O Se Pese Kerisimasi e Sili ona Fiafia I Ai

Ata

Illustration of Christmas decorations.

Ata na tusia e Dan Burr

Ou te manatua o le pati Kerisimasi o lau uarota masani: o laulau na ufi i pepa vaivai lanumumu ma lanumeamata, o le taumafataga sa laulau i ipu pepa, fanau iti e taufetuli solo, ma le leo fiafia o tagata o le uarota o loo talanoa. Ae, sa mafai e se tagata ona faafilemu ma faamanuia le taumafataga, ona taumamafa loa lea o tagata uma. Na toeitiiti lava amata le polokalama.

Sa le o la’u uarota. Sa ma o ma la’u uo i le pati a lana uarota, o lea sa le toatele ni tagata na ou iloaina. Sa ma mananao ma te o ese vave, ae na tauanau i maua e lona tina ma te nonofo mo le polokalama.

O le pese muamua o le polokalama o tamaiti o le Peraimeri, o e na savali atu i luga o le tulaga ma ni pale ilaila auro i luga o latou ulu. Sa latou usuina se pese ona tautulei lea ma feātai a o o ese mai le tulaga, ma tuua ai se auala o mea ilaila auro a o savavali ese mai.

Ona ta lea e ni ta piano se toalua ni pese fiafia. O le ta piano muamua sa taina le, “Outou Faamaoni o Mai” (Viiga, nu. 114) e aunoa ma se nota e misi. O le isi, o se tama talavou, sa saofai i le piano ma tilotilo atu ma le faavauvau i luga a’e o lona tauau i lona tina, o lē na amata faitauina lemu le pāō. Sa mapuea le tamaitiiti, liliu atu i le mea fai musika, ma ta lana tāaga sili ona lelei o le “Up on the Housetop.”

O le isi vaega na sosoo ai o le polokalama, o se tasi o pese e sili ona ou fiafia i ai—“C-h-r-i-s-t-m-a-s [K-e-r-i-s-i-m-a-s-i].”

Sa ou ea a’e ma vaaia ai se uso e faano’uno’u ona tauau ma le lima e tasi na pipii atu i lona tino, sa savavali atu ma se laa faalēlelei e tu i autafa o le piano. Sa tu o le isi ona suilapalapa e puupuu i lo le isi ma tuuina mai se ‘ata’ata pi’o a o lei amataina. Ou te tautino atu sa ou mafaufau sese pe mata o le a manaia le pese.

“A o o’u laitiiti, sa na o le tasi lava le uiga o le Kerisimasi,” sa ia pepese ai. O le pese e faamatala ai le auala e aoao ai e se tamaitiiti le sipelaga o le Kerisimasi ma iloa ai le aano moni o le aso malolo.

Sa pi’o itu tasi lona gutu, ma sa faigata ona ia ta’uina ia upu.

Sa ou tilotilo solo ma le faaeteete i le potu ma matau foliga o tagata o lana uarota. Sa leai se tasi na maasiasi. O le mea moni, sa latou nonofo ma ataata ma faalogologo ma le fiafia.

Sa faaauau pea ona pese o ia ma liliu atu ona foliga agai i luga, ma faataupupula atu i se vaega o luga o le taualuga. Ina ua mavae sina taimi sa ou tepa a’e foi, ae sa na o maa o le taualuga na ou vaaia. Ae, ina ua ou toe tilotilo atu ia te ia, sa ou matauina ai loimata ua ātaāta mai i ona mata.

Ina ua uma lana [pese], sa patipati tagata uma sa i ai i le fale faafiafia. Sa mūmū ona alafau. A o toe foi mai o ia i lona nofoaga, sa aapa atu lima e pai atu i lona ogalima po o lona tauau a o faaali atu e tagata o le uarota le agaga faafetai faamaoni. O se tasi o uso sa nofo latalata mai ia te au, sa fai atu ia te ia e ese le manaia o lana taumafaiga, lea na ia tali mai i ai ma le filemu, “Faafetai lava. Ou te faamoemoe sa fiafia i ai o Ia.”

O Ia? O ai na pese i ai o ia? Ae a o o’u fesili ia te a’u lava i le fesili, sa ou iloaina le tali. Sa ou iloaina sa lei pese o ia i se tasi i totonu o le potu. Sa lei faafiafia o ia mo le faamaoniga a le au maimoa. Sa pese o ia i le Faaola e viia ai o Ia.

Ua mavae le tele o Kerisimasi talu mai lena pati a le uarota, ma na ou faalogo i le pese “C-h-r-i-s-t-m-a-s [K-e-r-i-s-i-m-a-s-i]” o faatinoina e le toatele o leo na aoaoina lelei. Ae o le fatuga sa ou faalogo i ai i lena Kerisimasi, sa usuina e se tasi o lana faatinoga sa ese mai i usuga masani ae na sau moni mai le loto, o le [Kerisimasi] lea e sili ona ou manatuaina.