Talu ʻeku hū ki he akó, mo e ʻi ai hoku ngaahi kaungāmeʻa ʻoku ʻikai mahino kiate kinautolu ʻa e ngaahi tuʻunga ʻulungaanga angamaʻa ʻo ʻetau tui fakalotú. ʻI he kamatá naʻe faingataʻa, ka naʻe ʻalu pē taimí mo ʻenau anga ki he fakakaukau ʻo e moʻui angamaʻá. Naʻá ku fokotuʻu ha taumuʻa ʻi heʻeku moʻuí ke u maʻa mo haohaoa, pea kuo hoko ia ʻo lelei, kiate au mo e niʻihi naʻa nau faʻa fakaangaʻi aú. Ne ʻalu pē taimí mo e hoko ʻa e fakaʻapaʻapá, melinó mo e fiefiá ko e konga ʻo homau siakale kaungāmeʻa mamaé.

ʻI heʻeku hoko ko e mēmipa pē ʻe taha ʻo e Siasí ʻi hoku toʻú, kuó u aʻusia ha ngaahi taimi kuo nau faka-lotomamahiʻi ai au. Taimi e niʻihi ʻoku nau fakamāuʻi mo fakaangaʻi ʻeku tui fakalotú. Naʻá ku ongoʻi tuenoa ʻaupito, ka ʻoku ou houngaʻia ko ʻeku ʻilo ʻa e ngaahi tuʻunga moʻui ʻo e Siasí.

Kapau ʻoku faka-lotomamahiʻi au ʻe hoku ngaahi kaungāmeʻá, ʻoku ou feinga ke u loto fakatōkilalo mo fakaʻehiʻehi mei he fakakikihí, he ʻoku ou ʻilo ʻoku kovi ʻa e fakakikihí. ʻI he taimi ʻoku nau kamata aleaʻi ai ha meʻa fekauʻaki mo e Siasí, ʻoku ou fakamoʻoni pē ki heʻeku tui ki he ongoongoleleí.

ʻOku ou fakamolemoleʻi maʻu pē hoku ngaahi kaungāmeʻá pe te nau kole fakamolemole pe ʻikai. Ko e kole fakamolemolé ʻoku ʻikai ko e pehē pe, “Kuo tali hoʻo kole fakamolemolé” pe “Sai pē ia,” koeʻuhí ʻoku ʻi ai e ʻuhinga loloto ʻo e fakamolemolé: Naʻe fakalelei ʻa Sīsū Kalaisi maʻa ʻetau ngaahi angahalá ke lava ʻa e Tamai Hēvaní ʻo fakamolemoleʻi kitautolu.

Neongo ʻoku ʻikai mahino ki hoku ngaahi kaungāmeʻá he taimí ni ʻa e meʻa ʻoku ou tui ki aí, ka ʻoku ou ʻilo te u lava ʻo hoko ko e meʻa ngāue ʻa e ʻOtuá ke akoʻi kinautolu kau ki he ongoongoleleí. ʻOku ou tokoni kiate kinautolu, pea ʻi he taimi tatau ʻoku ou tokoniʻi au ke u tupulaki fakalaumālie pea teuteu ke ngāue faifekau.

ʻOku fakaʻaongaʻi ʻe he Tamai Hēvaní ʻa e “fanga kiʻi meʻa iiki mo faingofua” (ʻAlamā 37:6) ke teke ʻEne ngāué ki muʻa. Ko Siosefa Sāmitá, naʻe ʻikai lelei ki he vakai ʻa e māmaní, ka neongo ia naʻe fakaʻaongaʻi ia ʻe he ʻOtuá ke toe fakafoki mai ai ʻa e Siasí. Pea ko e kiʻi meʻa faingofua pē naʻe hoko ai hono Toe Fakafoki Maí: ko ha kiʻi lotu. ʻOua naʻá ke fakakaukau ʻokú ke fuʻu kei siʻi ke ngāue ʻi he ngoue vaine ʻa e ʻEikí. ʻE lava ke tokoni hoʻo hoko ko ha faʻifaʻitakiʻanga leleí ki hono fakaului ho kaungāʻapí ke hoko ko e mēmipa ʻo e Siasí. ʻOku ʻikai fie maʻu ʻe he ʻOtuá ha ngaahi ʻulungaanga lahi ka, ko ha kakai ʻoku faivelenga mo talangofua.