O Mai, Tatou Vivii ia te Ia
Mai se lauga, “Ua Fanau Mai Se Tamaitiiti,” na tuuina atu i le aso 9 o Tesema, 2008, i le Iunivesite o Polika Iaga. Mo le tusiga atoa i le gagana Peretania, asiasi i le speeches.byu.edu.
Soo se mea e fusia faatasi ai i tatou— agasala, tulaga, po o mea na tutupu i taimi ua tuanai—ua oo mai le Alii o Iesu Keriso, le Emanuelu silisili, e faasaoloto ia i tatou.
E silia ma le 700 tausaga a o lei oo i le soifua mai o Iesu Keriso, sa vavalo ai Isaia ia te Ia i upu na faamamaluina ai i le galuega faamusika a George Frideric Handel o le The Messiah: “Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili ese, o le Faipule, o le Atua malosi, o le Tama o le faavavau, o le Alii o le Filemu” (Isaia 9:6).
O le fatuga a Handel o le Messiah ua faaalia ai i se faaaliga matagofie faamusika le apoapoaiga lenei, e faavae i le Isaia 40:9: “O oe le au mai le tala lelei ia Siona, … Ia matua leotele, o oe le au mai le tala lelei ia Ierusalema; ia leo tele, aua le fefe; fai atu i le aai o Iuta, Faauta i lo outou Atua!”1
Faauta i lo outou Atua, na soifua mai o se pepe i Peteleema na aui i ie. Faauta i lou Atua, na soifua mai i le mativa ma le faatauvaa ina ia mafai ona Ia femaliua’i i totonu o tagata masani o se tagata le taualoa. Faauta o lo outou Atua, o le Togiola lava e le i’u ma faavavau, ua faaofuina i le tino ma afio mai e soifua i le lalolagi lava lea na Ia foafoaina.
Tatou toe tepa atu i lena uluai Kerisimasi paia i Peteleema e mafaufau i le soifua mai o lo tatou Alii. Na afio mai o Ia i le taaligoligoa o le po, i le ogatotonu o taimi, o Ia o Emanuelu (tagai i le Isaia 7:14), o le Pogai o Iese (tagai i le Isaia 11:1), o le Totogo a’e o le Aso Fou (tagai i le Luka 1:78), o le Alii Silisili Ese (tagai i le 2 Korinito 6:18). O lona soifua mai na faailoga ai le asiasiga folafolaina a le Foafoa o le lalolagi, o le faamaualalo o le Atua i le tagata (tagai i le 1 Nifae 11:16–27). E pei ona tusia e Isaia e uiga i le mea na tupu, “O le nuu sa savavali i le pouliuli ua latou iloa le malamalama tele: o e sa nonofo i le nuu o le ata o le oti, ua pupula mai ia te i latou le malamalama” (Isaia 9:2).
Ua tatou iloa mai faaaliga o onaponei, na afio mai lē na muai faauuina o le Tupu o Isaraelu i le lalolagi i le vaitau o le tautotogo (tagai i le MF&F 20:1). Na valoia e Mika o le a soifua mai o Ia i Peteleema—“e itiiti oe i le afe o Iuta” (Mika 5:2). O le afioaga na Ia soifua mai ai o loo taoto i le ataata o Ierusalema malosi, lea e lima maila (8 km) i le itu i matu. O Ierusalem o le laumua o Iutaia, o le aai sa i ai le malumalu ma le malosiaga o Roma. O Peteleema, e ese ai, o se taulaga maotua e atinae ai laautotō ma tausi ai lafumanu. Ona pau lava le itu na lauiloa ai ona o le nuu na fanau ai Tavita, le tupu anamua o Isaraelu e ala mai i lona gafa o le a soifua mai ai Keriso; o le mea lea, o le nuu laitiiti sa masani ona ta’ua o le Aai o Tavita. O lona igoa faaEperu, Beth Lechem, o lona uiga o le “fale o areto,”2 se igoa sa leai se taua faapitoa seia oo ina soifua mai Le o le a ta’ua o le Areto o le Ola.
