Ko e hā kuo pau ke u fakamolemoleʻi ai ha taha, ʻokú ne anga ʻaki hono fakatupu ke u mamahí?

Ko e fekau ke fakamolemoleʻi ʻa e kakai kotoa peé, ko ha meʻa ia ʻoku faingataʻaʻia ai hatau tokolahi. Ka kuo ʻosi folofola ʻa e ʻEikí kuo pau ke tau fakamolemoleʻi ʻa kinautolu telia naʻa tau fakahoko ʻa e angahala lahi angé (vakai, T&F 64:9–11). Mahalo he ʻikai fuʻu ʻuhinga fēfē kiate kitautolu ʻi he kamataʻangá, ka ʻoku feinga ʻa e ʻEikí ke tokoniʻi kitautolu ke tau hoko ʻo tatau ange mo Ia pea mo maʻu ha fiefia lahi ange. Kapau te tau hili ʻetau kavenga mafasiá kiate Ia pea tukuange ʻa e ʻitá, fakafāsifasí, mo e loto mamahí, te tau maʻu ʻa e melino ʻi he moʻuí ni mo ha ngaahi tāpuaki maʻongoʻonga ʻi ʻitāniti. Mahalo naʻa fie maʻu ha taimi, loʻimataʻia, ʻaukai, lotu, talatalaifale mo e kau taki lakanga fakataulaʻeikí, mo ha ngaahi ʻaʻahi ki he temipalé, ka ʻe ʻaonga.

Hangē ko ia kuo akoʻi ʻe Palesiteni Tietā F. ʻUkitofa, Tokoni Ua ʻi he Kau Palesitenisī ʻUluakí:

… Kuo pau ke tau siʻaki ʻetau loto mamahí. Ko ha konga ia ʻo e taumuʻa ʻo e moʻui fakamatelié ke tau ako ki he founga hono siʻaki e faʻahinga meʻa ko iá. Ko e founga ia ʻa e ʻEikí.

“Manatuʻi ‘oku fonu ‘a hēvani he kakai ʻoku nau faitatau he meʻa ko ‘ení: Kuo fakamolemoleʻi kinautolu. Pea ʻoku nau faʻa fakamolemole” (“ʻOku Maʻu ʻa e ʻAloʻofá ʻe he Kau Manavaʻofá,” Liahona, Mē 2012, 77).