka ʻi he ngaahi taʻu mai kimui ní kuo lahi hano ʻilo—ha ngaahi sīpinga lahi ʻo ha ngaahi tohi toputapu naʻe fai ʻi ha ʻū lauʻi peleti ukamea—pea naʻe fufuuʻi hanau niʻihi ʻi ha ngaahi puha maka.

ʻOku fakatokangaʻi ʻe he kau fakatotolo leá ʻa e ongo hala ʻo ha ngaahi lea mo ha ngaahi kupuʻi lea ʻo e Tohi ʻa Molomoná ʻi he lea faka-Pilitāniá ka ʻoku ongo tonu ʻaupito pē ia he lea faka-Hepeluú mo e ngaahi lea fakafonua naʻe vāofi mo iá, ʻa ia naʻe ʻilo ʻe he kakai ʻo e Tohi ʻa Molomoná—ko ha ngaahi lea fakafonua ia naʻe ʻikai ke ʻilo ʻe he talavou ko Siosefa Sāmitá.

Ka ʻoku ʻikai ko e faʻahinga fakamoʻoni ʻení ia ʻokú ne fakalotoʻi kitautolu ki hono moʻoni ʻo e Tohi ʻa Molomoná. Ko ha meʻa ia ʻoku fekauʻaki mo e tuí mo e fakahā fakatāutahá.

Ko e founga pau taha pē ki hono ʻiloʻi iá, ʻoku fou mai ia ʻi he mālohi ʻo e Laumālie Māʻoniʻoní. ʻOku fakaafeʻi ʻe he vahe fakaʻosi ʻi he Tohi ʻa Molomoná ha faʻahinga taha pē ke ne lau ia, fakalaulauloto ki ai, pea fie ʻilo moʻoni ʻaki ʻene fehuʻi ia ki he Tamai Hēvaní ʻi he huafa ʻo Sīsū Kalaisí. Ko kinautolu te nau fakahoko e founga ko ʻení te nau ʻiloʻi ʻi he mālohi ʻo e Laumālie Māʻoniʻoní, ʻoku moʻoni ʻa e tohí (vakai, Molonai 10:3–5). Kuo lauimiliona ha kāingalotu ʻo e Siasí kuo nau lotu pea ʻilo ʻi he fakamoʻoni ʻa e Laumālie Māʻoniʻoní ʻoku moʻoni ʻa e Tohi ʻa Molomoná. (Ki ha toe fakamatala lahi ange ʻi he kaveinga ko ʻení, vakai, peesi 4, 60, mo e 80 ʻo e makasini ko ʻení.)

ʻOku kau heʻetau tefitoʻi tuí ʻa hono fakahā maʻu pē ʻe he ʻOtuá Hono finangaló ki Heʻene fānaú he māmaní pea ʻe fai pehē maʻu pē. ʻOku tau tui ko e Tohi Tapú ko e folofola ia ʻa e ʻOtuá ka ʻoku ʻikai ke tau tui ʻoku maʻu kotoa ai e fakahā kuo ʻomi ʻe he ʻOtuá pe ʻoange ki Heʻene kau palōfitá. He ʻoku aʻu pē ki he ʻahó ni ʻEne kei fakahā mai Hono finangaló ʻi he kau palōfita moʻuí mo e kau ʻaposetoló, ʻa ia ko e fakavaʻe ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní (vakai, ʻEfesō 2:20).

ʻI he taimi naʻe tohi ai ʻe he ʻAposetolo ko Sioné ʻa e tohi Fakahaá, naʻe ʻikai ko e tohi fakamuimuitaha ia ʻo e Tohi Tapú. Naʻe teʻeki ai ke fakatahaʻi ʻa e Fuakava Motuʻá mo e Fuakava Foʻoú ia ko ha tohi folofola pē ʻe taha—ʻa ia ʻoku ui he taimí ni ko e Tohi Tapú—he naʻe toki fai ia he senituli hono tolú T.S.

ʻOku talamai kiate kitautolu ʻi he Teutalōnome 4:2 ha meʻa tatau ke ʻoua naʻa tau fakalahi ki he ngaahi lea ʻa Mōsesé. Ko hono moʻoní, ʻoku ʻikai hanga ʻe he veesi ia ko ʻení ʻi he konga kimuʻa ʻo e Fuakava Motuʻá, ʻo fakataʻeʻaongaʻi ai e toenga ʻo e Tohi Tapú. Pea naʻe ʻikai foki lau ʻa Mōsese ia pe ko Sione ki ha tohi naʻe teʻeki ke ʻi ai ʻi he taimi ko iá; ka naʻá na fakatokanga mai kinaua ki hono liliu e ngaahi akonaki totonu ʻo e ongoongoleleí.