O laufanua e siomia ai Peteleema na avea ma nofoaga o le tele o lafu mamoe, ma o le amataga o le tautotogo o le vaitau masani lea o le fananau mai [o tamai mamoe]. O le tele o po e feala ai lava leoleo mamoe, e vaai a latou mamoe i lalo ifo o le lagi lagilelei; o lea, o agelu sa faalauiloaina le fanau mai o le Faaola, sa le manaomia ona latou tau fafagua i latou.
O Le Tamai Mamoe a le Atua
O le tamaitiiti na taunuu mai i le vaitau o le fananau mai na lauiloa “O Le Tamai Mamoe a le Atua” (Ioane 1:29; 1 Nifae 11:31; MF&F 88:106). O se faalupega e loloto lona taua, aua na taunuu mai o Ia faatasi ma tamai mamoe ma o le a i ai se aso e “taitaiina ia fasia, e pei o le mamoe” (Isaia 53:7). Ae o le taimi lava foi lea, o Ia foi o le Leoleo Mamoe Lelei (tagai i le Ioane 10:11), o lē e popole mo tamai mamoe. O lea la, o nei faatusa e lua o Lona soifuaga ua faatusa ia i latou o e faia auaunaga ma i latou o e tuuina atu i ai auaunaga. O se mea talafeagai le faataunuu e Keriso o matafaioi uma e lua, aua i le olaga na Ia “afio ifo o ia i lalo o mea uma” (MF&F 88:6), ma i le faavavau na Ia “afio ae i luga” ma o loo i totonu ma i ai e ala atu ma ua “faataamilo i mea uma” (MF&F 88:6, 41). Sa Ia silafia le olaga mai itu uma ma vaaiga uma, i luga ma lalo. O Ia o lē sili na faia o Ia lava e aupito faatauvaa—o le Leoleo Mamoe Faalelagi na avea ma Tamai Mamoe.
O Lona afio mai sa sili atu nai lo na o le fanau mai o se perofeta maoae, o le oo mai o se suli na folafola mai i le nofoalii mamalu, po o le taunuu mai foi o le tagata e toatasi ua atoatoa o le a feafioai i le lalolagi. O le afio mai o le Atua o le lagi “e feafioai i luga o lona tuuvae ma avea e toetoe lava a pei o le tagata.”3
O Iesu Keriso o le Foafoa o le lalolagi ma o le Ieova Silisili o le Feagaiga Tuai. O Lona siufofoga lea na faalogoina i luga o Mauga o Sinai, o Lona mana na puipuia ai Isaraelu filifilia i ana feoaiga, ma o Lona afioaga na faaalia mai ia Enoka, Isaia, ma perofeta uma le mamalu o mea e oo mai. Ma o iina ua ai taoto le vavega aupito maoae o le Fanau Mai o Iesu: ina ua uluai faaali mai e le Atua ma le Foafoa o le lagi ma le lalolagi o Ia lava o le tagata i le lalolagi, sa Ia filifili e faia lena mea i le avea ai ma se tama meamea—vāivai ma ia tausia.
Sa ta’ua e faapea o se aganuu faa Eperu anamua, o le a fanau mai le Mesia i le Paseka. Ua tatou iloa sa pau moni lena Aperila i le ogatotonu o taimi i le vaiaso o le tausamaaga o le Paseka—o lena faamanatuga paia e tagata Iutaia o le laveaiga o Isaraelu mai le agelu o le faafanoga lea na aumaia ai le oti i atalii ulumatua o Aikupito. Na faasaoina ai aiga taitasi o Isaraelu na ositaulagaina se tamai mamoe ma olo lona toto i luga o pou laupapa o faitotoa o o latou fale (tagai i le Esoto 12:3–30). I le tolusefulu-tolu tausaga ina ua mavae le soifua mai o le Keriso i le Paseka, sa pisia i Lona toto luga o pou laupapa o se satauro ina ia laveai ai Lona nuu mai agelu o le faafanoga o le oti ma le agasala.
