“E faapefea ona ou teteeina faaosoosoga?”

Ina ia tetee atu i faaosoosoga, e muamua ona tatou manaomia le manao ma le naunau faamaoni e filifili le mea sa’o. E fesoasoani tele ia te au pe a ou vaai faalemafaufau muamua i se tulaga ona filifili lea o le mea sa’o. O le isi mea na fesoasoani ia te au o le tatalo. Afai tatou te tatalo mo le malosi, saili mo le fafagaina faaleagaga, ma filifili ma le faaeteete nofoaga tatou te tafafao ai, ona mafai lea ona avea le Agaga Paia ma o tatou soa tumau e faatasi ma i tatou ma lapataia i tatou.

Ou te manatu o le faitauina o tusitusiga paia i aso taitasi, tatalo, faaaogaina o le loto pulea, ma mulimuli i saunoaga a le perofeta, e mafai ai ona tatou teenaina faaosoosoga. O le tetee atu i faaosoosoga e faamalosia ai lou faatuatua ma faaali atu ai lou tautino i le Tama Faalelagi e tausia ia feagaiga ua e osia. O le i ai o ni uo i le Ekalesia e mafai ona fesoasoani foi ia i tatou, aua e mafai ona tatou lagolago atu i le tasi ma le isi. E manaomia ai le tele o le lototele e fai atu leai. Ia manatua, “Ua le foaiina mai e le Atua ia te i tatou le agaga e mata’u ai; a o le agaga e faamalosi ai, ma alofa ai, ma mafaufau tonu ai” (2 Timoteo 1:7). Pe a tatou manumalo i faaosoosoga, ua tatou faalatalata atili atu ia Iesu Keriso ma lo tatou Tama Faalelagi.

I le aoga maualuga, na valaaulia ai au e le toatele o tamaiti o la’u vasega ia inu ava malosi ma matamata i ponokalafi. O taimi uma lava ou te fai atu ai leai ona ou te faia mea e finagalo le Faaola ou te faia. Ou te manatua o Ia ma tausia a’u feagaiga. O nisi taimi e le faaosoosoina ai a’u e a’u uo ma tamaiti o le vasega aua ua latou iloa la’u lotu. O le faasoa atu o o tatou talitonuga ma molimau i isi—aemaise lava i uo, tagata o le vasega, tuaoi, ma aiga—o le a faaitiitia ai faaosoosoga i o tatou siosiomaga. Ou te iloa o le ola i le talalelei, e mafai ai ona tatou faatoilaloina faaosoosoga i o tatou olaga.

Ua ou iloa a oo mai faaosoosoga, e taumafai le Agaga Paia e lapatai mai ia te au e filifili le mea sa’o. Fai mea—e pei o le tatalo ma faitau au tusitusiga paia—ina ia faatumau ai le Agaga ia te oe, ma aloese mai nofoaga e le mafai ona sau i ai le Agaga Paia.

E fai mai i taimi uma lo’u tuagane matua ia “tu i nofoaga paia.” Sa ou iloa o le uiga o lenei mea, o le tu i nofoaga e tau le i ai ni faaosoosoga pe e tau le ogaoga foi. Fai mai lo’u peresitene o le siteki, “Aua nei na ona tetee atu i faaosoosoga—aloese mai faaosoosoga.” O le a i ai taimi e tatau ai ona e tetee atu i faaosoosoga, ae e faigofie atu ona ola i le talalelei pe a le i ai ni faaosoosoga iina e faaosooso ai oe.

O le meaalofa o le Agaga Paia e fesoasoani tatou te iloa ai le eseesega i le va o le lelei ma le leaga ma fesoasoani ia tatou iloa le taimi e tofotofoina ai i tatou. E tatau ona tatou manatua o faaosoosoga o suega e fesoasoani tatou te iloa ai taimi tatou te faia ai mea sa’o ma taimi tatou te le faia ai mea sa’o; ma e tatau ona tatou iloa afai tatou te mulimuli i le Alii, Na te le faatagaina i tatou ina ia faaosoosoina e sili atu nai lo le mea e mafai ona tatou teteeina (tagai i le 1 Korinito 10:13). O taimi uma tatou te filifili ai pe filifili le auala sa’o nai lo o le auala sese.

Ou te manatu e taua lo’u mafaufau mamao e uiga i i filifiliga o le a ma faafeagai. Sa faafuasei ona ou feagai ma se tulaga faigata, ma o le taunuuga na lelei aua na uma lava ona fai la’u faaiuga o le a ou le toe aluese mai o’u tulaga faatonuina. E ui lava o nisi taimi ou te le to’alelei ai, ae e faataitai ona faatino e lo’u aiga se tulaga ina ia ou iloa ai le mea e tautala atu ai pe fai pe a feagai ma faaosoosoga.

O le i ai o ni uo lelei e filifilia le mea sa’o, o se mea lea e mafai ona e faia e tetee atu ai i faaosoosoga. Latou te faia ni faataitaiga lelei. E mafai ona e valaau atu ia i latou pe afai ua faaosoosoina oe. O le a latou fesoasoani e te filifili le mea sa’o. O uo lelei e mafai ona faamanatu atu ia te oe ia tatalo, faitau i tusitusiga paia, ma usiusitai.