Naʻá ku ʻIloʻi ʻe Tokoni Mai ʻa e ʻOtuá
ʻApetemia Tuliō, ʻAlapai, Filipaini
Tā fakatātā ʻa Bradley Clark
Kimuʻa peá u kau ki he Siasí, naʻe fuʻu puke lahi ʻaupito ʻa hoku husepānití. Naʻá ku lotu fakamātoato ki he ʻOtuá ʻo kole ke tuku muʻa hoku husepānití ke moʻui koeʻuhí ko ʻema fānau ʻe toko nimá mo e pēpē ʻi hoku manavá. Ka naʻe iku launoa ʻeku ngaahi lotú.
ʻI he mālōlō hoku husepānití, ne mole ai foki mo ʻeku ʻofa, tui mo e falala ki he ʻOtuá. Ne lōmekina au ʻe he ngaahi fatongia ʻoku hilifaki he taimí ni ʻi hoku umá. Meʻamālié, naʻe ʻi ai ʻeku ongomātuʻá ke tokoni.
ʻAho ʻe taha hili ha ngaahi taʻu siʻi mei ai, ne u fanongo ki ha tukituki ʻi he matapaá. Ne tuʻu ha ongo sola fofonga malimali peá na toʻotoʻo mo ha tohi. Naʻá na fakafeʻiloaki mai ko e ongo faifekau kinaua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ni. Ne teʻeki ke u fanongo ʻi hona siasí. Naʻe hoko atu ʻena fonongá ʻi heʻeku talaange naʻá ku moʻuá, ka naʻe hokohoko atu ʻeku fakakaukau kiate kinauá.
ʻI he ʻaho hono hokó ne u sio atu kiate kinaua ʻokú na fakaʻaliʻali ange ʻa e tohí ki he kaungāʻapí. ʻI heʻeku fie ʻiló, naʻá ku ʻunu atu ke ofi. Naʻe fakatokangaʻi mai au ʻe he ongo faifekaú peá na toe ʻeke mai pe te na lava ʻo ʻaʻahi ange. Naʻá ku ofo ʻi heʻeku talí: “ʻIo, ha faʻahinga taimi pē!”
ʻI heʻeku fanongo ki he pōpoaki ʻa e ongo faifekaú mo hono ako e Tohi ʻa Molomoná, ne u fakatokangaʻi ʻa e ngaahi fehalaaki kuó u fakahoko ʻi he moʻuí, peá u fakatomala mei heʻeku ngaahi angahalá, ʻo toe ofi ange ki he ʻOtuá. ʻI he fanongo ʻeku ongomātuʻá naʻe akoʻi au ʻe he ongo faifekaú, naʻá na ʻita lahi ʻaupito. Naʻá na fakamanamana ke tuʻusi au mo ʻeku fānaú mei he fāmilí. Ne fakaafeʻi au ʻe he ongo faifekaú ke u papitaiso, ka naʻe ʻikai ke u tali ia koeʻuhí naʻa mau fakafalala ki he tokoni ʻeku ongomātuʻá.
Kimuʻa pea ʻalu e ongo faifekaú, naʻá na kole mai ke u lau ʻa e 3 Nīfai 13:31–34. ʻI heʻeku laú “mou fuofua kumi ʻa e puleʻanga ʻo e ʻOtuá mo ʻene māʻoniʻoní, pea ʻe foaki ʻa e ngaahi meʻá ni kotoa pē kiate kimoutolu” (veesi 33), ne u ʻilo ʻe tauhi mai ʻa e Tamai Hēvaní kapau te u fakamuʻomuʻa Ia pea talangofua ki Heʻene ngaahi fekaú. ʻI he taimi ne foki mai ai e ongo faifekaú, naʻa mau palani e ʻaho hoku papitaisó.
ʻI he ʻaho ʻo hoku papitaisó, ne foki mai ki hoku ʻatamaí ʻa e leʻo ʻita ʻo ʻeku faʻeé. Naʻá ku manavasiʻi, ka naʻá ku hifo atu ki he vaí ʻo papitaiso. Hili iá, naʻá ku fuʻu fiefia ʻaupito, pea ʻi he taimi ne hilifakinima au ko ha mēmipa ʻo e Siasí mo foaki mai e meʻafoaki ʻo e Laumālie Māʻoniʻoní, naʻá ku ongoʻi kuo mahuʻi atu ʻeku ngaahi kavengá.
ʻI he fanongo ʻeku ongomātuʻá ne u kau ki he Siasí, naʻá na liʻaki au. Naʻa mau fakalelei hili ha taʻu ʻe taha mei ai, pea papitaiso hoku ongo tehiná ʻi he loto ki ai ʻemau ongomātuʻá.
Kuo ngāue faifekau taimi kakato ʻa e toko tolu ʻo ʻeku fānaú, pea ʻe vavé ni pe ʻeku fakamanatu ʻa e taʻu ʻe 40 ʻeku hoko ko e mēmipa ʻo e Siasí. Hono ʻikai lahi e ngaahi tāpuaki ʻoku ou maʻú—fakamālō lahi ki he ongo faifekau naʻá na tukituki ʻi hoku matapaá, fakafeʻiloaki mai e Tohi ʻa Molomoná, pea tokoni ke u toe ʻofa ki he ʻOtuá mo ʻeku tui mo falala kiate Iá.