Naʻe Folofola ʻAki ʻe he ʻEikí ʻa e Fiemālié kiate Au
Tulisa Tomikinisoni Liki, ʻAlesona, USA
Kuo puke homa ʻofefine ko Kalí ʻi ha ngaahi ʻaho siʻi, peá u fakakaukau ko e momoko pē. Ka ʻi he fakalalahi ʻa e ngaahi fakaʻilongá, ne kamata ke u fakakaukau mahalo ʻoku kovi ange.
Naʻe fakapapauʻi pea fakalahi ʻa ʻeku manavaheé ʻi heʻene sio toketaá—naʻe puke ʻa Kali ʻi he suka kei siʻí. Naʻe kamata ke ne māʻumohe ʻi he tōlalo ʻa e suká pea fie maʻu ke ʻalu fakavavevave ki falemahaki. Naʻá ku lotua ʻi hoku lotó ke u fiemālie pea ke lava ʻa e kau toketaá ʻo tokoniʻi ia.
ʻI heʻemau aʻu atu ki he loki fakatuʻutāmakí, ne ngāue fakavavevave ʻa e kau toketaá mo e kau nēsí ʻi he feinga ke fakahaofi iá. Naʻá ku tautapa ki heʻeku Tamai Hēvaní ki ha fakafiemālie mo ha nonga.
ʻI ha momeniti lōngonoa, ne ʻoange ʻe hoku husepānití mo ʻene tamaí ha tāpuaki lakanga fakataulaʻeiki kia Kali. ʻI hono tāpuakí, naʻe fakapapauʻi ange ʻe hoku husepānití ko e finangalo ia ʻo ʻene Tamai Hēvaní ke ne moʻui. Naʻe kamata ke u ongoʻi fiemālie.
Ne u fuʻu ongosia hili ha ngaahi houa lahi ange ʻo hono huhu, sivi, mo vakaiʻi ʻe he kau toketaá ʻa Kali ki ha fakalakalaká. Naʻe kamata ke ngaongao hono lokí ʻi he 1:00 a.m. Ne ʻikai ke u ʻilo e meʻa ke ʻamanaki ki aí, naʻe ʻikai ke u lava ʻo mohe, pea naʻá ku ongoʻi tuenoa.
Naʻá ku toʻo hake ha tatau ʻo e Tohi ʻa Molomoná ne ʻomi ʻe hoku tokouá ki he falemahakí peá u lotu ke ʻomi ʻe he folofolá ʻa e fakafiemālie naʻá ku fie maʻú. Naʻe fakaava hake ʻa e tohí ki he ʻAlamā 36:3. ʻI heʻeku lau iá, naʻá ku ongoʻi naʻe folofola mai ʻa e ʻEikí kiate au: “ʻOku ou ʻiloʻi ʻilonga ʻa kinautolu ʻe falala ki he ʻOtuá ʻe tokoniʻi ʻa kinautolu ʻi honau ngaahi ʻahiʻahiʻí, mo honau ngaahi tuʻutāmakí, mo honau ngaahi mamahí, pea ʻe hiki hake ʻi he ʻaho fakaʻosí.”
Ne tuʻo ua ʻeku ongoʻi fiemālie he pō ko iá. Naʻá ku ʻiloʻi naʻe ʻafioʻi kimautolu ʻe he Tamai Hēvaní. Naʻá Ne fie maʻu ke u ʻiloʻi naʻá Ne ʻi ai pea naʻe fie maʻu ke u tui kiate Ia.
ʻI heʻeku fakakaukau atu ki he ngaahi meʻa naʻe hokó, ne u fakakaukau ai ki he founga kuo tāpuekina ai kimautolu ʻe he ʻEikí. Ne u ongoʻi ha fie maʻu fakavavevave ke ʻave ʻa Kali ki he toketaá. Ne mau aʻu lelei ki he falemahakí. Ne aʻu vave ange ʻa e kau maʻu lakanga fakataulaʻeikí ke fakahoko ha faingāue.
Talu mei he ʻaho ko iá kuo mau fokotuʻu ha taimi-tēpile ki hono vakaiʻi ʻa e suka ʻi he totó mo mateuteu ʻi he meʻakaí. Kuo mau ako ʻa e founga ki hono tokangaʻi e suká ʻi hono uesia e sinó. ʻOku hokohoko atu ʻa e mahaki ʻo Kalí ke hoko ko ha ʻahiʻahi, ka kuo mau ako ke falala ki heʻemau Tamai Hēvaní ʻi he ʻaho kotoa pē.
ʻOku ʻikai ke u toe fie foua ʻa e ʻaho ko iá ʻi he falemahakí, ka ko e ʻaho ia te u houngaʻia ai ʻo taʻengata. Ko ha ʻaho ia ʻo e ako, ki hono fakaʻaongaʻi ʻo e tuí, ʻo e ongoʻi houngaʻiá. Ne u ʻiloʻi ʻoku ʻafioʻi ʻe he Tamai Hēvaní ʻa ʻEne fānaú takitaha pea te Ne poupouʻi moʻoni kitautolu ʻi hotau ngaahi ʻahiʻahí.