O Lo’u Uso o le Faifeautalai

O lo matou aiga—o’u matua, lo’u uso, ma a’u—na sauni mo se taimi uma ina ia mafai ona alu lo’u uso i se misiona. Soo se taimi lava matou te talanoa ai e uiga ia te ia i le avea ma se faifeautalai, ou te tausua ia te ia, ma fai atu o le a ou le misia o ia ma o le a ou fiafia i le tuua na o a’u.

Na iu ina oo mai le aso e auina atu ai i totonu ana pepa o le misiona. Sa taumafai o ia ia lelei i le aoga, ma sa matou galulue malosi uma e sefe ni tupe mo lana misiona.

I se tasi aso na valaau mai ai le peresitene o le siteki ma fai mai ua taunuu mai le valaauga. Sa filifili lo’u uso e tatala le tusi i le fale pe a uma le taumafataga i le afiafi. Sa valaauina o ia e auauna atu i le Misiona a le Aai o Mekisiko i Sasae.

E lei leva lena, ae matou momoliina o ia i le malae vaalele ma faatofa i ai. A o matou o atu i le fale, sa le mafai e lo’u tina ona taofiofi ona loimata, ae sa ou le tagi. Ae i le na o le lua itula mulimuli ane, a o o’u i ai i totonu o le potu sa masani ona ma toalua ai ma lo’u uso, sa faafuasei ona ou iloaina o le a ou le toe vaai ia te ia mo se taimi umi. Ia o a’u la le tagata sa le mafai ona taofiofi o’u loimata, ma sa ou faatagaina a’u lava e tagi ma tagi pea. Sa fusi ma faamafanafana a’u e o’u matua, ma sa matou lagonaina uma le olioli tele ma le faanoanoa tele i le taimi lava lea e tasi.

Talu mai lena aso, ou te tatalo lava i le Tama Faalelagi ma ole atu ia te Ia e tausi loʼu uso a o auauna atu o ia.

Sa aoaoina au e lo’u uso, e tatau foi ona ou saunia mo se misiona. E tatau ona ou agavaa e maua le perisitua, auai i le seminare, ma ausia sini i le Faataunuuina o Lo’u Tiute i le Atua. Sa ia aoaoina a’u e galue ma sefe se tupe, faitau i tusitusiga paia, ma usitai i o’u taitai.

Ou te fia auauna atu foi i se misiona ina ia mafai e isi tagata ona maua faamanuiaga o le talalelei ma iloa e moni.