Naʻá ku ʻAhiʻahiʻi e Talaʻofa ʻa Molonaí

ʻI ha ngaahi taʻu kimuʻa atú naʻá ku ʻi ha fale hoku kaungāmeʻa pea feʻiloaki ai mo ha ongo talavou vala lelei naʻá na fakafeʻiloaki mai ko e ongo faifekau kinaua ʻo e Kau Māʻoniʻoni ʻi he Ngaahi ʻAho Kimui Ní. Naʻá ku fakakaukau ʻoku ngali kehe ke na haʻu ki ʻĪtali ke toe fakaului e kakai kuo nau ʻosi tui ki he Fakamoʻuí.

Naʻá ku kole kimui ange ke na haʻu ki hoku ʻapí. Naʻá ku talaange, “Kapau ʻoku mo fie ʻalu ange, pea mo ʻalu ange ke tau talanoa fekauʻaki mo e anga fakafonuá. Kae ʻoua naʻá mo fakakaukau ʻe liliu ʻeku tui fakalotú.”

ʻI heʻemau toe feʻiloaki mo e ongo faifekaú he pō hokó, naʻá na fakamatala kau ki he Tohi ʻa Molomoná. Naʻá ku fakakaukau ʻoku ngali kehe ʻeni he naʻe teʻeki ai ke u fanongo ai kimuʻa. Naʻá ku toe fakaafeʻi ke na foki mai, ka ʻi he hili ʻa e ʻaʻahi hono uá, naʻe pehē ʻe hoku uaifi ko ʻAna Maliá ʻoku ngali faikehe ʻena meʻa ʻoku fakamatalaʻí pea hū ia kituʻa lolotonga hono fai ʻo e lēsoní. Naʻe hangē ʻoku kiʻi ngali kehe ʻa e ongo faifekaú kiate au, ka naʻá ku fie ʻilo ki he meʻa ʻokú na fakamatalaʻí pea hokohoko atu pē ʻeku fakataha mo kinauá.

ʻI ha pō ʻe taha naʻe aʻu mai ai ʻa ʻAna Malia ki ʻapi, ʻo fanongo ki heʻemau talanoa kau ki he mali taʻengatá. Naʻe fuʻu tokanga ia ki ai, pea naʻá ma loto ke toe kamata hono tā e lēsoní. Naʻe lahi ʻene ʻilo ki he folofolá pea lahi ʻaupito ʻene fehuʻí. Naʻe ʻi ai e ngaahi fehuʻi naʻe tali mai ia ʻe he ongo faifekau tangatá he taimi pē ko iá, ka naʻe ʻi ai ha niʻihi naʻá na foki ki ʻapi ʻo toe fai ha fekumi ki ai. Naʻá na haʻu he uike kotoa pē mo e ngaahi talí, pea ʻi he uike kotoa pē naʻe ʻi ai ha ngaahi fehuʻi lahi ange ʻa ʻAna Malia.

Hili ha taimi nounou mei he ʻosi ʻa e lēsoní, naʻá ku ʻohovale ʻi he kole mai ʻe ʻAna Malia ke u fakangofua ia ke papitaiso. Naʻá ku talaange ʻoku ou loto pē ki ai kapau ʻokú ne ului kakato. Naʻá ku ʻalu leva ki hono papitaisó ʻi he ʻaho 5 ʻo Māʻasi 1995, pea naʻá ku ongoʻi fiefia lolotonga e ouaú.

Naʻe hokohoko atu ʻeku laukonga lahi kau ki he Siasí, pea fakalotolahiʻi au ʻe he ongo faifekaú. Naʻe faifai peá u fakakaukau ke ʻahiʻahiʻi e talaʻofa ʻa Molonaí (vakai, Molonai 10:4–5). Naʻá ku loto ke ʻilo pe naʻe ʻomi e Tohi ʻa Molomoná mei he ʻOtuá pe ko ha tohi faʻu fakaʻofoʻofa pē ia.

Naʻá ku nofo tokotaha pē ʻi ʻapi ʻi ha ʻaho ʻe taha ʻi Sune ʻo e 1995, peá u tūʻulutui ʻi hoku veʻe mohengá ʻo ʻeke ki he Tamai Hēvaní, “ʻOku moʻoni nai e Tohi ʻa Molomoná, pea kapau ʻoku moʻoni ko e fē taimi ʻoku totonu ke u papitaiso aí?” Naʻe fakafokifā ʻa e ongo lelei mai ha leʻo ki hoku lotó mo e ʻatamaí ʻo talamai kiate au, “ʻOku moʻoni ʻa e Tohi ʻa Molomoná.” Naʻe mahino lelei kiate au ʻa e taimi ke u papitaiso aí. Hili ha uike ʻe taha mei ai naʻá ku toe lotu pea maʻu pē ʻa e tali tatau. Naʻá ku fuʻu fiefia ʻaupito. ʻOku ʻou ʻiloʻi ʻeni naʻe folofola mai ʻa e ʻOtuá kiate au: naʻe tataki fakalaumālie ʻe he ʻOtuá ʻa e Tohi ʻa Molomoná pea ko Siosefa Sāmitá ko ha palōfita moʻoni ia.

Naʻe iku ʻo u papitaiso ʻi he ʻaho 17 ʻo Sepitema 1995, ko e hili ia ha taʻu ʻe taha mo e konga mei heʻeku feʻiloaki mo e ongo faifekaú. Naʻe vave pē mo e tokanga homa ʻofefine ko ʻApa Siailá ki he Siasí pea toe papitaiso mo ia. Naʻe sila homau fāmilí ʻi he Temipale Peeni Suisalaní ʻi Sānuali 1997.

ʻOku mau ʻiloʻi ko e Siasi moʻoní ʻeni, ʻoku puleʻi ia ʻe Sīsū Kalaisi ʻo fakafou mai ʻi ha palōfita pea mo e lakanga fakataulaʻeikí. ʻOku mau fakamālō ki he ʻEikí ʻi Heʻene ʻofá, ʻi hono tataki kimautolu ki he ongo faifekaú, pea mo ʻemau ʻilo ki he ongoongoleleí.