Ko e Lakanga Fakataulaʻeikí

Naʻe pehē ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene lea, “Ko e Ngaahi Kī mo e Mafai ʻo e Lakanga Fakataulaʻeikí”. “Oku tāpuakiʻi kotoa kitautolu, ʻe he mālohi ʻo e Lakanga Fakataulaʻeikí.” “ʻOku tataki ʻe he ngaahi kī ʻo e Lakanga Fakataulaʻeikí ʻa e houʻeiki fafiné mo e houʻeiki tangatá foki, pea ʻoku kaungatonu e ngaahi ouau mo e mafai ʻo e lakanga fakataulaʻeikí ki he houʻeiki fafiné mo e houʻeiki tangatá foki.” Koeʻuhí ʻoku tau fie maʻu ke mahino lelei ange ʻa e lakanga fakataulaʻeikí, naʻe fakamahinoʻi ʻe ʻEletā ʻOakesi ʻa e ngaahi tefitoʻi moʻoni mahuʻinga ʻi heʻene lea he konifelenisí fekauʻaki mo e mālohi, ngaahi kī, mo e mafai ʻo e lakanga fakataulaʻeikí. ʻE lava ke tokoni ʻa e ngaahi fehuʻi ko ʻení ki hoʻo ako ʻene pōpoakí.

Ko e ngaahi fehuʻi ke fakakaukauʻí:

Ko e hā e ngaahi kī ʻo e lakanga fakataulaʻeikí, pea ko e hā hono ʻuhinga ʻoku fie maʻu ai kinautolú?
Ko e hā e fekauʻaki ʻa e ngaahi kī ʻo e lakanga fakataulaʻeikí mo e mafai ʻo e lakanga fakataulaʻeikí?
ʻOku fakangatangata koá ʻa e ngaahi tāpuaki ʻo e lakanga fakataulaʻeikí ki he tuʻunga tangata pe fefine?

Ko e hā hono ʻuhinga e meʻá ni kiate aú:

Ko e hā e mafai ʻoku foaki mai kiate au ʻi he taimi ʻoku ou maʻu ai ʻa e ngāue pe uiuiʻi mei he taha ʻokú ne maʻu ʻa e kī ʻo e lakanga fakataulaʻeikí?
Ko e hā e ngaahi fatongia ʻoku ou maʻu ʻi hoku fatongia lolotongá pe ko e uiuiʻi ʻoku fie maʻu ke u fakahoko?
Ko e hā te u lava ʻo ako fekauʻaki mo e ʻofa ʻa e ʻOtuá kiate au mei he lea ko ʻení, pea mo e founga te u vahevahe ai ia mo ha taha ʻoku ʻi ai haʻane ngaahi fehuʻi?