O Tatou Aiga, O Tatou Auaiga
Fesoasoani i Fanau ia Iloa le Agaga Paia
E alala le tusitala i Kalefonia, ISA.
E mafai ona tatou faaaoga auala eseese e fesootai mai ai le Agaga Paia e fesoasoani ai i a tatou fanau ia atiina ae molimau.
I le avea ai ma matua o ni atalii e toafa, ma te saili e le aunoa ma lo’u toalua ni auala e fesoasoani i la maua fanau e lagona le Agaga ma maua se molimau. Sa i ai se mea taua na matou malamalama i ai i se auala tulaga ese. Sa ou tu i se faleoloa i le taimi na oo mai ai le uunaiga.
O togi a le ma atalii ulumatua i lana vasega o suesuega faaagafesootai na amata ona alu i lalo. Sa ma talanoa ia te ia e uiga i ai, faamalosiau ia te ia e suesue malosi atili, ae sa leai lava se tulaga faaleleia. Na ma tatalo mo ni manatu e fesoasoani ai ia te ia. I se tasi aso i totonu o se faletusi, sa ou maua se uunaiga malosi e faatau se tusi mai se faaputuga o tusi lea sa faia ai se faatautui.
O le tusi e faatatau i le ala e tofu ai i tatou taitoatasi ma auala eseese e aoao ai. E toatele tagata e aoao i mea faitino, o lona uiga e lelei le latou aoao e ala i mea latou te vaaia. O nei tagata e masani lava ona fiafia i faatufugaga ma le faitautusi. O nisi e lelei le aoao i mea latou te faalogo i ai. E sili atu le latou faagaoioia o faamatalaga pe latou faalogo i ai. O nei tagata e masani ona fiafia i musika. Ma le vaega mulimuli, o nisi o tagata e lelei le latou aoao i mea e feminoiai. E sili atu ona latou aoao pe a aafia ai le feoai solo po o ni gaoioiga. O nei tagata aoao latou te tauivi i nisi taimi i le aoga pe a taumafai faiaoga e faanofo filemu i latou. E lelei le latou aoaoina pe a latou feminoia’i solo.
Sa i ai iina le tali! O le ma atalii na mautinoa lava o se tagata e aoao i le faalogo—e fiafia i musika ma le talanoa! Sa ma iloaina e matele lava ina aveese mai le vasega mo nisi gaoioiga i le taimi o suesuega faagafesootai ma sa ta’u atu e le faiaoga e alu i le fale ma faitau mea na tusitusia. Sa ia tauivi aua na te lei faalogo i talanoaga a le vasega. O le taimi lava na ma malamalama ai i lenei mea, na ma faamalosiau atu ia te ia e faitau leotele ana meaaoga ua atofaina atu ona matou talanoaina faatasi lea. Na toe oso i luga ona togi.
Lagolagosua i Aafiaga Faaleagaga
Ae e lei gata ai iina lo ma malamalamaaga i ituaiga o aoaoga. Na ma iloaina ao ma suesue atili i lenei mea ma matauina le ma fanau ma faapea e matele lava ina aoaoina e le Agaga Paia a tatou fanau i auala e sili ona latou aoaoina ai. Na aoao mai le Perofeta o Iosefa Samita e faapea, e tautala mai le Agaga ia i tatou i la tatou gagana ma le auala e mafai ona tatou malamalama ai. E fetuunaia e le Agaga Paia Lana gagana ina ia malamalama i ai tagata uma, e oo lava i fanau iti. “E avanoa lo tatou Tama Faalelagi mo i tatou i taimi uma lava. E fetuutuunai o Ia i lo tatou tulaga o le malamalama. “Afai e afio mai o Ia i se tamaitiiti laitiiti, o le a fetuunai o Ia lava i le gagana ma le gafatia o se tamaitiiti laitiiti’ (Iosefa Samita, i Talafaasolopito o le Ekalesia, 3:392).”1
O le iloaina e fetuunai e le Agaga Lana fesootaiga mo lo tatou malamalama, e mafai ona faamalosiau atu ai i matua e fatu ni avanoa mo a latou fanau e faalogo ai i aoaoga mai le Agaga Paia i auala o le a sili atu ai ona latou malamalama i ai. “E aoaoina lau fanau uma lava e Ieova; e tele foi le manuia o lau fanau” (Isaia 54:13).