O le taumafataga o le Paseka atonu o le mafuaaga lea na leai ai se potu i le faletalimalo mo Maria ma Iosefa. O le faitauaofai o tagata Ierusalema sa fiasefulu afe le toatele i le taimi o le Paseka, na faapea ona faamalosia ai tagata malaga e saili ni nofoaga e faamautu ai i taulaga taulalata ane. Sa o atu Maria ma Iosefa i Peteleema, i le aiga o tuaa o Iosefa, e faataunuu ai tulaga manaomia o se tusigaigoa aloaia na poloaiina e Kaisara Aokuso. O le tulaga manaomia o le tusigaigoa e faatagaina ai i latou ona o atu i Peteleema i soo se taimi o le tausaga, ae atonu sa latou filifilia le vaitau o le Paseka ona o le tulafono Faamose sa moomia ai ia oo atu alii uma i Ierusalema i le Paseka.4 Ona o Peteleema sa toeitiiti lava sosoo ma le Aai Paia, o lea sa mafai ai e le ulugalii mai Nasareta ona faia ni matafaioi se lua i le taimi e tasi.
E tele taimi na faapea ai o le pule o le faletalimalo sa fai si lauiloa i se mea faalelelei. Ae ona o le tumutumu o lena vaimea i le vaitaimi o le Paseka, e le mafai ai ona tatou tuuaia o ia i le leai o se potu e ofo atu i le ulugalii mai Nasareta. E ui o le toatele o tagata na malaga atu mo le Paseka sa tolauapi i fafo i le faitau afe o faleie na faatutu i laufanua na siomia ai Ierusalema, ae sa su’e e le faitauafe o isi ni malutaga i faletalimalo o le lotoifale. Sa le masalomia foi le tumu saisai o le faletalimalo o Peteleema, ma atonu o le ofoina atu e le pule o le faletalimalo o le fale o manu, o se faatinoga lea o le agalelei moni.
E tusa lava foi pe na maua e le ulugalii se avanoa i le faletalimalo, semanu la te nonofo foi i ni tulaga faatauvaa ma lē taualoa. O aso na, o se faletalimalo masani o se fale na fai i maa e i ai ni nai potu laiti, o ia potu e na o le tolu puipui, ae o le isi itu e taalaelae lava e iloa uma mai lava e tagata. Ae peitai, o le fale o manu, atonu o se lotoa e punipuni po o se āna papa amu, lea na tuu ai manu e ā mālō.5 E tusa a la po o totonu o le lotoa, āna, po o se isi malutaga, o le soifua mai o Keriso i le [nofoaga] o manu sa i ai se tulaga lelei manino e tasi nai lo o potu tumutumu o se faletalimalo: na lelei iinei ona e filemu ma na o i la’ua. I lenei la tulaga, o le ofoina atu o le fale o manu sa o se faamanuiaga, na mafai ai ona faataunuu le fanau mai e aupito sili ona paia i le talafaasolopito o tagata, ma le migao ma le le faalavelaveina.
Saolotoga i le Tafeaga
I le fitu selau tausaga a o le’i oo i lena uluai Kerisimasi, na tusia ai e le perofeta o Isaia se valoaga faamesia lea na fofogaina mulimuli ane e le Faaola i Ona uso a tagata i le nuu o Nasareta: “Ua i o’u luga le Agaga o le Alii o Ieova; aua ua faauuina a’u e Ieova e talai le tala lelei i e ua tigaina, ua ia auina mai a’u e fufusi i e loto momomo, e talai le saolotoga i le tafeaga, ma le matua tatalaina o e ua fusifusia” (Isaia 61:1; tagai foi i le Luka 4:18–19).
