Naʻá ku Ongoʻi e Laumālie Māʻoniʻoní

Naʻá ku faʻa fehuʻi ki heʻeku ongomātuʻá ko e hā e ʻuhinga ʻo e “ongoʻi ʻa e Laumālie Māʻoniʻoní.” Kuó u fanongo ʻokú na faʻa talanoa ki ai, ka naʻe ʻikai ke u ʻilo pe ʻoku ongo fēfē ia. Naʻe talamai ʻe he fineʻeikí ko ha ongo lelei ia, ka naʻe ʻikai pē ke ʻuhingamālie ia kiate au.

ʻI ha pongipongi ʻe taha ne lele holo hoku kiʻi tehina taʻu tahá ʻo tau hono ʻulú ʻi he hitá. Naʻe lavea lahi hono ʻulú. Naʻá ne tangi pea naʻe toto. Ne u ilifia ʻaupito mo loto-hohaʻa. Naʻe faitoʻo ʻe he fineʻeikí hono laveá pea ʻai ki ai e peniʻeiti. Pea ʻave leva au ki he akó.

ʻI he akó ne u kei ilifia mo loto-hohaʻa ki hoku tokouá. Ne u manatuʻi hake ʻe lava ke u lotu. Naʻá ku ʻalu ki he fale mālōloó ʻo lotu fakamatoato ki he Tamai Hēvaní ʻo kole kiate Ia ke tāpuekina ʻa hoku tokouá. Hili e lotú naʻe ʻikai ke u toe ilifia. Naʻá ku ongoʻi ha loto nonga ʻaupito, peá u foki leva ki hoku loki akó.

ʻI he foki ki ʻapi he ʻaho ko iá, naʻá ku talaange ki heʻeku faʻeé ʻa e meʻa naʻe hokó. Naʻá ne fiefia mo talamai ko e ongoʻi māfana mo nonga ne u ongoʻí ko e fakafiemālie ia ʻa e Laumālie Māʻoniʻoní. Naʻá ne talamai ʻoku ʻikai ke faʻa talanoa mai e Laumālie Māʻoniʻoní hangē ko e talanoa mai ʻa e kakaí kiate kitautolú. Ka ʻoku Ne ʻomi ʻe ia ha ongo nonga kiate kitautolu.

Hili iá ne u fakatokangaʻi ha ngaahi taimi kehe ne u ongoʻi ai e Laumālie Māʻoniʻoní. ʻI he taimi naʻe foaki ai ʻe heʻeku tamaí ha tāpuaki ki heʻeku faʻeé, naʻá ku kuikui peá u feinga ke ʻapasia ʻaupito. Naʻá ku toe maʻu ʻa e ongo māfana ko iá. ʻOku ou ʻilo ʻoku fie maʻu ke tau ʻapasia ke ongoʻi ngofua ange ʻa e Laumālie Māʻoniʻoní.