Elder Gary B. Sabin

Tulo ka Christmas tree ang nagpabilin sa panumduman ni Elder Gary B. Sabin.

Ang una mao ang matahum nga Christmas tree sa iyang pagka-batan-on. Dihang gikatkat niya ang Christmas tree aron kuhaon ang kendi nga porma og sungkod, diin ang tibuok Christmas tree nahagsa.

Ang ikaduha mao ang sanga sa evergreen nga iyang nakit-an samtang nagmisyon siya sa Belgium ug sa Netherlands niadtong 1973 hangtud 1975. Si Elder Sabin ug ang iyang kompanyon midala sa sanga pauli sa ilang apartment ug gihimong bitayanan sa mga Christmas card nga ilang nadawat gikan sa ila.

Ang ikatulo mao ang Christmas tree nga hinimo gamit ang mga Christmas light nga gihigot sa stand sa IV [dextrose] tupad sa higdaanan sa iyang anak nga babaye sa ospital. Ang usa sa tulo ka anak sa mga Sabin nga nag-antus sa cystic fibrosis, ang anak niyang babaye nakadawat og double-lung transplant usa ka tuig human namatay ang iyang igsoong lalaki sa mao gihapon nga sakit.

“Mas daghan kami og nakat-unan gikan sa among mga anak kay sa ilang nakat-unan gikan namo,” miingon si Elder Sabin.

Isip General Authority mahinumduman niya ang mga Christmas tree ug mga leksyon nga iyang nakat-unan gikan niini. Ang matag kahoy dunay mahinungdanong mga porsyon sa iyang panaw—gikan sa pagkagamayng bata nga gustong kuhaon ang kendi ngadto sa pagkamisyonaryo nga nagtudlo sa plano sa kaluwasan dayon ngadto sa pagkaamahan kinsa misalig sa plano ug sa gugma sa Manluluwas nga mosuporta sa iyang pamilya latas sa mga pagsulay sa mortalidad.

Si Gary Byron Sabin natawo sa Provo, Utah, USA, niadtong Abril 7, 1954, ngadto kang Marvin E. ug Sylvia W. Sabin. Naminyo siya ni Valerie Purdy niadtong Agosto 1976. Mga ginikanan sila sa lima ka anak; ang ikaunom nga bata namatay dihang gianak kini.

Human makagradwar sa Brigham Young University sa Provo, si Elder Sabin nakakuha og master’s degree sa management sa Stanford University.

Si Elder Sabin nakaserbisyo og daghang calling sa Simbahan, lakip ang pagka-bishop, stake president, ug Area Seventy. Nakatrabaho siya isip founder, chairman, ug CEO sa daghang kompanya, lakip ang Excel Realty Trust, Price Legacy, Excel Realty Holdings, ug Excel Trust.

Niadtong 1993, si Elder ug Sister Sabin mihimo og Sabin Children’s Foundation, usa ka organisasyon gituyo lang gayud alang sa medical nga panginahanglan sa mga bata.