O Le Folafolaga o le Kerisimasi

O le afio mai o Keriso na muai valoiaina mo le fia afe o tausaga. Pe tusa ma le 2,000 tausaga a o lei oo i le fanau mai o Iesu Keriso, na aoao mai ai Aperaamo e uiga i Lana matafaioi i le ata o le faaolataga. Pe tusa ma le 1,400 tausaga a o lei oo i Lona fanau mai, sa aoao mai ai e Mose ia lava upumoni matagofie e tasi. Pe tusa ma le 700 tausaga a o lei oo i Lona fanau mai, sa faaali mai ai e Isaia le tulaga o Lona fanau mai, soifuaga, ma le maliu:

“O le mea lea e tuuina mai ai e le Alii lava le faailoga ia te outou; Faauta, e to le taupou, ma fanau mai se tama tane; na te faaigoa foi ia te ia o Emanuelu” (Isaia 7:14).

“Aua ua fanau mai mo i tatou le tama, ua foaiina mai mo i tatou le atalii, e i lona ua le malo, e igoa foi o ia, o le Silisili Ese, o le Faipule, O le Atua malosi, O le Tama o le Faavavau, O le Alii o le Filemu” (Isaia 9:6).

“Ua inosia ma tuulafoaiina o Ia e tagata; o le tagata faanoanoa, ua masani foi ma le tiga. …

“E moni ua na tauave o tatou tiga, ma na tauave o tatou faanoanoa: a ua tatou manatu o ia ua taia, ua fasia e le Atua, ma ua faatigaina.

“A ua manua o ia ona o a tatou solitulafono, ua momomo o ia ona o a tatou amio leaga … o ona faalavalava foi ua malolo ai tatou. …

“… E pei o le tamai mamoe ua taitaiina ia fasia, e pei o le mamoe foi i luma o e sele lona fulufulu, ua faalologo ia, o ia foi ua le tautala mai.

“O le faasaua ma le faamasinoga na aveeseina ai o ia. …

“Na tofia o ia ia fai lona tuugamau faatasi ma e pagotata, a e peitai sa i le mauoa ina ua maliu; aua na le faia e ia se faasauaga, ua leai foi se pepelo i lona fofoga” (Isaia 53:3–5, 7–9).

E lei leva ona mavae le valoaga a Isaia, ae faia e le perofeta o Liae se miti o’oo’o ma aoao ai lona aiga i le mea sa ia aoaoina. Na faamaumauina e Nifae: “I le ono selau tausaga mai le taimi na tuua ai e loʼu tamā Ierusalema, o le a faatu mai ai e le Alii le Atua se perofeta i totonu o tagata Iutaia—o se Mesia lava, po o, i ni isi upu, o le Faaola o le lalolagi” (1 Nifae 10:4).

Na talanoa mai foi Liae e uiga i le toatele o perofeta o e na molimau mai e uiga i le afio mai o le Togiola o le lalolagi (tagai i le 1 Nifae 10:5).

O le Talalelei a Luka na faamaumauina ai faapea ao lei fanau mai le Faaola, na alu atu faanatinati Lona tina e asiasi i lona tausoga o Elisapeta.

“Ua faalogo mai Elisapeta i le alofa o Maria, ona osooso ai lea o le tama i lona manava, ua faatumuina foi Elisapeta i le Agaga Paia:

“Ua alaga ia, ua leotele, ua faapea mai, Amuia oe i fafine, amuia foi lē a fanau mai ia te oe” (Luka 1:41–42).

A o molimau mai le Agaga Paia ia Elisapeta, na Ia molimau mai ia i tatou ua faataunuuina ia upu a perofeta. Ua afio mai le Faaola ma faia le galuega na auina mai ai o Ia e Lona Tama e faataunuuina.

Na tusia e Nifae, e uiga i le Faaola:

“Ma sa ou vaai ma toe iloa atu le taupou, ua sapasapaia e ia se tamameamea i ona lima.

“Ma sa fetalai mai le agelu ia te au: Faauta i le Tamai Mamoe a le Atua, ioe, o le Alo lava o le Tama Faavavau!” (1 Nifae 11:20–21).

Ina ua 12 tausaga o le Faaola, sa Ia aoao atu i le malumalu. Na Ia faamatala atu i Ona matua popole sa i ai o Ia i le fale a Lona Tama (tagai i le Luka 2:42–49).

Na faataunuuina lena tulaga ao Ia faatunuuina Lana misiona faalelalolagi. Na faamatalaina e le Faaola le faatumutumuga o lena misiona i upu musuia nei:

“Na ou sau i ou lava tagata, ma sa le talia au e ou lava tagata. Ma ua faataunuuina ai tusitusiga paia e faatatau i lou sau.

Ma o le toatele o i latou o e ua latou talia au, o i latou ia ua ou tuu atu i ai ia avea ma atalii o le Atua; ma o le a faapea lava ona ou tuuina atu i le toatele o i latou o e e talitonu i lou igoa, aua faauta, o au e oo mai ai le togiola, ma o au ua faataunuuina ai le tulafono a Mose” (3 Nifae 9:16–17).

