Aiga ma Uo e Faavavau

Soo se mea e te nofo ai, o le a e maua ni uo o loo saili mo le fiafia sili atu ua e maua i le ola ai i le talalelei toefuataiina a Iesu Keriso. Atonu e le mafai ona latou faamatalaina lena fiafia i upu, ae e mafai ona latou iloa pe a latou vaai i ai i lou olaga.O le a latou naunau ia iloa le punavai o lena fiafia, aemaise lava pe a vaai atu ua e feagai ma tofotofoga e pei lava ona latou oo i ai.

Ua outou lagonaina le fiafia ao outou tausia poloaiga a le Atua. O le fua lena na folafola mai o le ola ai i le talalelei (tagai i le Mosaea 2:41). E te le tau usitai ma le faamaoni i poloaiga a le Alii ina ia iloa ai e isi tagata, ae o i latou o e matauina lou fiafia ua saunia e le Alii e faalogo i le tala lelei o le Toefuataiga o le talalelei.

O faamanuiaga ua tuuina mai ia te oe ua fatuina ai ni tiute ma ni avanoa matagofie mo oe. I le avea ai ma se soo o le feagaiga a Iesu Keriso, ua ia te oe se tiute e tuuina atu ai i isi se avanoa e saili ai le fiafia faateleina, aemaise lava i au uo ma tagata o lou aiga.

Na silafia e le Alii lo outou avanoa ma faamalamalama mai lou tiute i lenei poloaiga: “Ua tatau i tagata taitoatasi o e ua uma ona lapataia ona lapatai atu i le la te tuaoi” (MF&F 88:81).

Ua faafaigofieina e le Alii ona usitaia lena poloaiga e ala i suiga o loo tupu i lou loto a o e taliaina ma ola ai i le talalelei a Iesu Keriso. O se taunuuga, o lou alofa mo isi o le a faatupulaia, e faapena foi lou manao mo i latou ina ia maua lena lava fiafia e tasi ua e oo i ai.

O se tasi o faataitaiga o lena suiga o le ala lea e te taliaina ai le avanoa e fesoasoani ai i le galuega faafaifeautalai a le Alii. Na vave ona iloa e faifeautalai faamisiona e mafai ona latou faamoemoeina mai se tagata liliu mai faamaoni se tali fiafia o se talosaga mo se igoa e faailoa atu. E matua manaomia e le tagata liliu mai ni uo ma tagata o le aiga e faasoa atu lo latou fiafia.

Pe a fesili atu ia te oe le taitai misiona a le uarota po o faifeautalai mo ni igoa o se tasi e aoao atu, o se faamālō tele lea ia te oe.Latou te iloa ua vaaia e uo lou fiafia ma, o le mea lea, ua saunia na uo e faalogo ma filifili e talia le talalelei. Ma latou te talitonu o le a avea oe ma le uo lea latou te manaomia ao latou o mai i le malo.

E le manaomia ona e fefe faapea o le a leai ni au uo ona o le valaauliaina o faifeautalai e feiloai ia i latou. E i ai ni au uo o e na teena ia faifeautalai ae na faafetai mai ia te au i le aluga o le tele o tausaga mo le ofoina atu o se mea ia i latou sa latou iloa e matua taua ia te au. E mafai ona e faia ni uo e faavavau i le ofoina atu o le talalelei, lea latou te vaaia ua aumaia ia te oe le fiafia. Aua nei misia se avanoa e valaaulia ai se uo ma aemaise lava o se tagata o le aiga e filifili e mulimuli i le fuafuaga o le fiafia.

E leai se avanoa sili atu mo lena valaaulia nai lo o totonu o le malumalu o le Ekalesia. O iina o le a ofoina atu ai e le Alii ia sauniga o le faaolataga i o tatou tuaa na le mafai ona latou taliaina i le olaga. Latou te vaavaai ifo i o outou luga ma le alofa ma le faamoemoe. Ua folafola mai e le Alii o le a latou maua le avanoa e o mai ai i Lona malo (tagai i le MF&F 137:7–8), ma na Ia totoina ai se alofa mo i latou i lou loto.

O le toatele o outou ua lagonaina le olioli i le ofoina atu o sauniga o le malumalu i isi, e pei lava ona e faia pe a e tuuina atu igoa o tagata i faifeautalai e feiloai i ai. Ua outou lagonaina le olioli e sili atu e faataunuu ai sauniga mo ou tuaa. Sa faaali mai i le Perofeta o Iosefa Samita e mafai ona maua lo tatou fiafia e faavavau pe afai tatou te ofoina atu le ala i lena faamanuiaga i o tatou tuaa e ala i sauniga sui o le malumalu (tagai i le MF&F 128:18).

O le taimi o le Kerisimasi e liliu atu ai o tatou loto i le Faaola ma i le olioli na aumaia ia i tatou e Lana talalelei. Tatou te faaalia lo tatou agaga faafetai sili ia te Ia ao tatou ofoina atu lena fiafia i isi. O le a liua le agaga faafetai i le fiafia ao tatou tuuina atu ni igoa i faifeautalai ma ao tatou aveina atu ia igoa o o tatou tuaa i le malumalu. O lena faamaoniga o lo tatou agaga faafetai e mafai ona maua ai ni uo ma ni aiga e tumau faavavau.