Avea ma Tagata Sili Atu ona Lelei o le Au Paia e ala i leAafia i Ekalesia Soofaatasi

I ni nai tausaga ua mavae, na siitia mai ai se faifeau Pesipeteriane i le matou nuu, i le manao e auauna atu i ona tuaoi uma, ae le na o lana aulotu. Ao ia aapa mai ma le agaga faauo i lo matou pitonuu na matele lava i le AAG, ma ofo mai e fesoasoani, ma ni valaaulia i patī a le pitonuu, sa amata ona auai tagata o le au paia i galuega fesoasoani a lana aulotu; o ia faatasi ma tuaoi o faatuatuaga eseese na faia se sailiga tupe na matuai fesoasoani i se aiga o le AAG sa pagatia i le tele o pili mo tausiga faafomai.

Na saunoa le aposetolo o Orson F. Whitney (1855–1931), “Ua faaaoga e le Atua le sili atu nai lo o se tagata e toatasi mo le faataunuuina o lana galuega tele ma le ofoofogia. … E telē tele, e faigata tele, mo soo se tagata e toatasi.”³ E mafai ona ausia ni mea se tele pe a tuufaatasi taumafaiga a tagata lelei. O taumafaiga a le faifeau a le matou pitonuu na taitai atu ai i le faavaega o se komiti a le nuu mo ekalesia soofaatasi lea, faatasi ai ma le Aualofa a le matou siteki, na faia se konafesi mo tamaitai ma sapalai ai ni pusa o mea e faaaoga mo le tausisia o le tumama ma ni tusi i ofisa mo tagata sulufai. O nei fegalegaleaiga i ekalesia soofaatasi na mafai ai e tagata o le siteki ona fesoasoani i se aulotu e fafaga se vaega toatele o tagata sulufai, ma tulai atu ina ua manaomia e se isi ekalesia ni volenitia faaopoopo i se nofoaga mo tagata ua leai ni fale.

“Ua i ai sa tatou tiutetauave … ia galulue soosoo tau’au ma isi lotu ma faalapotopotoga,” na ta’u atu ai e Peresitene Thomas S. Monson i tagata o le ekalesia,⁴ ma o lenei aapa atu ua faamanuiaina ai le lalolagi e ese mai i auaunaga fesoasoani agaalofa. I sana saunoaga i taitai Kerisiano i le Iunaite Setete, na faamatala ai e Elder Jeffrey R. Holland o le Korama a Aposetolo e Toasefululua se faasologa o soalaupulega i le va o le AAG ma Kerisiano Faaevagelia na faia i le Iunivesite o Polika Iaga.⁵ O se taunuuga o nei konafesi na tupu ina ua faatoese mai se taitai lauiloa faalelotu ona o le le sa’o o le faamatalaina o le ekalesia Mamona e nisi o tagata o lana aulotu.⁶ E uiga i le fausiaina o lena fegalegaleaiga na saunoa ai Elder Holland, “E le mafai ona ou taofia ae talitonu o lenei mea o se vaega o se tuufaatasiga faalelagi o mea e tutupu i nei vaitaimi faigata.”⁷

Ao tatou auauna faatasi ma isi, e mafai ona fesoasoani ni taiala patino ina ia atili anoa ai a tatou fegalegaleaiga ma aloese mai le tuuina atu o le faatausuai. Sa i ai se taimi na ou nofo ai i se aai tele ma ou volenitia ai e faiaoga mo se polokalama a se ekalesia i le lotoifale na tatala i tagata lautele—ae na ou iloa ai, o le tagata e vaaia sana le taliaina a’u ona o lo’u avea ma se tagata auai O Le Ekalesia a Iesu Keriso o le Au Paia o Aso e Gata Ai. O lena aafiaga na faatalitonuina ai a’u e faatauaina i saofaga a soo se tasi e tusa lava po o a ona fegalegaleaiga faalelotu (pe o le leai foi). Sa ou tulitatao ma le agaga faafetai i le fiafia o soo se tasi e aoao e uiga i le Ekalesia, ae ou te iloa foi, o i tatou o le Au Paia o Aso e Gata Ai tatou te faamamafaina tele le poloaiga a Iesu e alofa i lou tuaoi, faalavalava e lē lavalava, fafaga e fiaaai, ma asiasi i e faafalepuipui (tagai i le Mataio 25:34–36) e aunoa ma le faamoemoe e liua le tagata e mauaina le fesoasoani po o i latou o e tatou te auauna faatasi. O taumafaiga faamaoni ma faaaloalo a ekalesia soofaatasi e le manaomia ai soo se vaega, e aofia ai i tatou, ona faatō i ona talitonuga. Nai lo lena, e uunaia ai tagata e auai ia “aua le finau faasaga atu i se ekalesia” (MF&F 18:20) ma “faaoofuina [i latou] lava i le fusi o le alofa mama” (MF&F 88:125).

