Elder Joaquin E. Costa

Usa ka higala nga hilig sa pagtupo-tupo mipahiluna ni Joaquin Esteban Costa sa usa ka dalan nga misangput sa iyang pagkakabig sa ebanghelyo ni Jesukristo, usa ka kaminyoon sa templo, ug pagpangulo sa Simbahan.

Si Joaquin Costa natawo niadtong Marso 8, 1965, kang Eduardo J. Costa ug Graciela M. Fassi. Isip usa ka estudyante sa unibersidad sa Buenos Aires, Argentina, usa ka higala, nga si Alin Spannaus, karon Area Seventy, mipaila kaniya ngadto ni Renee Varela. Ang ikaduhang henerasyon nga Santos sa Ulahing mga Adlaw nga si Renee nagpanuko sa pagpakig-date sa usa ka 21-anyos nga dili miyembro sa Simbahan. Human sa ika-tulo nga pakig-date nakaingon si Renee nga “ganahan kaayo ko niya” ug mibati nga dili na sila mag-date pag-usab. Pagtapos sa tuig nga ting-eskwela, mipauli siya sa iyang dapit nga natawhan, sa Entre Rios, Argentina.

Gidawat ni Renee ang tawag nga moserbisyo sa Chile Osorno Mission. Dihang nauli na siya, gihan-ay ni Brother Spannaus nga siya ug si Joaquin manambong og usa ka party, diin mihangyo si Joaquin nga makig-date kaniya. “Nag-ampo ko og mihukom nga hatagan nako siya og higayon,” miingon si Sister Costa.

Sa wala madugay, nagkat-on si Joaquin sa Simbahan. Dihang nagtuon siya uban sa mga misyonaryo, mihangyo si Renee nga mag-ampo siya ug mobasa sa Basahon ni Mormon gikan sa sinugdanan hangtud sa katapusan.

“Wala pa siya makaabut sa katapusan nakadawat na siya og lig-ong pagpamatuod,” miingon si Sister Costa. “Wala siya magpabunyag aron lang ko malipay. Nag-date pa mi og kapin sa usa ka tuig ug dayon nagminyo sa Buenos Aires Argentina Temple niadtong 1989.”

Nakuha ni Elder Costa ang bachelor’s degree sa economics niadtong 1987 gikan sa University of Buenos Aires. Isip bag-ong magtiayon namalhin sila sa Provo, Utah, USA, diin nakakuha siya og master’s degree sa business administration niadtong 1994 gikan sa Brigham Young University. Sila ug ang nagtubo nilang pamilya, nga naglakip sa upat ka anak, namuyo sa Chicago, Illinois, USA, dihang nagtrabaho siya sa usa ka multinational investment banking ug financial services nga korporasyon. Ang iyang pagpanarbaho sa banko midala niya og balik sa Argentina sulod sa pipila ka tuig ug dayon ngadto sa Czech Republic ug dayon sa Sultanate sa Oman. Sulod sa milabayng duha ka tuig, siya ug ang iyang pamilya mipuyo sa Lima, Peru, diin didto nagtrabaho siya sa usa ka investment firm nga Danish nga nag-focus sa microfinance.