E pei ona ou ta’ua, o le metotia autu lava e aoao ai le ma atalii ulumatua o le faalogo. E fiafia uma lava i laua ma le ma atalii lona tolu i musika, ma o lea la e tele lava ina ma tātāina ai ni musika matagofie mai le Aufaipese Tapeneko Mamona, faapea foi ma fatuga tuai o musika. Sa la lagonaina loloto le Agaga i lenei siosiomaga. E tele foi ina faia ni matou lesona mataalia e faatatau i le talalelei, ma na fesoasoani lenei mea ia te i laua e aoao ai i upu moni lea sa faamalosiauina e le Agaga a o la faalogo atu i ai.
O le isi atalii sa matele lava i le aoao i mea faitino. Sa fiafia e faitau ma e sili le lagona o le Agaga ao faitauina tusitusiga paia po o tusi e faaogatotonu ai le talalelei. Sa ma tuuina atu ni tusi se tele mo ia e faitau lea na fesoasoani ia te ia ia lagona ai le Agaga ma maua se molimau. Sa matou faapipiiina foi ni ata o le vaaiga o le talalelei ma faaupuga i luga o o matou puipui ina ia avea ai lo matou fale ma se taumafataga o le aoaoina o mea faitino.
O le ma atalii lona lua o se tagata e aoao i mea faitino ma le feminoiai. O ia o se tamaitiiti matuai tiotio lava ma e sili ona fiafia e tietie uila po o se savaliga sopo ma lona tama. Na matou iloaina, na sili atu le lelei o lona lagonaina o le Agaga pe a i ai i fafo ma fealuai solo. Na tele ni matou malaga mo tolauapiga faaleaiga lea na matou talanoa ai e uiga ia Iesu Keriso, le Foafoa, ma le ata o le faaolataga. O nei savali na oo atu i le ma atalii lona lua i se auala mamana ao ia auai i nei gaoioiga.
Na ma iloaina foi ma lou toalua o le aoao e ala i le feosofa’i solo e mafai ona tupu pe a faia ni auaunaga. O lea e anoanoai ni gaoioiga auauna atu na matou faia ma le ma fanau ina ia mafai ai ona latou vaai, faalogo, ma auai. O lenei mea na fatuina ai se siosiomaga matagofie lea e mafai ai e le ma fanau tama uma ona faaaoga ia lesona o le alofa mama ma le auaunaga faa-Keriso, ma o nei galuega faatino na matuai luluina ai lava le ma atalii lona lua.
Faalogo ma Malamalama
Sa matou iloaina foi e “lagona” e tagata le Agaga Paia i ni auala eseese. Sa ou aoaoina se lesona o le Aoga Sa i ni tagata fou e lei leva ona liliu mai, ma sa ou tuuina atu se fesili faapea, “E faapefea ona e lagonaina le Agaga?” O a latou tali na matuai malamalama lelei. Fai mai se tasi, “Ou te lagona le manino o o’u mafaufauga.” O le isi na faapea mai, “Ou te lagona le mafanafana i totonu,” ae faasoa mai se isi, “Ou te lagonaina se lagona loloto o le filemu.” O se tamaitai o le sa avea ma se tagata o le ekalesia mo ni nai masina na fai mai, “Ou te lagona le manitiniti atoa o lou tino!” Ma o nisi sa ta’ua e i ai taimi latou te “lagonaina” ai se leo o tautala atu ia te i latou po o ni manatu fou o le a oo ia te i latou.
