Naʻe lea mai ʻa Sisitā Sipāfooti kiate Au

Ne u vaʻinga ʻi ha keimi falekai ʻi he ʻinitanetí kuo fuoloa e poʻulí ʻi he taimi ne lue mai ai hoku husepānití ʻo talamai ʻe ʻalu ia ʻo mohe.

“Te u toki hū atu,” ko au atu ia ki ai.

“Te u toki tui pē he taimi te u sio ai ki aí,” ko ia mai ia.

Naʻá ku vaʻinga ʻi ha keimi ʻa ia ko ʻete ngaohi ha meʻatokoni ʻi ha falekai ki ha kakai (customers). Ne u sio ki he screen ʻo e komipiutá mo pehē, “ʻE moho ʻeku meʻakaí ʻi ha miniti ʻe 15 mei heni.”

Ke u hangahanganoa lolotonga ʻeku tatalí, ne u toʻo hake ʻa e Ngaahi ʻŌfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá, ʻa ia ne tuku ʻi he funga tesí talu mei he taimi naʻá ku maʻu ai ʻi he Fineʻofá. Naʻe kamata ke u lau ʻa e talamuʻakí. ʻI he peesi tolú ne u maʻu ai ʻeni ne fai ʻe Pele S. Sipāfooti, ko e palesiteni lahi hono hiva ʻo e Fineʻofá.

“ʻOku ou tui ʻe lelei ki he fefine angamaheni ʻo e ʻaho ní, ke ne vakaiʻi ʻa e ngaahi meʻa ʻoku manako aí, vakavakaiʻi mo e ngaahi ngāue ʻoku kau ki aí pea feinga ke toe faingofua ange ʻene moʻuí, ʻo ne fakamuʻomuʻa e ngaahi meʻa ʻoku mahuʻingá pea tō ʻene fakamamafá ʻi he meʻa ʻe maʻongoʻonga mo tuʻuloa taha hono ngaahi olá, ka ne siʻaki ʻa e ngaahi ngāue ʻoku ʻikai fuʻu ʻaonga hono olá.” (2011, xiii).

ʻOku teʻeki tō loloto pehē ha meʻa kuó u lau, ʻo makehe ange mei he folofolá. Naʻe lea mai ʻa e fefine ko ʻení kiate au ʻa ia ne mālōlō ʻi he taʻu ʻe 30 kuo hilí. ʻOku hangē ʻoku ngali fenāpasi ange ʻene ngaahi leá ʻi he ʻahó ni mei he taimi naʻá ne leaʻaki aí.

Ne u ʻilo vave leva he ʻikai te u toe vaʻinga keimi ʻi he ʻinitanetí. Ne u tāmateʻi e komipiutá, peá u talaange ki hoku husepānití ʻeku filí. ʻI he ʻaho hono hokó naʻe ʻikai ke u toe fakamoʻui e komipiutá. Ka u nofo leva ʻo fikaʻi atu ʻa e houa lahi kuó u fakamoleki ʻi he vaʻinga keimí he ʻaho kotoa pē.

Ne u liunga e houa ʻe tolu ʻi he ʻahó ʻaki e 365 (lahi e ʻaho ʻi he taʻú) pea vahevahe ʻaki e 24 (lahi e houa ʻi he ʻaho ʻe tahá). Ne u ʻohovale lahi ʻi heʻeku ʻilo kuó u fakamoleki e ʻaho ʻe 45.62 ʻi he taʻu ʻe taha. Kuo ʻosi ʻo taʻengata atu ʻa e ngaahi houa mo e ngaahi ʻaho mahuʻinga ia ko iá. Ne u mei lava ʻo fakaʻaongaʻi ia ke lau ʻeku folofolá, maʻu ha taimi mo hoku husepānití mo e fānaú, ngāue tokoni ki he niʻihi kehé, pe fua hoku uiuiʻí.

ʻOku faʻa lea ʻaki foki ʻe he Kau Taki Māʻolungá ʻa e kaveingá ni lolotonga ʻa e konifelenisi lahí. Ka naʻe ʻikai pē mahuʻingamālie kiate au, peá u pehē pē ʻoku ʻikai haʻane kākunga kiate au.

ʻOku ou houngaʻia hono tokoniʻi au ʻe he Laumālie Māʻoniʻoní ke u fakatokangaʻi ko e lea mai ʻa e Kau Taki Māʻolungá—mo Pele S. Sipāfootí—kiate au.