O se isi taiala aoga na ala mai i se taitai atamai o le siteki i lo matou pitonuu e toatele lava i le AAG. Sa ia fautuaina le au paia o loo galulue faatasi ma isi faatuatuaga e aua le “fao malo” e ala i le pulepuletutu i le faia o faaiuga po o le taitaiga, ae ia galulue e soalaupule ma tuu atu i tagata uma ia maua “le avanoa tutusa” (MF&F 88:122). Sa uunaia foi e lenei taitai, o lē na i ai se aafiaga tele i le galulue faatasi ma isi lotu, ia tagata o le ekalesia e atiina ae ni mafutaga lelei. Sa ia iloaina, o ni isi o e na faipaaga ma le Au Paia o Aso e Gata Ai, na iloaina o i latou o ni tagata galulue malosi ma lelei ae e sili atu le fiafia i le faia o le galuega nai lo le atiina ae o faauoga.

O o’u aafiaga i faamoemoega i alalafaga ma faaleaoaoga, ua faatalitonuina ai a’u e malosi le Agaga pe a tutufaatasi tagata eseese i se misiona tauaogaina. O le alofa faaleuso ma faamoemoega mamā e uunai ai i luma auaunaga e sili atu nai lo o le galue malosi na aafia ai.⁸

Na ta’ua e se tasi o failauga o le AAG i se konafesi faaakatemia a ekalesia soofaatasi e faapea, o le faia o fesootaiga ma isi e fesoasoani ia i latou e i fafo atu o lo tatou faatuatuaga ia malamalama lelei ia i tatou.⁹ O se tasi tagata atamai, e le auai i le tatou faatuatuaga, na aoao mai se semina i le Faamamona i se iunivesite iloga i Amerika. Sa ia iloa ai sa mananao ia ana tagata aooga e aoao e uiga i la tatou Ekalesia “e muamua lava … aua sa latou ola a’e ma le talitonuga o le tapuaiga e le faavaea, ae sa le tutusa o latou aafiaga ma a latou uo ma paaga Mamona ma lena faamatalaga.”¹⁰

O le galulue faatasi ma isi e le gata ina fesoasoani latou te malamalama ai ia i tatou, ae e uunaia ai foi i tatou e aoao mai ia i latou ma iloa atili ai o le Atua e “le faailoga tagata” (MF&F 1:35). E fesoasoani o Ia i tagata lelei o tapuaiga ma aganuu uma i a latou taumafaiga e faaleleia atili olaga o Lana fanau.

O lenei iloa o le lelei i isi e fesoasoani ia i tatou e tumau ai i le lotomaualalo—e ese mai i le au Faresaio lea na ta’usalaina e Iesu i lo latou faamaualuluga faaleagaga (tagai i le Mataio 23) po o sa Soramā, lea o loo faaalia e le Tusi a Alema e fiatagata ma faafefeteina (tagai i le Alema 31). O le iloa o le lelei o isi e mafai ai ona avea i tatou ma ni tagata sili atu ona lelei.