O Lana folafolaga e mafai ona avea i tatou ma Ona atalii ma afafine o le a faailoa mai a o tatou talitonu ia te Ia ma faatino le faatuatua ia te ia i le usiusitai. Ona tatou saunia lea mo le mauaina o le meaalofa o le ola e faavavau.

Na ia fetalai mai: “Faauta, o au o Le na saunia mai le faavaega o le lalolagi e togiola lou nuu. Faauta, o a’u o Iesu Keriso. … O a’u e maua ai e tagata uma le ola, ma e faavavau, ia i latou lava o e e talitonu i lo’u igoa, ma o le a avea i latou ma ou atalii ma ou afafine” (Eteru 3:14).

O le Kerisimasi o se vaitaimi o le fetufaai o a tatou meaalofa, o le faamalolosia o isi, ma le faia o la tatou vaega i le malo o le Atua. O le Kerisimasi o se taimi foi e faaali atu ai lo tatou alolofa i isi ma tuu atu ai a tatou molimau e uiga i le Faaola.

O se tasi o auala e mafai ona tatou faasoa atu ai a tatou molimau o le i ai lea o se vaaiga faafaatusa o le fanaua mai o Iesu i o tatou fale ina ia mafai ai ona tatou amatalia ni talanoaga e uiga i le fanau mai o le Alii. O le isi auala o le faamatala lea o tala e pei o John Weightman i le The Mansion.

O John Weightman o se tagata faamanuiaina ma o ana faalapotopotoga o galuega alofa na iloga ma tautaua ai o ia. I se tasi afiafi, ina ua uma ona iloiloina ni faaputuga o otiga nusipepa o loo viia ai o ia mo lona agalelei, sa ia siiina i luga lana Tusi Paia. E lei umi ae moe ina ua uma ona faitauina ia upu a le Faaola: “Aua tou te toloa’i oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu, ma gaoi ai” (Mataio 6:19).

A o moe o ia, na faapea ona oo ai Ioane i “le aai faalelagi,” o loo malaga atu ma isi ao latou taliaina a latou maota tetele. Ina ua tu le Leoleo o le Faitotoa i luma o se tamai fale e fausia i ni meafaufale na tiaiina, sa ia fai mai ia Ioane, “O lou maota lea.”

Na tetee atu Ioane, ma tolaulau atu le anoanoai o ana sao i tagata lautele.

“Pe lei faamaumauina uma ea nei galuega sa faia i le fogaeleele e faaopoopo ai i lou manuia?” na fesili atu ai le Leoleo o le Faitotoa. “Ua uma ona tauia ai oe. Pe o le a totogi faalua ea oe?”¹

I lenei vaitau o le Kerisimasi, ou te faamoemoe o le a tatou tofu maua uma se avanoa e foai atu ai ma le le faailoaina atu.

I vaiaso taitasi a o tatou auai i sauniga o le faamanatuga, tatou te faafouina le folafolaga o le soifua mai o le Faaola i o tatou lava olaga. Tatou te tauave Lona suafa i o tatou luga, ma tatou faafouina a tatou feagaiga o le usiusitai ma la tatou folafolaga ina ia tatou manatua pea o Ia.

O le talalelei, e pei ona tusia i le Mataupu Faavae ma Feagaiga, e faapenei:

“E faapea na afio mai o ia i le lalolagi, o Iesu lava, e faasatauroina mo le lalolagi, ma tauave agasala a le lalolagi, ma faapaia le lalolagi, ma faamamā mai amioletonu uma;

“Ina ia mafai ona faaolaina e ala ia te ia i latou uma” (MF&F 76:41–42).

Sei o tatou faaaogaina lenei taimi o le vaitau o le Kerisimasi e faafou ai a tatou feagaiga ina ia mulimuli i le Faaola ma fai Lona finagalo, e pei lava ona Ia faia le finagalo o lo tatou Tama Faalelagi. A tatou faia faapea, o le a faataunuuina ai mo i tatou i le taimi lenei ia upu o le nuu a le Tupu o Peniamina, na tusia i le 125 tausaga a o lei fanau mai le Faaola, e faapea: “E, ia alofa mutimutivale mai ia, ma faaaoga le toto togiola o Keriso ina ia mafai ai ona matou maua le faamagaloga o a matou agasala, ma mafai ona faamamaina o matou loto; ona ua matou talitonu ia Iesu Keriso, le Alo o le Atua, o le na foafoaina le lagi ma le fogaeleele, ma mea uma lava; o le o le a afio mai i lalo i totonu o le fanauga a tagata” (Mosaea 4:2).

Ou te molimau atu na afio mai le Faaola i le ogatotonu o taimi ma o le a Ia toe afio mai. Ou te molimau atu o Lana Ekalesia, na toefuatai mai i lenei tisipenisione mulimuli a o lei Afio Mai Faalua o Ia, o le “galuega ofoofogia ma le mea e ofo ai” (2 Nifae 25:17) lea o loo tatou galulue ai i le avea ai ma Au Paia o Aso e Gata Ai.