Mo Le Malosi o le Autalavou
O Le Vaaiga mai le Faaiuga o le Auala
O le savali mai le faaiuga o le auala e manino: “E mafai ona e faia lenei mea. Ma pe a e faia, o le a sili atu ona lelei mea uma.”
Ata na tusia e Greg Newbold
“O le a ou le faagaloina lava oe, epikopo. Na e laveaia lo’u ola.”
O le tagata na faia lena faamatalaga i le taimi nei sa le’i faapena ona lagona i le amataga. I le avea ai ma se talavou sa fefe o ia. Sa ia iloa e tatau ona salamo. Sa avea a’u ma ona epikopo i le taimi lena, ma sa ia iloa sa manaomia ona ma talanoa. Ae sa tumu o ia i le masalosalo.
“O le a se manatu o le epikopo ia te a’u?”
“Mata o le a ia tausisia le le faalauaiteleina?”
“E mafai faapefea ona ou toe tilotilo ia te ia?”
O popolega faapena e mafai ona lagona ai le lofituina, ma e pei a toetoe ina le mafai ai ona maua le lototele e manaomia e uia ai le ala i le salamo.
Vaavaai Atu i Ala
Ae sei o tatou vaai atu i lena auala. O nisi vaega o le salamo e sili atu ona faigofie nai lo isi. O le tasi laasaga o le iloa lea. E masani lava ona tatou iloa pe a tatou faia se mea sese; e fesoasoani le Agaga Paia ia tatou lagona lena mea. E tatau ona tatou sui, ma o le naunautaiga e sui e masani lava ona malosi.
Ona faasolo faigata ai lea o laasaga. Na fetalai mai le Alii e tatau ona tatou ta’uta’u atu ma lafoai. E foliga mai e faigofie atu le ta’uta’u atu i le Tama Faalelagi i a tatou tatalo. E mafai ona tatou faasa’oina le tele o agasala i lenei auala, saili le faamagaloga, toe totogi, ma faaleleia atili amioga seia oo ina faamautu mai e le Agaga ua tatou faia mea uma tatou te mafaia.
Ae o nisi o faailoaga e manaomia ai ona e talanoa atu i lou epikopo po o le peresitene o le paranesi. Ma o le tulaga lena na i ai lenei alii talavou. Sa ia manaomia se fesoasoani sili atu nai lo lona lava malosi, ma sa manaomia ona ia iloa e mafai ona ia faia le malaga.
Faamoemoe i le Auala Televave
O i latou o e sa malaga i le ala o le salamo o le a latou ta’u atu ia te oe, e le gata o le malaga e mafai ona fai ae afai e te oo atu iina ma toe tepa i tua, o le mea lenei o le a e vaaia:
E mafai ona e faia lena mea. Ma a e faia, o le a lelei mea uma.
Ua poloaiina i tatou e le Alii ia tatou salamo ona e alofa o Ia ia i tatou. E ala i Lana Togiola, na Ia totogiina ai le tau mo a tatou agasala, ma ua Ia silafia ai o le salamo e faasalotoina ai i tatou. O le a Ia faamalosia soo se tasi e liliu atu ia te Ia. Na aoao mai Alema, ina ia faaaoga le Togiola, e tatau ona tatou salamo—i tatou uma taitoatasi (tagai i le Alema 5:33–34). O le auala atonu e faigata, ae o le a outou uia faatasi ma se epikopo lena auala. O loo i ai le fesoasoani i le ala.
O le taimi lava e te amata ai, o le a e lagona le matuu atu [o se avega].
Liliu atu i lou epikopo. O le a e maua ai se tagata e alofa ma faaaloalo ia te oe. E matuā loloto le faatuatuaga e mafai ona e atiina ae ma lou epikopo. O le a tumau e faavavau, ma o le a fesoasoani e te lagona ai le saogalemu i isi epikopo i le lumanai. O le a tuuina atu ia te oe se vaaiga ese i ou faigata. I lona atamai ma le poto masani, ma musumusuga mai le Alii, o le a faapaleni ai e le epikopo mo oe se mea sa e manatu o le mutaaga lea o le lalolagi ae atonu ua na o se patu lava i le ala.
O le a fesoasoani o Ia ia e malamalama moni o le Faaola o le Malamalama o le Lalolagi. O lou faaaogaina o le Togiola, o le a susulu ai lou olaga, o le a manuia ai lou lumanai, ma o le a e malamalama ai o le maua o le faatuatua i le Alii o Iesu Keriso o se tasi lea o faamoemoega sili o le sau e nofo i le lalolagi.
O le a fesoasoani atu lou epikopo ia te oe i le gasologa o lenei mea. O le a e alofa ia te ia ma e le galo lava o ia.
Ou te matua talitonu o tagata e fesoasoani atu ia te oe i taimi o ou faigata e pipii i lou loto. O le a la le tele, o le pipii o se epikopo ia te oe, pe a fesoasoani atu o ia i se faigata faaleagaga? E mafai ona faalauteleina e le Alii le agalelei o le epikopo ma lona gafatia e taiala ai oe. O lou epikopo o le a avea ma au uo e faavavau.
Ma mo outou alii talavou o le a i ai se aso e avea ai outou lava ma epikopo po o peresitene o siteki, o ou aafiaga ma lou epikopo o le a aoao ai oe mo lena taimi pe a e i ai i le isi itu o le laulau.
Sei ou faaiu atu i le faamatala teisi atu e uiga i le ma feiloaiga ma lena alii talavou. “Epikopo,” na ia fai mai ai, “o le a e inoino ia te a’u mo le mea o le a ou ta’u atu ia te oe. O le a le mafai ona e toe vaai mai ia te au, ma afai e te faamatala atu i se tagata le mea o le a ou tauina atu, o le a ou pule i lo’u ola.”
Sa ou fai atu, “ou te folafola atu o le a ou le faalataina lava lou talitonuina [o a’u]. O le a ou alu ifo lava ma a’u i le tuugamau.”
Sa ia ta’u mai ia te au e uiga i nisi o tulaga laiti ma tilotilo mai mo sa’u tali. Ina ua ou fai atu, “ou te iloa le mea o loo feagai ma oe. E mafai ona ou fesoasoani atu ia te oe, “na ia faaauau malie seia oo ina taunuu atu i le mea moni sa ia manao e talanoaina. Sa ou faamanatu pea lava pea ia te ia sa ou faamemelo ia te ia mo le ta’uta’u mai ma le manao e sui. E ui lava ina sa foliga mai na sauni o ia e tamoe ese i soo se taimi lava, ae na ma galulue faatasi lava ina ia ma’ea le mea sa manaomia ona ia faasoa mai.
Pe sa o se mea telē ea? Sa telē ia te ia. Ae a o ma talanoa, na oo ina malamalama atili o ia i le alofa mutimutivale ua ofoina mai e le Alii ia i latou e salamo faamaoni. Ina ua mavae lena asiasiga muamua, sa ma galulue faatasi, ma i le aluga o taimi sa oo ina atoatoa ai lona salamo. O aso nei e valaau mai pea o ia e faamālō mai, ma o a ma’ua talanoaga e fiafia.
Sa faamanuiaina a’u e fesoasoani atu ia te ia ia iloa tatou te faalagolago uma i le Togiola. Ma e tuufaatasi o ma’ua lea i le viia o Iesu Keriso, o lē na laveaiina moni lona ola.