ʻOku ʻikai ke hanga ʻe he Tohi ʻa Molomoná ia, ʻa ia ʻoku ʻi ai e kakato ʻo e ongoongoleleí, ʻo liliu e folofola ʻa e ʻOtuá, ka ʻokú ne toe fakapapauʻi mai ia. (Ki ha fakamatala lahi ange ʻi he kaveingá ni, vakai, peesi 24 mo e 38 ʻo e makasini ko ʻení.)

Ko e tali ki he fehuʻi ko ʻení ʻe makatuʻunga ia ʻi hano maʻu ha mahino ki hono liliu ʻo e Tohi ʻa Molomoná pea mo e anga hono pulusí.

1. ʻI hono liliu ʻe Siosefa Sāmita ʻa e ʻū lauʻi peleti koulá ʻaki e mālohi ʻo e ʻOtuá, naʻá ne tala-kae tohi ki ha tangata tohi. Naʻe faʻa hala e sipelá mo e kalamá ʻi hono hiki ʻe he tangata tohí ʻene ngaahi leá. Hangē ko ʻení, ʻi he 1 Nīfai 7:20 ko e ngaahi foʻi lea ko e “naʻá na mamahí” naʻe hiki ia ko e “ne ne memeha.” Naʻe ʻikai ke ako lelei e kau tangata tohí, pea naʻe teʻeki ai ke fokotuʻutuʻu lelei e sipelá ia ʻi honau taimí.

2. Naʻe hiki ha tatau ʻo e tohi totonu naʻe tohi nimá ke maʻu ai ha tatau foʻou naʻe tohi nima maʻá e tangata fai pākí. ʻI he tuʻunga ko ʻení, naʻe fakatonutonu ai ha ngaahi sipela mo e kalama naʻe halá, pea tānaki atu mo e fakaʻilonga leá. Ka naʻe toe ʻi ai pē mo e ngaahi hala foʻou he naʻe ʻi ai ha ngaahi foʻi lea naʻe hiki halaʻi.

3. Naʻe fai ʻe he tangata fai pākí hono lelei tahá ke fokotuʻu ke tonu e mataʻi taipé. Neongo iá, naʻá ne toe fai mo ha ngaahi fehālaaki kehe. Hangē ko ʻení, ʻi he ʻAlamā 57:25 naʻe hala ʻene lau ʻe ia ʻa e foʻi lea ko e “fiefiá” kae tohi ia ko e “fili.”

4. Naʻe vakaiʻi fakalelei ʻe he Palōfita ko Siosefa Sāmitá ʻa e fuofua tatau ʻe tolu ʻo e Tohi ʻa Molomoná, pea hokohoko atu ʻene tokoni ke fai ha ngaahi fakalelei mo e fakatonutonu. Ka naʻe ʻi ai ha ngaahi fehālaaki ʻe niʻihi naʻe toki maʻu ia kimui. Naʻe toki maʻu ha fehālaaki ʻa e tokotaha faipākí ʻi he 1981ʻi he ʻAlamā 16:5 pea toki fai leva hono fakatonutonu, ʻo liliu mei he “tatau ai pē” ki he “pe ʻoku”—ke tatau mo e tohi totonu ko ia naʻe liliu ʻe he Palōfitá mei he ʻū lauʻi peleti koulá.

5. ʻOku kau ʻi he ngaahi liliu kehé ʻa e vahe foʻou mo e vahevahe ʻo e vēsí mo e futinoutí mo hono ngaahi fakamoʻoni fakafolofofolá.

ʻE tatau ai pē pe ko e hā ha faʻahinga fehuʻi ʻa e kakaí ʻo kau ki he Tohi ʻa Molomoná, ka ko e tohí pē ʻa hono taukapo lelei tahá. Te ke lava ke fakamoʻoni ki he tohí, vahevahe atu hano tatau, pea fakaafeʻi e niʻihi kehé ke nau lotua ia maʻanautolu. Kapau ʻoku ʻi ai ha taha ʻokú ne maʻu ha loto fakamātoato mo ha holi moʻoni ke ʻilo pe ʻoku moʻoni ʻa e tohí, ʻe hanga ʻe he ʻEikí “ʻo fakahā ʻa hono moʻoní [ki he tokotaha ko iá] ʻi he mālohi ʻo e Laumālie Māʻoniʻoní” (Molonai 10:4).