Na aoao mai Elder Dallin H. Oaks o le Korama a Aposetolo e Toasefululua: “I ona tulaga e sili ona lauiloa, o faaaliga po o musumusuga e oo mai e ala i upu po o manatu e fesootai atu i le mafaufau (tagai i le Enosa 1:10; 8:2–3 MF&F), e ala i le malamalama faafuasei (tagai i le 6:14–15 MF&F), e ala i lagona lelei pe leaga e uiga i ni fuafuaga faatino na fautuaina mai, pe ala mai foi i faafiafiaga musuia, e pei o faiva i faafiafiaga. … “O musumusuga e tele ina oo mai o se lagona nai lo o se leo.’”2
E manino lava o i tatou taitoatasi e mafai ona faalogo ma lagonaina le fesootaiga a le Agaga Paia i ni auala eseese. E tatau ona tatou galulue i tua atu nai lo na o le aoao atu o tamaiti o le a latou maua se lagona mafanafana, aua atonu latou te le maua se na lagona; atonu latou te maua uunaiga i se ala e ese mai.
Na faamatalaina e Elder Jay E. Jensen, o le na avea muamua ma au Peresitene o Fitugafulu, le tala lenei e uiga i se tasi o le Korama a Aposetolo e Toasefululua o lē na alu sana asiasiga taamilo i se misiona. I le va o konafesi faalesone, na faliu atu lenei Aposetolo i se tasi o Fitugafulu lea na saunoa i le konafesi talu ai ma faapea atu, “Ou te mafaufau pe e te lei tuuaina se manatu i mafaufau o faifeautalai ua atili tele ai faafitauli nai lo mea e mafai ona e foia. A o ou femalagai i le Ekalesia atoa, e toalaiti lava ni nai tagata ua ou iloa na maua se lagona o le mu o le loto. O le mea moni, sa toatele ni tagata na tau mai ia te au ua latou le fiafia ona latou le’i mauaina lava sea lagona, e ui lava na latou tatalo pe na anapopogi mo ni vaitaimi uumi.” Sa faaauau pea le faamatalaga a Elder Jensen: “I le aluga o tausaga, sa ou taumafai e aoao ia auala eseese lea e galue ai le Agaga o le Alii. E moni, e fetalai mai le Atua mai le lagi, ae na te faaalia, faamautu, pe tuuina mai le taitaiga i ni auala eseese.”3 E taua tele le aoao atu o a tatou fanau e tatau ona latou aoao e faalogo i le Agaga i le ala e talanoa mai ai o Ia ia i latou.
A o tatou aoaoina a tatou fanau, ua tatou faasoa atu ia mataupu faavae o le faatuatua, salamo, papatisoga, ma le meaalofa o le Agaga Paia. O le aoao atu o i latou e faalogo ma malamalama i musumusuga e oo mai ia i latou, e taua mo lo latou alualu i luma faaleagaga. Na fautuaina i tatou e Peresitene Gordon B. Hinckley (1910–2008) e faapea, “O le a manaomia e [lau fanau] le malosi ma le faatuatua uma e mafai ona e tuuina atu ia i latou aʼo latou latalata atu ia te oe. Ma o le a latou manaomia foi se malosiaga sili atu lea e sau mai i se mana e maualuga atu.”4
O le mauaina o le taiala ma le taitaiga mai lo tatou Tama Faalelagi e ala i le Agaga Paia, o se faamanuiaga sili i o tatou olaga. A o tatou aoaoina a tatou fanau i auala e maua ai ma gauai atu ai i nei uunaiga, lagona, ma faatonuga, o le a latou maua ni molimau patino o le a tuu atu ai ia te i latou le malosi i le lumanai. E mafai ona avea le Agaga Paia ma a latou soa tumau, ma o le a mafai ona latou lagona atili o Ia. I le avea ai ma matua e mafai ona tatou fesoasoani i lenei faagasologa ma fesoasoani e faamanuia a tatou fanau.