ʻOku Tali Mai ʻe he Tamai Hēvaní ʻEku Ngaahi Lotú

Kuo ʻi ai ha ngaahi taimi lahi kuo fanongo mo tali mai ʻe he Tamai Hēvaní ʻeku ngaahi lotú. Naʻá ku taʻu fā heʻeku fuofua manatu ki he hoko ʻo e meʻá ni. Ne mole ʻa e ngaahi konga poloka naʻá ku fie vaʻinga ʻakí. Ko ia ne u ʻalu ai ki hoku lokí peá u tūʻulutui ʻo lotu. Naʻá ku kole ki he Tamai Hēvaní ke tokoni mai ke u maʻu ʻeku meʻa vaʻingá. Naʻe tali ʻeku lotú ʻi he taimi pē ko iá—naʻá ku maʻu ʻa e ngaahi konga poloká ʻi he loki hoko maí.

Ko e taha ʻo e ngaahi taimi mahuʻinga taha naʻe tali ai haʻaku lotú ko e lotu mo e kotoa hoku fāmilí. ʻI he ngaahi māhina siʻi hili ʻe ʻosi mai hoku tokoua ko Kalisitiané mei heʻene ngāue fakafaifekaú, naʻá ne fakaʻuli mai kuo fuoloa e poʻulí ʻi ha hala he veʻe moʻungá. Naʻá ne fepaki mo ha kā ʻe taha. Naʻe sai pē ʻa e fakaʻuli ʻe tahá, ka naʻe ʻave hoku tokouá ki he falemahakí ʻi ha helikopeta.

Naʻe lavelavea lahi ʻa Kalisitiane ʻi hono sinó kotoa. Naʻá ne māʻumohe, pea pehē ʻe he kau toketaá he ʻikai ke ne toe ʻā. Naʻe fakakaukau homau fāmilí ke mau ʻaukai. Naʻe taufetongi ʻeku ongomātuʻá, ngaahi kuí, mehikitangá, faʻētangatá mo e kotoa ʻo hoku ngaahi tokouá ʻi he ʻaukai maʻa Kalisitiané. Naʻá ku ʻaukai ʻi ha ʻaho ako. Naʻe pau ke u fakamatalaʻi ange ki heʻeku faiakó mo e kaungā-kalasí ʻa e ʻuhinga naʻe ʻikai ke u kai hoʻatā ai ʻi he ʻaho ko iá. Naʻe ʻikai ke u fuʻu hohaʻa ki he ʻalu taʻe meʻakai ʻi ha ʻaho koeʻuhí he naʻá ku ʻaukai maʻa hoku tokouá.

Naʻe tali ʻe he Tamai Hēvaní ʻemau ngaahi lotú, pea naʻe faifai pea ʻā hake ʻa Kalisitiane. ʻOku teʻeki ke ne malava kakato, ka kuó ne fakalakalaka. ʻOku ou ʻilo ʻoku hanganaki mai ha fakaakeake fuoloa kia Kalisitiane. ʻOku mau kei lotua pē ia. ʻOku malava ha faʻahinga meʻa pē ʻi he tokoni ʻa e Tamai Hēvaní.