150 ka Magamit nga mga Templo
Atol sa Dominggo sa buntag nga sesyon sa komperensya, gipahibalo ni Presidente Thomas S. Monson ang mga plano sa pagtukod og dugang nga upat ka mga templo: sa Belém, Brazil; Quito, Ecuador; Lima, Peru; ug Harare, Zimbabwe.
Sukad sa milabayng kinatibuk-ang komperensya, kini nga mga kalihokan nga naglakip sa mga templo ang nahitabo:
Pagpahinungod ug Gipahinungod Pag-usab
Uban sa pagpahinungod sa Provo City Center Temple sa Provo, Utah, USA, ang Simbahan karon duna nay 150 ka magamit nga mga templo sa tibuok kalibutan. Ang templo gipahinungod niadtong Marso 20, 2016, mga adlaw lang sa wala pa ang ika-180 nga anibersaryo sa Marso 27, 1836, nga pagpahinungod sa Kirtland Temple, ang unang templo sa Pagpahiuli.
Tulo pa ka laing mga templo ang gipahinungod o gipahinungod pag-usab: ang Montreal Quebec Temple niadtong Nobyembre 2015, ang Tijuana Mexico Temple niadtong Disyembre 2015, ug ang Suva Fiji Temple niadtong Pebrero 2016.
Ang mga pagpahinungod gi-iskedyul usab alang sa Sapporo Japan Temple, Agosto 21, 2016; ang Philadelphia Pennsylvania Temple, Septyembre 18, 2016; ang Fort Collins Colorado Temple, Oktubre 16, 2016; ang Star Valley Wyoming Temple, Oktubre 30, 2016; ug ang Hartford Connecticut Temple, Nobyembre 20, 2016.
Ang giayo nga Freiberg Germany Temple ipahinungod pag-usab karong Septyembre 4, 2016.
Gipangtukod ug Gipang-ayo
Ang pagpangtukod nagpadayon sa Concepción Chile Temple, Paris France Temple, Rome Italy Temple, ug sa mosunod nga mga templo sa Estados Unidos: Cedar City Utah, Meridian Idaho, ug sa Tucson Arizona. Ang mga petsa nga mahuman magsugod sa 2016 hangtud sa 2018. Ang kinatibuk-ang pagtukod gihunong para sa Fortaleza Brazil Temple. Ang Frankfurt Germany, Jordan River Utah, ug ang Idaho Falls Idaho nga mga temple gipang-ayo pa.
Mga Groundbreaking
Gipahigayon ang mga groundbreaking alang sa Lisbon Portugal Temple niadtong Disyembre 2015 ug sa Barranquilla Colombia Temple ug sa Kinshasha Democratic Republic of the Congo Temple niadtong Pebrero 2016. Ang groundbreaking sa Durban South Africa Temple gihimo niadtong Abril 9, 2016.
Pagplano ug Pagpangandam
Kini nga mga templo gipahibalo na apan padayon pa gihapon ang pagplano ug mga ang-ang sa pagpangandam: Abidjan Ivory Coast (Côte d’Ivoire), Arequipa Peru, Bangkok Thailand, Port-au-Prince Haiti, Rio de Janeiro Brazil, Urdaneta Philippines, ug Winnipeg Manitoba.