Ko e Kofu Mali ʻo ʻEku Faʻeé
ʻEniselika Fololesi ʻAlakapa, Kieletalo, Mekisikou
Ne u fuofua sio ki he kofu mali ʻo ʻeku faʻeé ʻi heʻeku kei siʻí. Naʻe kofukofu fakalelei ia ʻi ha loto puha, pea ʻoku ou manatu ki hono folahi fakalelei hake ia ʻe heʻeku faʻeé ke u lava ʻo sio ki ai. Naʻe fakaʻofoʻofa ʻaupito ia! Naʻá ku fuʻu fie tui ʻa e kofu ko iá ʻi he hokosia hoku ʻaho malí.
Naʻe faʻo fakafoki ia ʻe heʻeku faʻeé mo palōmesi te ne foaki mai ia ʻi he kahaʻú. Naʻá ne pehē ko e kofú ko ha meʻaʻofa makehe ia mei heʻeku tangataʻeikí. Naʻá ne hā mātuʻaki ʻofa mo fakaʻofoʻofa ʻi hono ʻū tā malí. Naʻe fakaʻofoʻofa ʻeku ongomātuʻá neongo naʻe ʻikai ke na Siasi.
Ne u ako kau ki he Siasí ʻi heʻeku feʻiloaki mo e tangata ʻe hoko ko hoku husepānití. Naʻe ngali kehe ʻa e feʻiloaki ko iá koeʻuhí, neongo naʻe ʻikai ke ne mālohi ʻi he Siasí, ka naʻe iku ʻema feʻiloakí ki he talanoa ʻo e ʻUluaki Mata-Meʻa-Hā-Maí. Naʻe fakaofo ʻa e talanoá kiate au, ka naʻe ʻikai ke u mateuteu ke tali ia.
Hili ʻema teiti ʻi ha māhina ʻe 16, naʻe hoko ʻo moʻoni ʻeku ngaahi fakaʻānauá ʻi heʻeku tui ʻa e kofu mali pātoho ʻo ʻeku faʻeé peá u lue atu ki hoku ʻofaʻangá. Ne u fuʻu ʻofa ʻiate ia. Naʻe pehē ʻe ha kakai tokolahi ne u hangē pē ko ʻeku faʻeé ʻi heʻene malí.
Ne ʻosi ha ngaahi taʻu, pea ʻi ai homa foha ʻe toko ua. ʻI he feinga hoku husepānití ke toe foki ki he lotú, naʻá ku fakafaingataʻaʻiaʻi ʻene ngaahi feingá. Neongo naʻe ʻikai ke u mālohi ʻi he siasi ʻo ʻeku kei talavoú, ka ne u faingataʻaʻia hono tali ha toe siasi kehe.
Ne faifai pea liliu ia hili ha taʻu ʻe 19 ʻo e nofo-malí. Naʻe foki hoku husepānití ki he lotú, pea hili ha ngaahi uike siʻi mei ai ne kamata ke u ʻalu mo ia. Ne tupulaki vave ʻa ʻeku fakamoʻoní, pea naʻe papitaiso au mo hilifakinima. Hili ha taimi siʻi mei ai ko ʻeku fakaʻamu taupotu tahá ke teuteu ke sila ki hoku husepānití ʻi he temipalé.
ʻI he hokosia ʻa e ʻaho fakafiefia ʻo ʻema silá, naʻá ku toe tui ʻa e kofu mali ʻo ʻeku faʻeé. Naʻe fakaleleiʻi ia ʻe ha kaungāmeʻa mei he lotú ke feʻunga ke tui ʻi he temipalé. Talu mei ai kuó u tui maʻu pē ia ʻi ai.
ʻI he mālōlō ʻeku tangataʻeikí pea fakaikuiku e ngaahi ʻaho ʻo ʻeku faʻeé, ne teʻeki pē ke ne mateuteu ke tali ʻa e Siasi kuo toe fakafoki maí. Ka naʻá ku fakahā kiate ia ha ngaahi meʻa fakaofo lahi kau ki hono Fakafoki Mai ʻo e ongoongoleleí. Naʻá ku toe fakahā foki kiate ia te ne fanongo ki he pōpoaki ʻo e ongoongolelei moʻoní, ʻi heʻene kolosi ʻi he veilí. Naʻá ku palōmesi ange ʻe hili ha taʻu ʻe taha, te u tui homa kofú ʻo fakafofongaʻi ia kae lava ke ne maʻu ʻa e ngaahi ouau ʻo e temipalé mo silaʻi ia ki heʻeku tamaí. Pea ne u fai ia.
ʻOku motuʻa hoku kofú he taimí ni, pea ʻoku ou ʻilo ʻe ʻi ai e ʻaho he ʻikai ke u toe tui ia. Kae ʻoua ke hoko mai ʻa e ʻaho ko iá, te u hokohoko atu ke tui ia ʻi he ʻofa—ki hoku husepānití, ki heʻeku faʻeé mo ʻeku tamaí, ki he kau mēmipa ʻo e fāmilí kuó u ngāue fakafofonga ki ai ʻi he temipalé, ki he ongoongolelei moʻoní, ki heʻeku ngaahi fuakava toputapú, pea ki heʻeku Tamai Hēvaní mo Hono ʻAlo ko Sīsū Kalaisí.