Mai le Mzungu i le Uo
O se gaoioiga faatauvaa o le auauna atu mai se faifeau faamisiona matua na tuua ai se uunaiga malosi tumau.
O se mzungu i luga o se laau? O le a le mea a se mzungu e fai i luga o se laau? Ae o le a lenei meafaigaluega sa ia faaaogaina e tatipi vave ai lālā?
O fesili faapena na tuufesili ai mafaufau o tagata Uganda a o matamata atu i se tagata ese (mzungu) o faaaogaina se ililaau e ola i le ma’a e tatipi ai lala mamago o se laau paolo tele. O le meafaigaluega lava ia na maofa ai tagata o le nuu. O le toatele o i latou e le’i vaai muamua lava i se mea faapea.
Ae o le mea na sili atu ona latou maofa ai o le mzungu lava ia. Sa teu e Elder Roland Harris, o se faifeau faamisiona matua mai Iuta, ISA, ia lea lala ma lea lala, ma tatipiese lala mamago mai vaega maualuluga o le laau. Sa maofa tagata sa i lalo ona o le faia e se tagata ese o se mea faapea mo se tasi o i latou.
I le iuga, o le gaoioiga faatauvaa a Elder Harisi o le auauna atu, o le a faailoga ai le amataga o se faigauo ma se tasi sa le manao e fesootai ma le Ekalesia po o soo se tasi e auai ai.
O Le Masani ia Godfrey
O Elder Roland Harris ma Sister Janet Harris na tautua i se misiona e 23 masina i le Misiona a Uganda Kampala. O Sister Harris, o se tausimai pasi, sa valaauina e avea ma faufautua faafomai i faifeautalai. O Elder Harris, o se taitai kamuta ua litaea e mafai ona ia toe faaleleia soo se mea lava i le atulaulau, sa na vaaia fale o le Ekalesia ma taavale a le misiona.
E lei leva ona taunuu atu i Uganda, ae faafaigaluega e Elder ma Sister Harris se tagata o le Ekalesia i le lotoifale o Maria, e fesoasoani i le faamamaina o lo la’ua fale.
O Maria na papatisoina i le tolu tausaga na muamua atu. “Sa oo ina ma alolofa ia te ia,” o le tala lea a Sister Harris. “Sa fesoasoani o ia aoao i ma’ua i ala o Uganda.”
O le tele lava o le la iloa o Maria, o le tele foi lena o le loloto o le latou faauoga. Sa vave ona la iloa e uiga i lona toalua o Godfrey—o se tagata lelei sa taumamao pea mai tagata o le Ekalesia, ae maise lava o faifeautalai. “Sa ia le faatagaina faifeautalai i lona fale,” o le faamatala mai lea a Sister Harris. Ae peitai, sa manao pea Maria ia feiloai Godfrey ia i latou.
Sa ia valaaulia le au Harris mo se asiasiga puupuu. “Sa leai se mea na la faamoemoeina,” na faamalamalama mai ai Sister Harris. “Sa ma ta’u atu ia Godfrey o Maria ua avea nei ma a ma’ua uo pele, ma ma te mananao e iloa lona aiga.” Sa latou talanoa ma Godfrey, ae sa le’i manao tele i le manatu o le faamasani atili ia i la’ua nai lo na o ni tagata e iloa.
O na mea uma na suia i le aso na tu atu ai Elder Harris ma meafaigaluega e ola i le paoa, se apefai, ma ofo atu e auauna atu.
Faaiuga Tonu
O le fale o Godfrey ma Maria sa si’o e laau paolo maualuluga na tumu i lala pepē ma laa ua maualuluga tele na falala atu i se tulaga e lamatia ai luga o le tumutumu o le latou fale.
