Ko ha Fonu Mahuohua e Ngaahi Manatu Melie
Sina Sikanoa, ʻIutā, USA
Tā fakatātā ʻa Bradley Clark
Tupunga ʻi he motuʻa ʻo e ngaahi paipa vaí pea vaivai mo e fakavaʻe ʻo e falé, ne tāfea maʻu pē homau ʻapí ʻi heʻeku kei siʻí ʻi he taimi kotoa pē ʻoku ʻalotāmaki ai ʻo lahi feʻunga e ʻuhá. Koeʻuhí ʻoku lau lau houa ʻa e faʻa ʻalotāmaki ʻuhá ʻi Veisinia, USA, naʻe faʻa tāfea maʻu pē.
Naʻa mau nofo ʻi he ʻapi ko iá ʻi he konga lahi ʻo ʻeku kei tupu haké, pea ne u fakakaukau ko e tafeá ko ha meʻa angamaheni pē ia.
Hili ha ngaahi ʻalotāmaki ʻuha tuʻo lahi, ne mau fakaleleiʻi ʻemau founga fakafepakiʻi ʻo e tafeá pea ako ke mau ngāue fakataha. Ne faʻa tō mai e ʻalotāmakí he tuʻuapoó, pea fafangu kimautolu ʻe he ongomātuʻá ke ngāue ʻi he tafaʻaki takitaha kuo vahe maí ʻi he kamata ke hū māmālie mai ʻa e vaí ʻi he loki ʻi laló, hangē ha lava mei ha moʻunga afí. Ne tā vai hoku tuongaʻané mo e tangataʻeikí mei he sitepú, pea naʻá ku holo ke mātuʻu e vaí mo hoku tokouá ʻaki e tauelí ke ʻoua naʻa aʻu ki he kāpetí.
Naʻá ma makiʻikiʻi ʻi heʻema punopuna mo malaki e tauelí, ongoʻi ʻene viviku ʻi homa louhiʻi vaʻé mo e ngaʻungaʻu ʻa e vaʻe homa talausese mohé. Ne fakavave hono tatau ʻe he fineʻeikí e ngaahi taueli vivikú, pea faʻo ki he misini fakamōmoa foó, pea fetongi ʻaki ha ngaahi taueli mātuʻu ke hoko atu ʻema tā malakí. ʻI he ʻemau fiemālie kuo hao homau falé, naʻa mau ʻalu ki peito ke fakamōmoa mo inu ʻemau koko mafana mo e kūkisi ko e fakapale ʻa e ngāue kuo mau faí. Pea kapau ne teʻeki taimi ki he akó, naʻa mau foki ʻo mohe.
Mahalo naʻe fakakina ʻe ngaahi tafea ko ʻení ki heʻeku ongomātuʻá ka ʻoku ou manatu ki ai ko ha ngaahi momeniti fakafiefia taha ia ʻi heʻeku kei tupu haké, ʻo aʻu pē ki he taimi ne pā ai e maná mo tapa ʻa e fatulisí. Ko hono moʻoní, ʻoku ʻomi ʻe he nanamu ʻo e kapeti vivikú ʻeku ongoʻi ʻofa ki he taimi mo e familí.
Naʻe mei fetakai pē e ongomātuʻá ʻi he tafeá ʻiate kinaua pē, ka ʻoku ou fiefia ko ʻena fakakau kimautolu kotoa ke maluʻi homau ʻapí. Naʻe fakalata ʻa hono taʻofi e vaí koeʻuhí naʻa mau fakataha pea mau takitaha tokoni.
Ko ʻeni kuó u fuʻu lahi, ʻoku ou fakakaukau ki he ngaahi ʻaho ko iá mo fifili pe te u lava fēfē ʻo fakatupulaki ha fiefia tatau ʻi he ngāue fakataha mo ʻeku fānaú. Neongo ʻoku ou houngaʻia ʻi he ʻikai ke tāfea hoku ʻapí, ka ʻoku ou ʻilo ʻoku ʻi ai e meʻa te ne ʻohofi homau fāmilí ʻoku ʻikai te mau fie maʻu.
Tatau ai pē pe ko e hā e palopalema ʻe fehangahangai mo hoku fāmilí ʻi he kahaʻú, ʻoku ou fakaʻamu te mau nofo fakataha mo ngāue fakataha ʻi hono maluʻi homau ngaahi tuʻunga ʻulungaanga mahuʻingá, ʻemau tuí, mo e vā fetauhiʻaki. Hili iá pea mahalo, naʻa mo e ngaahi faingataʻá, te mau lava ʻo kata, malimali, mo ongoʻi fiefia ʻi heʻemau ngāue fakatahá.