Ko Hono ʻOmi ʻo e Palaimelí ki ʻApí
Ngaahi ʻEkitivitī Te Ne Fakamālohia Hoku Fāmilí
ʻOku nofo ʻa e tokotaha naʻá ne faʻú ʻi ʻIutā, USA.
Ako lahi ange ki he kaveinga ʻo e Palaimelí ki he māhina ní!
Naʻe taʻeoliʻia ʻa Lukasi. Naʻá ne lue takai he falé ke maʻu ha taha ke na vaʻinga. Naʻe vaʻinga ʻa hono tokoua ko Pení ʻi he komipiutá. Ko hono tuofefiné, ʻa Sofi, naʻe fetohiʻaki ia ʻi he telefoní. Naʻe vakai meili e Fineʻeikí, pea laukonga ʻene Tangataʻeikí.
Naʻe pehē ʻe Lukasi “ʻoku taʻeoli ʻa e feituʻú ni.”
Naʻe sio hake ʻa e tangataʻeikí. “Ko e hā hoʻo ʻuhingá?”
Naʻe pehē ʻe Lukasi “ʻOku tau takitaha fai pē ʻene meʻa. ʻOku ʻikai ke tau fai fakataha ha meʻa.”
Naʻe tāpuni ʻe he tangataʻeikí ʻene tohí mo ne pehē, “ʻokú ke moʻoni, te u tānaki fakataha ʻa e fāmilí, pea te tau fai ha meʻa fakafiefia.”
Naʻe mamali ʻa Lukasi. “Sai ʻaupito!”
Hili ha miniti siʻi mei ai ne tangutu fakataha ʻa e fāmili ʻo Lukasí, mo fifili pe ko e hā e meʻa ke faí. Naʻe loto ʻa Sofi ke tohi he telefoní ki hono kaungāmeʻá. Naʻe loto ʻa Peni ia ke hoko atu ʻene vaʻingá ʻi he komipiutá.
Naʻe pehē ʻe Lukasi “ko hoku kaungāmeʻá ko Paulá ʻoku saiʻia ke ʻalu ʻo lue mo hono fāmilí. Pea ko e fāmili ʻo ʻAlekisānitá ʻoku nau saiʻia he vaʻinga sipotí.”
Ka naʻe ʻikai ke fie lue ʻe Sofi ʻi tuʻa he ʻoku ʻafu pea ʻikai ke fie vaʻinga sipoti ʻa Peni koeʻuhí he naʻe lavea hono vaʻé.
Naʻe pehē ʻe he Fineʻeikí, “Lūkasi, ko e meʻa ia ʻoku fakafiefia ki ho ngaahi kaungāmeʻá ke ke faí, ka ko e hā ha meʻa ʻoku saiʻia kotoa ai hotau fāmilí?”
Naʻe pehē ange ʻe Peni naʻá ne saiʻia ke vaʻinga papá. Naʻe pehē ʻe Sofi ʻoku saiʻia he laukongá. Naʻe pehē ʻe Lukasi ʻoku saiʻia ia he lova kaá.
“Naʻe pehē ʻe he Tangataʻeikí, ʻTau fili pē ha meʻa ʻe taha ke fai he taimí ni. Fēfē ke tau kamata ʻaki e keimi papá?”
Taimi nounou kuo nau tangutu fakataha ʻo kamata ke nau vaʻinga. Taimi siʻi pē kuo tuku ʻe Sofi ʻene telefoní ki he tafaʻakí. Naʻe tuku ʻe Peni ʻene toutou sio ki he komipiutá. ʻI he ʻosi ʻa e takaí, kuo nau malimali kotoa ka ko Lukasi naʻe malimali lahi tahá.