A tatou faitau i le misiona a Keriso o le, ia folafola atu le saolotoga i le tafeaga, ma tatala le falepuipui ia i latou o loo saisaitia, atonu tatou te mafaufau muamua lava i Lana galuega i le lalolagi o agaga i e ua maliliu. Peitai o i tatou uma ua faatagataotaua—faatagataotaua i le pala ma vaivaiga o tino faaletino ma oo i faaosoosoga o le tino, i ma’i, ma iu lava, i le oti—ma tatou te manaomia uma le faasaolotoina.
Soo se mea e saisaitia ai i tatou—agasala, tulaga, po o mea na tutupu i taimi ua tuanai—na afio mai le Alii o Iesu Keriso, le Emanuelu silisili, e faasaoloto i tatou. Ua Ia folafola mai le saolotoga i e faatagaotauaina ma le saolotoga mai noataga o le oti ma le falepuipui o le agasala, valea, faamaualuga, ma mea sese. Na valoia o le a Ia fetalai atu i e saisaitia, “O mai ia i fafo” (Isaia 49:9). Na pau lava le tulaga o lo tatou saolotoga o le tatou o atu ia te Ia ma loto momomo ma agaga salamo, salamo, ma saili e fai Lona finagalo.
E tusa o le 30 tausaga ua mavae sa ou feiloai ai i se tagata o le a ou ta’ua o Tomasi. Pe a ma le 45 tausaga o lona matua na ou feiloai ai ia te ia. O le luasefulu tausaga na muamua atu na auai ai ona matua i le Ekalesia. Sa leai se fiafia o Tomasi i le tapuaiga fou a ona matua. Ae sa alofaina o ia e ona matua, ma sa la’ua teufatuina le faamoemoe e i ai se aso e mafai ai ona aumai lo la atalii ia iloa le moni o le talalelei toefuataiina. A o gasolo pea tausaga, sa la’ua taumafai i le tele o taimi e faatauanau o ia ia tau lava ina feiloai atu i faifeautalai ma faalogo i la latou savali. Sa ia teena pea lava pea, ma sa ia ulagia ona matua ona o le la’ua faatuatuaga faalelotu.
I se tasi aso sa fai atu ai lona tina ma le augani malosi, “Tomasi, afai e te faalogo i lesona a faifeautalai i se taimi se tasi lava, o le a ou le toe talanoa atu lava ia te oe e uiga i le Ekalesia. Sa manatu Tomasi o se fetuunaiga lelei lea ma malie loa e feiloai i faifeautalai. I taimi o lesona muamua e tolu, sa na o lona saofai lava iina ma le tumu i le faamaualuga, na i ai taimi na ula ai i mea na aoao atu e alii faifeautalai.
I le taimi o le lesona lona fa, e uiga i le Togiola a Iesu Keriso ma uluai mataupu faavae o le talalelei, sa le’i tautala Tomasi ae na ese lava lona filemu ma faalogologo toto’a. I le faaiuga o le lesona, sa tuuina atu e alii faifeautalai a la’ua molimau e uiga i le Faaola. Ona musuia lea o se tasi o faifeautalai e susu’e lana Tusi Paia ma faitau i upu nei:
“Ia outou o mai ia te a’u, o outou uma o e tigaina ma mafatia i avega, o a’u foi e malolo ai outou.
Ia outou amoina la’u amo, ma ia outou faaaoao ia te a’u; aua o a’u le agamalu ma le loto maulalo: ona maua lea e outou o le malologa mo outou agaga” (Mataio 11:28–29).
E aunoa ma se lapataiga, sa matuai maligi loimata o Tomasi. “O e taumafai e ta’u mai e mafai e Keriso ona faamagalo a’u i a’u agasala?” na ia fesili ai. “Sa ou ola i se olaga faaletonu. O loo tulituli a’u i le manatuaina o au agasala. Ou te faia soo se mea ia saoloto ai i le tausalaina o loo o’u lagonaina.”
