Ko Ha Laione Angavaivai
“Fānau au ʻa e ʻOtuá, kuó ne fekau maí” (Tohi Hiva ʻa e Fānaú, 2).
Ko e taha ʻo ʻeku ngaahi talanoa manakoa tahá ko e talanoa ʻo Lamipetí ko e Laione Angavaivai. Naʻe ʻiloa ia ʻi he katuni ʻi he ngaahi taʻu kuo hilí.
Ko Lamipetí ko ha kiʻi ʻuhikiʻi laione naʻe nofo mo e fanga sipí ʻi he taimi naʻe fanauʻi mai aí. Koeʻuhí ko ia, naʻá ne fakakaukau pē ko e sipi ia. ʻI ha pō faʻahitaʻu failau ʻe taha ne mohe fiemālie ai ʻa Lamipeti mo e tākanga sipí. Fakafokifā pē kuo fanongo ʻa Lamipeti ki he tangi ʻa ha ulofi mei he mamaʻó. Koeʻuhí naʻe pehē ʻe Lamipeti ko e sipi ia, naʻe kamata leva ke ne tetetete.
Naʻe fakaʻau ʻo leʻolahi ange ʻa e tangí, pea ofi mo e ulofí pea kamata ke ne toho atu e sipi ʻe taha. ʻOhovale pē kuo ongoʻi ʻe Lamipeti ha ongo mālohi ʻi loto ʻiate ia ne teʻeki te ne ongoʻi kimuʻa. Hangē ha fatulisí, naʻá ne lele atu ki he ulofí ke fakahaofi ʻa e sipí!
Ne toki fakatokangaʻi ʻe Lamipeti he taimi ko iá ha meʻa, ʻo ne pehē “ʻOku ʻikai ko ha sipi au. ʻOku ʻikai ko ha foha au ʻo ha sipi. Ko e foha au ʻo ha laione!” ʻI heʻene tuli ʻa e ulofí pea fakahaofi ʻa e sipí, naʻá ne ʻilo ai hono natula moʻoní.
Ko ha fānau koe ʻa e ʻOtuá, pea ʻokú Ne ʻofa ʻiate koe. Kimuʻa pea fāʻeleʻi mai kitautolu ki he māmaní, naʻa tau hoko kotoa ko e foha pe ʻofefine fakalaumālie ʻi he fāmili ʻo e Tamai Hēvaní. Ka ko e tokolahi ʻo kitautolu ʻoku ʻikai ke tau fakatokangaʻi ʻeni. Kapau ʻoku tau ʻilo ko hai kitautolu, te tau lava ʻo hangē ko e laioné pea tauʻi ʻa e ngaahi meʻa ʻoku koví, koeʻuhí ke tau lava ʻo maluʻi ʻa e niʻihi kehé pea ʻikai mole meiate kitautolu ʻa e halá.
ʻOku ou fakamālō ki he ngaahi meʻaʻofa fakaʻofoʻofa ʻo e ongoongoleleí mo e palani ʻo e fakamoʻuí. ʻOku ou fakamālō ʻoku tau ʻiloʻi ko hai kitautolu ke tau mālohi—hangē pē ko Lamipetí.