Ko Hono Maʻu ʻa e Kotoa ʻOku ʻa e Tamaí: Ko ha Tala-fakatātā Fakaonopooni
Meia ʻEletā Carlos E. Asay (1926–1999) ʻo e Kau Fitungofulú, “The Oath and Covenant of the Priesthood,” Ensign, Nov, 1985, 45.
Naʻe lolotonga teuteu ha talavou ke ngāue fakafaifekau. Naʻe loto ʻene ongomātuʻá ke totongi ʻene ngāue fakafaifekaú kapau te ne tauhi e ngaahi tuʻutuʻuni ʻo e ngāue fakafaifekaú mo ngāue mālohi. Naʻá ne loto ki ai.
Hili ʻene hū ki he malaʻe ʻo e ngāue fakafaifekaú, naʻá ne ʻilo ʻoku faingataʻa ange ʻa e ngāue fakafaifekaú ʻi he meʻa naʻá ne fakakaukau mai ki aí. Naʻe fakalotofoʻi kiate ia ʻa e ako ʻo e lea fakafonua foʻoú, fakaangaanga ki he ʻulungaanga fakafonua ʻoku kehé, mo e fehangahangai mo hono fakasītuʻaʻí. Naʻe feinga hono hoá mo e palesiteni fakamisioná ke poupouʻi ia, ka naʻá ne kei ongoʻi pē ke tuku ā.
Naʻá ne talaange ki heʻene palesiteni fakamisioná ʻoku fie foki ia ki ʻapi. Naʻe telefoni leva ʻene palesiteni fakamisioná ki he tamai ʻa e talavoú ʻo fakangofua ke telefoni mai ki hono fohá.
Naʻe fakahā ʻe he faifekaú ʻa ʻene loto foʻí ki heʻene tamaí. Naʻe talaange ʻe heʻene tamaí, “Naʻá ma nofo ʻamanaki ʻi ha ngaahi taʻu lahi ki he ʻaho te ke ngāue fakafaifekau taimi kakato aí. ʻOkú ma ʻilo hono mahuʻinga ke akoʻi ʻa e ongoongolelei ʻo Sīsū Kalaisí kiate kinautolu ʻoku ʻikai ke nau maʻú.”
Naʻe tali ange ʻe he fohá, “Tangataʻeiki, naʻe ʻikai ke u ʻilo ʻoku mahuʻinga fau ʻa e ngāue fakafaifekaú kiate koe.”
Ne tali ange ʻe he tamaí, “ʻOku taʻe hano tatau ia kiate au.” “Kuó u ngāue ʻi heʻeku moʻuí kotoa, langa ʻeku pisinisí, mo fakahū paʻanga koeʻuhí ko ha tokotaha pē: ko koe. Ko ʻeku taumuʻá ke tokonaki maʻau ha koloa ʻoku lahi.”
Ne hū hake hono fohá, “Ka, ʻe Tangataʻeiki, ʻoku ʻikai ke ne liliu ʻe ia ʻa e foʻi moʻoni ʻoku ʻikai ke u fiefiá …”
Ne tuʻusi atu ʻe he tangataʻeikí, “Te u tuku atu fēfē ʻeku pisinisí ke ke tokangaʻi kapau he ʻikai ke ke lava ʻo fakamoʻoniʻi koe ʻaki haʻo ngāue maʻá e ʻEikí ʻi ha taʻu nounou ʻe ua?”
Naʻe kiʻi longo e fohá ʻo fakalaulauloto ki he fehuʻi ʻa e tamaí.
Pea toki pehē ange ʻa e tamaí, “ʻE hoku foha, kapau te ke faivelenga ʻi he uiuiʻi ko ʻení mo fakamoʻoniʻi koe ʻokú ke taau, ʻe ʻaʻau ʻa e meʻa kotoa ʻoku ʻaʻakú.”
ʻI he ongo ki ai ʻa e palōmesi ko ʻení, naʻe talaange lototoʻa leva ʻe he fohá ki heʻene tamaí, “Te u nofo.”
Naʻe nofo ʻa e fohá, pea naʻe ngāue faivelenga. Naʻá ne muimui ki he ngaahi tuʻutuʻuni ʻo e ngāue fakafaifekaú pea ngāue mālohi. ʻIo, hili ʻene ngāue fakafaifekaú, naʻá ne maʻu ʻi ha taimi mei heʻene tamaí, ʻa e tofiʻa naʻe palōmesi angé, ʻa e ngaahi meʻa kotoa pē naʻe pau ke foaki ʻe he tamaí.