E mafai ona faalauteleina lo tatou alofa mai se li’o pumoomoo o le aiga ia aofia ai e le gata i a tatou uo ae mulimuli ane o o tatou tuaoi—ma e oo lava i fili. Na faamatala e se tasi tagata o le Ekalesia na auauna atu i le militeli a Amerika ina ua mavae le–Taua Lona II o le Lalolagi i Iapani, e uiga i lana tauiviga ma le ita agai i tagata Iapani. Ina ua uma ona faafeiloai [a’u] i totonu o se maota tapuai e tagata Iapani o le aai, peitai, sa ia iloa ai “na pai mai o latou agaga ia te a’u, ma sa ou lagonaina se suiga ofoofogia i o’u lagona ia i latou. Sa liusuavai lo’u ita. … Sa ou mafaufau e uiga i le mea na tutupu i totonu o lena maota tapuai ma le suiga ofoofogia sa ou lagonaina agai i tagata iina.”¹¹

E faapena foi, a tatou taliaina moni isi i lo tatou lotolotoi, e mafai foi ona latou oo i se suiga faapea. Sa tusia e se Kerisiano Faaevagelia sa faauu mai le Iunivesite o Polika Iaga se tusiga e uiga i lona aafiaga ma faamatala mai lona faatautee muamua i tagata aooga o le AAG. Ae ina ua uma ona faia ni faauoga anoa, sa oo ina ia talisapaia “le faamamafa sa ou iloa na tuu e le Au Paia o Aso e Gata Ai i le latalata mai o le Atua i le tagata soifua. Sa amata ona ou malamalama ona sa ou taumafai e taofi [i lo’u mafaufau] le maoae o le Atua, sa ou lafoaia ai le latalata mai o le Atua—ma o lenei iloaina sa i ai se aafiaga loloto ia te au.”¹²

I lana saunoaga i taitai Kerisiano, na faailoa ai e Elder Holland le “tulaga lamatia e o faatasi ma le aoaoina o se mea fou e uiga i se isi tagata. O malamalamaaga fou e aafia ai i taimi uma ia vaaiga tuai, ma o lea o se toe manatunatu, toe faatulaga, ma le toe fausia o o tatou malamalamaaga e uiga i le lalolagi e le mafai ona alofia.”¹³ I le faauoina o tagata o isi faatuatuaga, sa masani ona ou iloiloina ai o tatou eseesega, taumafai e tuueseese eseesega faaleaganuu mai aoaoga faavae, ae o le taimi foi lena e taumafai e talisapaia mea uma e mama ma matagofie latou te ofoina mai. E moni, o le taumafaiga o nisi taimi e ono lamatiaina, ae e aoga i taimi uma lava. I le faagasologa o lo’u vaai atu i mea mai se vaaiga e ese mai, na ou iloa ai lo’u aveeseina o lo’u lilifa atu i aganuu e papa’u ae ou latalata atili atu i le fatu o le talalelei.

Sa valaaulia e nisi o vaega o le AAG la’u uo faifeau e saunoa atu ai i le autu o le “alofa atu i o tatou tuaoi e ui i eseesega faalelotu,” ma sa ia oo i le maoae o le taliaina e i latou na auai ai. O le isi taimi na sosoo ai, sa ia valaaulia ai ni isi o le Au Paia o Aso e Gata Ai, e aofia ai ma a’u, e talanoa atu i aulotu eseese i le autu lava lea e tasi. Ina ua maea ia sauniga, sa ou iloa ai le siomia o a’u e tagata o aulotu sa mananao e talanoa mai ia te au, opo au, ma faapea foi ona maligi loimata o le alofa soofaatasi ma le malamalama. I aafiaga faapenei, ua ou iloa ai le moni o le faaiuga a Elder Holland:

“A tatou vaai i tua atu o lanu o tagata, vaega faaleatunuu, li’o o agafesootai, ekalesia, sunako, faletapuai, tautinoga, ma faamatalaga o talitonuga, ma pe a tatou taumafai e vaai atu ia te i latou po o ai ma o a i latou—o fanau a le Atua lava lea e tasi—e tupu se mea lelei ma aoga i totonu o i tatou, ma faapea ona tāina atu ai i tatou i totonu o se faatasiga vavalalata ma le Atua, o le Tama o i tatou uma.”¹⁴