O lona faamaualuga na avea ma se faafoliga na natia ai se agaga ua pologa i le agasala ma le tausalaina. Na faamautinoa atu e alii faifeautalai ia Tomasi o le a faamagaloina o ia e Keriso ma faasaoloto ia te ia mai le avega o le tausalaina pe afai o le a salamo ma papatisoina ma faamauina. Ona la molimau atu lea e uiga i le mana o le Togiola. Mai lena lava taimi, na suia ai mea uma i le olaga o Tomasi. Sa tele mea e salamo ai ma faatoilalo, ae e ala i faamanuiaga a le Alii, na agavaa ai o ia mo le papatisoga.
O le 20 ma ona tupu tausaga mulimuli ane, a o ou saofai i le falesa o le Malumalu o Frankfurt Siamani, sa faliu mai se tamalii lauulu sinasina ia te a’u ma faapea mai, “Pe le o oe ea o Elder Porter?” I lo’u fiafia tele, na ou matauina ai Tomasi—o se tagata ua faasaolotoina mai i le nofopologa e le mana o Iesu Keriso ma o loo faamaoni pea i le Ekalesia a le Alii.
Atonu i lenei vaitau o le Kerisimasi, ia taitoatasi i tatou ma o atu ma le faamaualalo i lo tatou Tama oi le Lagi i le tatalo, ma ole atu mo le mana o Lona Alo Pele ia faatasi ma i tatou i la tatou savaliga i aso taitasi, ma ia faasaolotoina i tatou mai o tatou tulaga patino o le faatagataotauaina, tele pe laitiiti.
Le Po Paia
Ia Tesema 1987, pe tusa toe lua vaiaso oo i le Kerisimasi, sa ou faimalaga atu i Isaraelu i se pisinisi. Ae paga lea, sa le o se taimi toafilemu lea i le Nuu Paia. Sa i ai feteenaiga i le Faletupe i Sisifo, na tuufua alatetele o Ierusalema Tuai, ma sa punitū uma faleoloa. Na i ai lagona le fiafia i tulaga faaupufai, ma le mea na atili ai ona leaga, ona sa toeitiiti atoa le vaiaso o mauluulu le timu malulu. O le fefefe i fetauaiga, na aloalomamao ai le toatele o turisi mai le eria. Ae a o ou savalivali solo i Ierusalema, sa tumu lo’u loto i le toafilemu i le iloa o le aai lenei na alofaina tele e le Togiola.
Sa ou toe foi mai i le Iunaite Setete i le leva o le afiafi o le aso Faraile ao lumanai le Kerisimasi. Ina ua tafa ata o le Sapati i le lua o aso mulimuli ane, na fafagu a’u e le faailo o la’u uati i le musika “Le Po Paia”:
Le Tupu o tupu ua taoto i le faatanoa vao faatauvaa,
I o tatou tofotofoga uma na soifua mai ai e avea ma a tatou uo.6
O le musika ma savali na o’u ootia loloto ai, ma na maligi o’u loimata a o ou mafaufau i le taulaga mamalu ma le soifuaga atoatoa o le Faaola o Isaraelu—o Lē na soifua mai e avea ma uo o ē lotomaualalo ma le faamoemoe o ē agamalu. Sa ou mafaufau i lo’u aafiaga i Ierusalema, ma sa lofia lo’u tagata atoa i le alofa ia te Ia o lē na afio mai i le lalolagi ma ave i Ona lava luga avega a i tatou uma. Sa lofituina a’u i le mafaufau e faapea, atonu Na te manatu ia te a’u o se uo. E le’i galo lava ia te a’u lagona faamemelo o lena taeao po o le Aso Sa, sa faapea ona pei o se molimau mama e pei ona sa ou mauaina.
Ou te tuuina atu la’u molimau i le Faaola o le lalolagi. Ou te iloa o loo soifua o Ia. Ou te iloa na muai faauuina o Ia a o le’i Foafoaina le lalolagi e folafola atu le saolotoga i e faatagataotauaina. O Lona soifua mai ma [Lona] soifuaga ou te faapea atu ai, “Oi, o mai, tatou vivii ia te ia.”7