O Se Tali i Ana Tatalo

Sa ou le lagonaina le agaga o le Kerisimasi. Ua oo ia Tesema o lo’u tausaga faaiu i le aoga maualuga, ma o pepa e faatumu e ulufale ai i kolisi faapea ma lau galuega faatino mulimuli o le Lora na faamalumalu mai i ou luma. Ou te faamoemoe e maua se avanoa volenitia e mafai ai ona ou lisia i totonu o au pepa faatumu o kolisi na ou auai ma faaaoga foi o sau galuega faatino a le Lora. O le mea e laki ai na talosagaina i maua ma la’u uo o Jesicca e le faufautua o tamaiti aoga pe mafai ona ma faamaopoopoa se gaoioiga a le aoga e ao mai ai ni mea taalo mo se faalapotopotoga o galuega alofa i le lotoifale.

Sa ou faamatuu atu le tele o le galuega i le komiti o le galuega faatino. Sa ou tuu atu ia i latou e fatu se laupapa puletini o loo faailoa mai ai se fua tele e iloa ai le aofaiga o meataalo na foai mai. Na matou manatu ua lava na faalauiloaga, ma sa ma faaaluina ia periota taitasi o malologa e ao mai ai foai. Na foai mai e tamaiti ni nai meataalo, e ui i lea, na tumau le maualalo o le fua.

O le mea na ese ai, na amata ona tuueseina e lo matou faufautua nisi o meataalo. Ina ua ma fesili atu ma Jessica po o le a se mea na te fuafua e fai i ai, sa ia tau mai ia i maua o loo i ai se faiaoga i le aoga na iloaina talu ai nei lava ua maua i le kanesa. Ina ua mavae se tauiviga e faiaoga a o faia ni togafitiga, na ia filifili loa e ave ni aso malolo mai le galuega. I le lalata mai o aso malolo ma le faulalai o pili a le fomai, o le a leai ni meaalofa o le Kerisimasi mo lona aiga. Na fautua mai lo matou faufautua e matou te afifiina mo i latou ia meaalofa ia na tuuese.

Sa ootia lo’u loto. Sa ou vaai i la’u auaunaga faatino o se auala e auauna ai ia te au lava ia, ae le o isi. Sa ou filifili loa e faatoluina la matou sini mo meataalo e foai faameaalofa mai ma amataina ona fai se saogatupe mo le faiaoga ma lona aiga.

Na ma asiasi atu ma Jessica i potuaoga ma faasilasila atu lo matou faamoemoega. Sa tele le tali mai. Na tuuina mai e faiaoga, le aufaigaluega, ma tamaiti aoga ni meataalo ma tupe e fesoasoani ai i le aiga. E lei umi ae matou ausia la tatou sini o meataalo, lea na maofa ai le faalapotopotoga o galuega alofa. Na matou aoina mai foi le sili atu ma le $1,000 mo le aiga.

Ao matou afifiina ma le faaeteete ia meaalofa na matou aoina mai ma faatauina, na ou iloaina ai o le molimau e uiga i auauna atu sa ou mauaina na tutusa lava le maoae ma meaalofa na matou tuuina atu. E le mafai ona ou faamatalaina le lagona faagaeetia sa ou lagonaina a o matou vaavaai atu faalilolilo i le mauaina e le aiga o meaalofa na matou tuua i luma o lo latou faitotoa e aunoa ma lo latou iloa.

I ni nai masina mulimuli ane, na talosagaina ai i maua ma Jessica e faiaoga i se semina e faatatau i galuega auauna atu. Na ma faamatalaina le mea na matou faia e aunoa ma le ta’ua o le suafa o le faiaoga. Na sii i luga le lima o se teineitiiti ma tu i luga. Na tagi ma fai mai. O le faiaoga o le uso o lona tama, ma sa ia faamatalaina le tele o le aafiaga na oo ia te ia ona o la matou auaunaga. Sa ia fai mai o se tali lea i ana tatalo.

Oka o se fiafiaga i lena vaitau o aso malolo o le o mai faatasi i se auaunaga faamaoni ma le iloaina sa matou faia se eseesega.