O le taimi lava lena na galue ai loa Elder Harris. Sa ia faaaluina le fa itula i luga o laau i le tatipiina o lala lapopoa e oo i le 10 inisi (25 cm) le tetelē. Na mautinoa lava ua leva na tatau ona fai le galuega. “Sa le itiiti ifo ma le 20 futu (6 m) lo’u mamao mai le eleele,” o le tala lea a Elder Harris. A o savavali ane tagata, sa tau le talitonu i le mea na vaai i ai.
Sa faapena foi le te’i o Godfrey. “Sa ia faafetai ma saga faafetai mai ia i ma’ua,” o le tala lea a Sister Harris. E oo lava foi i gaoioiga faatauvaa e pei o le faagataina o laau e mafai ona i ai ni tulaga lamatia ogaoga. “E leai ni a latou tupe mo se vaaiga faafomai,” na faamalamalama mai ai Sister Harris. Mo se faataitaiga, afai e pau se tasi mai se laau ma gau ai le lima po o le vae, e masalo o le a tuu ai lava e toe manuia ai lava i latou ia.
O lena faaputuga tele o tipiga laau i luga o le eleele, na faataatia ai le faavae o se faauoga faapelepele. “Na amata mai i lena taimi ona sau i fafo Godfrey e faafeiloai i ma’ua,” o le tala lea a Elder Harris. Sa amata foi ona talia e Godfrey ma Maria isi tagata o le Ekalesia i lo latou fale.
Sopoia o le Naila
Sa atili ona latalata atu Elder ma Sister Harris ia Godfrey ma Maria a o faasolo pea masina. Mulimuli ane, o lenei faauoga na avea ma se malosiaga ma se fesoasoani mo le au Harris ina ua faafuasei ona la feagai ma se faalavelave i le ogatotonu o le la misiona. Sa la maua le tala ua maliu lo la atalii o Brad i se faalavelave tau taavale i auala tetele.
O le taimi lava na iloa ai e Maria ma Godfrey lenei mea, sa faamaulu loa o la lavalava sili ona lelei ma o atu loa i se malaga matautia ina ia i ai i tafatafa o o la’ua uo pele.
I Uganda, e toalaiti lava tagata e i ai ni taavale. A le o le savavali ia o le faaaoga o taavale laiti la’upasese. E mautinoa lava, o le taavale laititi la’upasese masani o se boda boda, o se uila afi e masani ona vaaia o aveina ni tagata e oo i le toaono i le taimi e tasi.
“I le pogisa, o le tietie i se boda boda e matautia,” na faamatala ai Sister Harris. “Sa la’ua laasia le naila i se boda boda i le pogisa.”
Ina ua uma ona malaga atu i auala matautia i le tuneva o le po ma na alu ai se la tupe tele, sa faapea ona tutū atu ai Godfrey ma Maria e “faanoanoa faatasi ma e e faanoanoa” ma “faamafanafana atu ia te i latou o e e manaomia le faamafanafanaga” (Mosaea 18:9). I lena afiafi, sa faapea ona toe faafoi moni mai ai galuega alofa ma le alofa. O Maria ma Godfrey o i la’ua ia na tuuina atu le auaunaga. “Sa o se mea ofoofogia,” o le tala lea a Sister Harris. Sa fautuaina mai e Maria, ia latou tootutuli faatasi i le tatalo. Sa auai Godfrey e aunoa ma le faatuai.
Na o atu Elder ma Sister Harris i Kalefonia, ISA, e auai i le falelauasiga o Brad. Mulimuli ane, sa la’ua toe foi atu i Uganda e faauma le la misiona. O lenei la ua toe foi atu i le fale i Iuta, ae o loo tumau pea le felata’i o Roland ma Janet Harris ma Maria ma Godfrey.
O le auauna atu o se ki lea e mafai ona tatalaina ai faitotoa na semanu e tapunia ia i tatou. Ua aoao mai Peresitene Thomas S. Monson, “A aveesea e auaunaga lē manatu faapito taumafaiga faapito, o le mana o le Atua e aumaia Ona faamoemoega” (“Naunau ma Agavaa e auauna Atu,” Liahona, Me 2012, 68).