Tāpuaki ʻo ʻIsá
ʻOku nofo ʻa e tokotaha naʻá ne faʻú ʻi ʻIutā, USA.
“Ko hoku ʻapí ʻoku tāpuakiʻi ʻaki e mālohi ʻo e Puletapú” (Tohi Hiva ʻa e Fānaú, 102, 103).
“ʻOku ʻi ai nai ha meʻa ʻokú ne hohaʻasi koé?” Ko e fehuʻi ange ia ʻa e fineʻeikí kia ʻIsa ʻi heʻena foki ki ʻapi mei he lotú.
Naʻe siosio pe ʻa ʻIsa ki tuʻa ki he tafenga vaí ʻoku fehokotakiʻanga ai e hala ʻAmisētamí. Naʻe fakamatala ʻa ʻIsa, “Naʻe talamai ʻe heʻeku faiako Palaimelí ko e tapuaki ke ʻi ai ha lakanga fakataulaʻeiki ʻi hotau ʻapí. Ka ʻoku ʻikai ke maʻu ʻe he Tangataʻeikí ia ʻa e lakanga fakataulaʻeikí, ko ia ai ʻe ʻikai lava ke maʻu hatau tāpuaki.”
Naʻe tali ange ʻe he fineʻeikí, “ʻE lava pē ke tau maʻu ʻa e lakanga fakataulaʻeikí ʻi hotau ʻapí neongo ʻoku ʻikai ke kau mai ʻa e tangataʻeikí ki he Siasí. ʻOku lahi ha kau lakanga fakataulaʻeiki ʻi hotau uōtí ʻe lava ke tokoni atu kiate koe. Fēfē ʻa Misa Vani Liueni, ʻetau faiako fakaʻapí?”
Naʻe saiʻia ʻa ʻIsa ʻia Misa Vani Liueni. Naʻá ne faʻa haʻu maʻu pē mo e pisikete, naʻe saiʻia taha ai ʻa ʻIsá, pea talanoa mo ia fekauʻaki mo e saienisí, ʻa e lēsoni ʻoku saiʻia taha aí. Ka ʻi he lotú ʻoku faʻa talanoa ʻa e tamaikí fekauʻaki mo ʻenau tamaí mo ʻenau foaki ange honau tāpuaki lakanga fakataulaʻeikí he taimi ʻoku nau puke pe loto-mamahi aí. Naʻe ʻikai lava ʻa ʻIsa ʻo kole ki heʻene tamaí ke foaki ange hano tāpuaki.
Naʻe pehē ange ʻe ʻIsa, “ʻOku ou ʻofa heʻeku Tamaí, “Ka ʻoku ou fakaʻamu naʻá ne maʻu ʻa e lakanga fakataulaʻeikí.”
ʻI heʻena aʻu ki ʻapí, naʻe ʻi peito ʻa e tangataʻeiki ʻo ngaohi ʻa e meʻatokoni efiafi. Naʻá ne ui mai, “Ne fēfē ʻa e lotú?”
Naʻe ʻikai ke lea atu ʻa ʻIsa ia. Kae ʻalu ia ki hono lokí ʻo ne tō tangutu hifo ʻi he funga mohengá. Naʻá ne fakaʻamu naʻe kiʻi kehe ʻa e tūkunga naʻa nau ʻi aí.
ʻI he uike hokó, ne fai ha sivi lahi ʻa ʻIsa. Ko e tamasiʻi/taʻahine kotoa pē ʻi Netaleni kuo pau ke nau toʻo e sivi ko ʻení ʻi honau taʻu 12 ke mahino ʻa e ʻapiako te nau hoko atu ki ai ʻi he taʻu hokó. Neongo ne ako mālohi pea mateuteu ʻaupito ʻa ʻIsa, ka naʻe kei manavasiʻi pē. Ko e pō kimuʻa he siví naʻá ne ongoʻi hangē naʻe haʻi fakapona hono keté. Naʻe ʻikai lava ia ʻo mohe. ʻI heʻene feinga ke mohé, naʻá ne manatuʻi hake ʻa e lēsoni he Palaimelí fekauʻaki mo e kole ha tāpuaki lakanga fakataulaʻeikí ʻo kapau ʻe ilifia. Neongo naʻe ʻikai ke maʻu heʻene tamaí ʻa e lakanga fakataulaʻeikí ke foaki ange hano tāpuaki, ka naʻá ne ʻilo ʻe tokoniʻi ia ʻe he Tamai Hēvaní ʻo kapau te ne kole.
Ne tuʻu hake ʻa ʻIsa mei he mohengá ʻo lue ki lotofale. Naʻe ʻi he ngāué ʻene fineʻeikí, ka naʻe sio TV ʻene tangataʻeikí.
Naʻe ʻeke ange heʻene Tamaí, “ʻOkú ke sai pē?”
Naʻe pehē ange ʻe ʻIsa “ʻOku ou ilifia he te u sivi ʻapongipongí. ʻOkú ke pehē te tau lava ʻo tā kia Misa Vani Liueni ke haʻu ʻo foaki mai haku tāpuaki?”
Naʻe talaange ʻe he Tangataʻeikí, “ʻOku ou tui ko ha fakakaukau lelei ia. Tuku ke u tā ki ai.”
Taimi siʻi kuo aʻu ange ʻa Misa Vani Liueni mo hono foha ko Saní ke ʻoange ha tāpuaki ʻo ʻIsa. Ne kole ʻe Misa Vani Liueni ki he Tamai Hēvaní ke tokoni kia ʻIsa ke ʻoua ʻe manavahē ʻi he siví kae tokoni ange ke ne fai lelei ia. Lolotonga ʻa e foaki ange ʻe Misa Vani Liueni ʻa e tāpuaki ʻo ʻIsá, ne tangutu ʻene tangataʻeikí he seá ʻo kūnima mo kuikui hono matá.
Hili ʻa e tāpuakí ne ongoʻi fiemālie ange ʻa ʻIsa. Naʻe ʻikai toe langa hono keté, pea naʻe kiʻi fiemohea. Naʻe talaange ʻe Misa Vani Liueni, “Talamonū atu ki ʻapongipongi. Kuó ke ngāue mālohi ʻaupito pea ʻoku ou ʻilo ʻe tokoni atu ʻa e Tamai Hēvaní ke sai hoʻo siví,” peá na ʻalu leva.
Naʻe talaange heʻene Tamaí, “ʻOku ou fiefia ʻaupito ʻi hoʻo tuí. Neongo ʻoku ʻikai ko ha mēmipa au ʻo e Siasí, ka ʻoku ou fiefia ʻokú ke tui ki he ʻOtuá, pea ʻoku ou fakaʻamu pē ke ke ʻiloʻi ʻoku ou tui mo au ki he ʻOtuá.”
Naʻe fakamālō ange ʻa ʻIsa ki heʻene Tamaí peá ne ʻuma ki hono kouʻahé.
ʻI heʻene fusi hake hono kafú, naʻe ongoʻi fiefia mo fiemālie ʻa ʻIsa. Naʻá ne houngaʻia ko ha Tamai ʻoku ʻofa ʻiate ia. Naʻá ne fiefia ʻoku tui ʻene tamaí ki he Tamai Hēvaní mo Sīsū. Pea naʻá ne ʻilo ʻe lava maʻu pē ʻe he lakanga fakataulaʻeikí ʻo tāpuekina ia mo hono ʻapí.