Fakakaungāmeʻa mei he Funga Māmaní
Ko Kaloni Au mei Tonga
Mālō e lelei!*
Feʻiloaki mo Kaloni mei he Puleʻanga Tongá. ʻOku ʻiloa hono ʻotu motú ko e ʻOtumotu Angaʻofá.
Kuo mou kaimeʻakai nai ʻi matātahi ʻi he ʻaho Kilisimasí? ʻOku saiʻia ʻa e fāmili ʻo Kaloní he kaimeʻakai ʻi he matātahí ʻi he taimi Kilisimasí. Koeʻuhí ko e faʻahitaʻu māfaná ʻi Tīsema ʻi he hemisifia faka-tongá, ʻoku ʻikai ko ha palopalema ia ke kaimeʻakai ʻi he taimi Kilisimasí! Ko e taʻu hongofulu ʻeni ʻo Kaloni pea ʻoku manako he feohi mo hono fāmilí he lolotonga ʻa e tutuku e akó.
ʻOku ou saiʻia ʻi he ʻalu ki he matātahi mo hoku fāmilí mo vaʻinga ʻi he ʻoneʻoné pea ʻi he tahí.
ʻOku ou saiʻia he hulohulá, vaʻinga sipotí, mo e tā valivalí. Naʻá ku tokoni ke valivali ha fakatātā ʻo e palani ʻo e fakamoʻuí ke fakapipiki he lokiako sēminelí.
Lolotonga e uiké ʻoku ou tui hoku teunga akó. Pea mau lue fakataha ko e fāmili ki he akó. ʻOku ngāue ʻeku tamaí ʻi he ʻapiakó, pea faiako semineli ʻeku faʻeé. ʻOku ʻi ai hoku taʻokete ko Tolofī mo hoku tuongaʻane lahi ko Nalesoni.
Ne fakakaukau ʻeku faʻeé mo hono tokouá ke kamata ha ngāue fakafāmili ke tānaki ha silini maʻamautolu kotoa ke mau ʻalu ʻo ngāue fakafaifekau ha ʻaho. ʻOku mau ngaahi e moa tunu ʻoku tui ʻi he vaʻakaú mo e ʻotai ʻo fakatau ʻi he māketi ʻa e kau ngoué he ʻaho Tokonakí.
ʻOku ou fie hū ki he ʻunivēsití pea hoko ko ha faiako semineli ʻo hangē ko ʻeku faʻeé. ʻOku ou fie ʻalu ʻo ngāue fakafaifekau pea mali ʻi he temipalé. Ka ʻi he lolotonga ní, te u hokohoko atu pē ʻeku fakalataʻia ʻi he nofo ʻi ha motu fakaʻofoʻofa fakapalataisi.