Elder Peter F. Meurs

Sa batan-on pa siya, si Peter Meurs ug ang iyang pamilya nagpuyo tupad sa silingan nga dunay negosyo nga “moayo og bisan unsa” nga shop alang sa mga ekipo sa pagpanguma. Si Peter ug ang suod niyang higala naa kasagaran sa shop magkuri-kuri sa mga ekipo sa panguma ug mohimo og gagmayng motor ug mga go-kart. Si Peter sa wala madugay mieskwela og mechanical engineering sa Monash University sa Melbourne, Australia.

Samtang padayon ang iyang pag-eskwela sa edad nga 18, gipahibalo niya ang unibersidad nga mohunong una siya og duha ka tuig aron moserbisyo og misyon alang sa Simbahan. Giingnan siya nga usa ra ka tuig ang tagal nga pwede; kon molapas og dugay nagpasabut nga mawala niya ang iyang luna sa programa. Midesider siya nga dili moserbisyo.

Sa wala madugay human niadto, nadungog niya si Presidente Spencer W. Kimball (1895–1985) nga namahayag atol sa kinatibuk-ang komperensya nga ang matag takus nga batan-ong lalaki kinahanglang magmisyon (tan-awa sa “Planning for a Full and Abundant Life,” Ensign, Mayo 1974, 87).

“Sama og nakigsulti siya kanako. Direkta gyud kini ngari nako,” miingon si Elder Meurs. Bisan pa, midisider siya nga magmisyon. Usa ka semana sa wala pa siya mobiya, nakadawat siya og sulat gikan sa unibersidad nagtugot kaniya nga pwede rang moundang og duha ka tuig.

Mibalik og eskwela si Peter human sa iyang misyon, apan ang iyang misyonaryo nga pagserbisyo, miingon siya, mao ang “pinakamaayong edukasyon nga akong nadawat.” Ang ebanghelyo mitudlo kaniya nga “ang pagtabang og mga tawo nga molampus maoy pinakaimportante nga baruganan sa pagkalider.”

Dihang nahuman niya ang bachelor’s degree sa mechanical engineering, si Elder Meurs mitrabaho isip project engineer sa Esso Australia ug siya ang founding partner sa WorleyParsons Limited. Bag-o lang siyang nagserbisyo isip director sa development alang sa Fortescue Metals Group.

Pagkahuman sa iyang misyon, nagminyo siya sa usa ka babaye nga iyang gitawag og suod nga higala, si Maxine Evelyn Thatcher, pagka Enero 2, 1979, sa Hamilton New Zealand Temple. Sila dunay upat ka anak ug siyam ka apo.

Si Elder Meurs—natawo niadtong Disyembre 21, 1956, sa Warrnambool, Victoria, Australia, ngadto kang Frederik ug Lois Jones Meurs—nakaserbisyo siya og daghang mga calling, lakip ang pagka elders quorum president, ward organist, ward ug stake Young Men president, public affairs director, branch ug district president, bishop, stake president, ug Area Seventy.