Elder W. Mark Bassett

Matag summer sa gamay pa nga bata, si W. Mark Bassett mobiyahe kuyog sa iyang pamilya gikan sa ilang balay sa Sacramento, California, USA, aron mobisita sa iyang lola sa Alabama, USA. Atol sa ilang mga adlaw sa pagbiyahe didto, sigurohon gayud sa pamilya nga makabisita sa makasaysayan nga mga dapit.

Pagbisita man sa makasaysayan nga mga nataran sa Nauvoo, Illinois, o maglakaw ngadto sa Sagradong Kakahoyan sa Palmyra, New York, si Elder Bassett nahinumdom sa labihan ka talagsaong mga pagbati diha kaniya—bisan gamay pa siya—dihang gibisita niya kadtong sagradong mga dapit.

“Dunay among nabati didto,” miingon siya. “Tungod niadto naporma ang akong pagpamatuod, pinaagi sa ginagmayng kasinatian.”

Kana nga pagpamatuod nga naangkon sa batan-on pa ko nahimong tinubdan sa kalig-on alang ni Elder Bassett sa tibuok niyang kinabuhi.

Natawo niadtong Agosto 14, 1966, ngadto kang Edwina Acker ug William Lynn Bassett, sa Carmichael, California, si Elder Bassett ang ikaduha sa lima ka anak. Ang pagserbisyo sa Simbahan ug pagsunod sa ebanghelyo maoy importanting mga prayoridad sa iyang pamilya.

Human makaserbisyo og misyon sa Guatemala Guatemala City Mission sugod 1985 hangtud 1987, mibalhin si Elder Bassett sa Provo, Utah, aron moeskwela sa Brigham Young University. Naminyo siya ni Angela Brasher didto sa Salt Lake Temple niadtong Disyembre 20, 1989. Mga ginikanan sila sa lima ka anak ug adunay duha ka apo.

Niadtong 1991, si Elder Bassett nakakuha og degree sa accounting gikan sa BYU ug sa wala madugay mibalhin kauban sa iyang pamilya balik sa Sacramento area aron motrabaho sa wholesale auto auction nga industriya. Nagtrabaho siya isip controller sa Brasher’s Sacramento Auto Auction ug siya ang dako-dakong opisyal sa pinansyal ug kaubanang tag-iya sa West Coast Auto Auctions, Inc., diin siya ang nagdumala sa automobile auctions sa tibuok kasadpan sa Estados Unidos.

Si Elder Bassett nakaserbisyo og daghang kapasidad sa Simbahan, lakip ang pagka-Young Men president, bishop, high councilor, stake president, presidente sa Arizona Mesa Mission sugod 2007 hangtud 2010, ug Area Seventy.