Saunoa Atu Elder M. Russell Ballard i le Au Paia i Europa

O le faatuatua na faaalia e paionia Europa anamua ua manaomia i le taimi nei pe afai o le a faaalualuina i luma e le Au Paia o Aso e Gata Ai le Ekalesia ma le malo o le Atua, na saunoa i ai Elder M. Russell Ballard o le Korama a Aposetolo e Toasefululua i le taimi o se faasalalauga na tuuina atu i tagata o le Ekalesia i Suetena, Tenimaka, Finelani, ma Nouei.

“O le a le tulaga o le a i ai Le Ekalesia a Iesu Keriso o le Au Paia o Aso e Gata Ai i le 20 tausaga o i le lumanai i totonu o outou atunuu?” Na saunoa Elder Ballard. “O le a faafefea ona tatou tali atu i tagata Scandinavian anamua a le Ekalesia pe afai e le mafai ona tatou lipoti atu o lo tatou faatuatua, lototoa, amioga na tutusa ma i latou, ma sa tatou faia ni taumafaiga sili atu e faamalosia ai le Ekalesia i uarota, paranesi, siteki, ma itu uma?”

O le faasalalauga o se tasi o vaega o le asiasiga talu ai a Elder Ballard i Stockholm, Suetena; Lonetona, Egelani; ma Paris, Farani.

Na feiloai atu Elder Ballard ma faifeautalai o loo faamisiona i Suetena ma saunoa atu i talavou matutua nofofua i Stockholm. O lena sauniga na faasalalauina atu i faletapuai e 402 i le Atu Europa. Sa ia saunoa atu e uiga i le taua o le faaipoipoga ma faamamafaina atu ai o filifiliga o loo faia e talavou matutua e uiga i le ola i mataupu faavae o le talalelei o le a fuafua ai le lumanai o le Ekalesia. Sa ia luiina i latou taitoatasi ina ia oo atu i le faaiuga o le tausaga ua latou aumaia se tagata se toatasi i le Ekalesia po o le toe faamalosia mai o se tagata i le Lotu.

Na saunoa atu foi Elder Ballard i tagata o le Ekalesia i le konafesi a atunuu i matusisifo Europa lea na faasalalauina i faletapuai uma i Suetena, Tenimaka, Finelani, ma Nouei. O le aofai o tagata auai a le Ekalesia i atunuu i matusisifo Europa e silia ma le 23,000 tagata i aulotu e 123.

I Lonetona, Egelani, na fono faatasi ai Elder Ballard ma Elder José Teixeira, Peresitene o le Eria o Europa ma faifeautalai o loo faamisiona i Misiona a Lonetona ma Lonetona i Saute. Na faalogologo ia le fia selau o faifeautalai i le molimau a Elder Ballard ma lagona lona naunautaiga mo le galuega faafaifeautalai.

I Farani na fono faatasi ia Elder Ballard ma faifeautalai i Versailles. Sa ia asia foi le nofoaga o le a fausia ai le Malumalu o Paris Farani i le lumanai, lea na faalauiloa i le konafesi aoao ia Oketopa 2011.