Ko e Talaʻofa ʻo ʻEtau Toe Fakataha he Kahaʻú

ʻĪmisi

Profile of woman standing at the kitchen sink washing dishes, pondering. (horiz)

Ko ha pongipongi Sāpate ʻaoʻaofia ia pea ne u fakaʻosiʻosi hono fufulu e ʻū peletí mei he maʻu meʻatokoni pongipongí. Naʻe sio ʻeku ongo tamaiki īki tahá ʻi ha foʻi vitiō fakalotu ʻi he loki fakafāmili ʻi he veʻe peitó pē. Ne hēhētuʻu pē ʻeku fakakaukaú mo e loʻimataʻia. Ne ʻikai lava ke toʻo mei heʻeku fakakaukaú e kanisā kuó ne ʻohofia homau ʻapí. Ne fefaʻuhi hoku husepānití mo e kanisaá ʻi ha taʻu lahi, ka kuo mafola he taimí ni. Ne hangē kuo veiveiuá ʻeku tuí. Ne femoʻuekina hoku ʻatamaí ʻi he fakakaukau “kapau pē naʻe”?

Ne fakafokifā e hū mai ki heʻeku fakakaukaú e leʻo fakanonga mei he foʻi vitiō fakalotú: “Fiemālie, peá ke nonga. …

“Ko e hā ʻoku mou manavasiʻi pehē aí? ko e hā ʻoku ʻikai ai haʻamou tuí?” (Maʻake 4:39–40).

Ne u lī e konga tupenu fufulu ipú ka u sio ki he TV. Ko e foʻi vitiō ia ki hono fakanonga ʻe he Fakamoʻuí ʻa e matangí. Ne hangē kuo folofola fakahangatonu mai pē ʻa e Fakamoʻuí Ia kiate aú. Ne lōmekina au ʻe ha ongoʻi māfana mo nonga. Ko ha fakamanatu ke u tuʻu maʻu ʻi he tui ne u ako lahi ki ai he ngaahi taʻu ʻo e kanisaá. Ko ha tui ne poupouʻi ʻe he ngaahi lea mei hoku tāpuaki fakapēteliaké.

Ne maʻu hoku tāpuaki fakapēteliaké ʻi hoku taʻu 15. Ne ʻi ai ha foʻi sētesi ʻe taha naʻe hangē ʻokú ne fakamatalaʻi ha konga ʻo ʻeku mali temipalé ʻoku hoko ia he taimí ni ko ha talaʻofa maʻongoʻonga maʻaku. ʻOku lau ai ki ha tokotaha lakanga fakataulaʻeiki angatonu te u mali mo ia mo talamai te ne “tokoniʻi koe, tataki koe mo poupouʻi koe, ʻo ʻikai ngata pē ʻi hoʻo kei finemuí kae hokohoko atu ʻi he ngaahi taʻu kimuí.”

ʻI heʻeku toutou lau hoku tāpuaki fakapēteliaké ʻi he ngaahi taʻu ʻo e fefaʻuhi mo e kanisaá, naʻe ʻomi ʻe he foʻi sētesi ko iá ha fuʻu ʻamanaki lelei kiate au. ʻI he taimi kotoa pē, ne toe fakafoʻou ʻeku tuí ʻi he talaʻofa te ma toe fakataha ʻi he kahaʻú. Ne u manatuʻi e fakafiemālie lahi ne u maʻu mei he Laumālié he fuofua taimi ne ʻilo ai ʻoku kanisā hoku husepānití. Ne u ako maʻuloto e konga ko ia hoku tāpuaki fakapēteliaké, pea ʻi he taimi ne fai ai e siví ʻo ʻilo ʻoku toe kovi ange e kanisaá, ne u manatuʻi e talaʻofa ko iá.

Ne u ako ke tuku atu ʻetau kavengá ki he Fakamoʻuí, pea kuo pau ke hokohoko atu hono langa hake ʻeku tuí, pea fakafepakiʻi e manavasiʻi ʻoku fuʻu lahí ʻaki e tuí. Naʻe fakamanatu mai ʻe he foʻi vitiō ʻo e pongipongi ko iá ke u falala ki he ʻEikí.

ʻI hono maʻu ʻo e tuí ʻoku ou malava ai ke tuku kia Sīsū Kalaisi ke Ne fua ʻeku kavengá. Hangē pe ko e ʻikai ke ongoʻi ʻe he kakai ʻo ʻAlamaá e ngaahi kavenga ʻi honau umá heʻenau nofo pōpulá (vakai, Mōsaia 24:14), ʻoku pehē pē mo e fepaki hoku fāmilí mo e kanisaá. Kuo lava ʻeni ke fehangahangai hoku fāmilí mo e kanisaá kae ʻikai ongoʻi e mafasia ʻoku malava ke ne ʻomí.

ʻOku kei hokohoko atu pē hono sivi hoku husepānití ke fakatotoloʻi e ngaahi selo ʻo e kanisaá pe maʻu ha ngaahi foʻi ngungu. ʻOku kei ʻi ai homau ngaahi moʻua he fakamole fakafaitoʻó mo e ngaahi haʻahaʻa ʻo e faitoʻó. ʻOku ou kei lotua he ʻaho kotoa pē ke toʻo atu e kanisaá mei hoku husepānití. ʻOku ou lotua ke ma moʻui ke ma aʻu ʻo taʻu motuʻa. ʻOku ou toe pehē pē foki ki he Tamai Hēvaní, “Fai pē Ho finangaló.”

ʻOku ʻikai ke u ʻilo pe ʻe hoko mai ʻafē ʻa e “ngaahi taʻu kimui” ʻoku lau ki ai hoku tāpuaki fakapēteliaké. ʻOku ou ʻamanaki ko e ngaahi lea ʻi hoku tāpuakí ʻoku ʻuhinga ia ki haʻaku ʻalu mo hoku husepānití ʻo ngāue fakafaifekau he taimi ʻe lalahi ai ʻema fānaú. ʻOku ou ʻamanaki ʻoku ʻuhinga ia ki hano taki ʻe hoku husepānití ʻemau hōsí kae heka ai homa makapuná mo nau huki ʻi hono fungá. Ka ʻoku ou ʻilo ko e taimi pē ʻe ʻave ai ia ʻe he ʻOtuá mei he māmaní, ʻe fai pē ia ʻi Heʻene taimi pē ʻAʻaná.

ʻOku ʻikai ke u toe hohaʻa pe ko e fē e taimi ʻe hoko ai e “ngaahi taʻu kimuí.” ʻOku ʻikai ke mahuʻinga ia. ʻOku ou falala ʻe fakahoko ʻe he ʻEikí e talaʻofa ko ia ʻi hoku tāpuaki fakapēteliaké. Kuó Ne tauhi kimautolu he ngaahi taʻu lahi ko ʻení, pea te Ne kei tauhi pe kimautolu ʻi he kahaʻú.