Ang Pag-usab sa Pagkat-on sa Ebanghelyo ug Pagtudlo

Ang pagkat-on, pagsunod, ug pagtudlo sa ebanghelyo mahinungdanon para sa atong personal nga kalamboan ug mahinungdanong mga bahin sa atong pagsimba sa adlaw nga Igpapahulay. Isip kabahin sa padayong paningkamot sa pagtabang nga mouswag ang mga miyembro samtang magpalig-on sila sa ilang pagtuo sa Langitnong Amahan ug ni Jesukristo ug mapalambo ang pagsimba sa adlaw nga Igpapahulay, ang Unang Kapangulohan ug ang Korum sa Napulog Duha ka mga Apostoles mipaila atol sa kinatibuk-ang komperensya nga mga miting sa pagpangulo og usa ka bag-ong paningkamot nga mapalambo ang pagtudlo ug pagkat-on sa ebanghelyo. Ang mga miyembro gidapit sa:

1. Paggamit sa mga baruganan nga naa sa Pagtudlo sumala sa Pamaagi sa Manluluwas. Kini nga bag-ong manwal nagtutok sa yano apan importante nga mga baruganan nga gigamit sa Batid nga Magtutudlo. Ang tumong sa matag magtutudlo, sigun sa gisulti sa manwal, mao “ang pagtudlo sa lunsay nga doktrina sa ebanghelyo, pinaagi sa Espiritu, aron sa pagtabang sa mga anak sa Dios sa pagpalambo sa ilang hugot nga pagtuo diha sa Manluluwas ug mahimong mas sama Kaniya.”

Bisan og ang manwal gituyo alang niadtong dunay calling sa pagtudlo, ang tanan makakita nga mapuslanon kini sa pagkat-on unsaon sa pagtudlo sa pamaagi sa Manluluwas. Makabenipisyo ang mga ginikanan pinaagi sa paggamit sa mga baruganan nga naa niana nga booklet kon magtudlo diha sa panimalay.

2. Pag-apil sa mga miting sa teacher council. Ang mga miting sa teacher council dili sama sa una nga teacher improvement nga mga kurso. Isip mga council, kini nga mga miting makahatag og mga oportunidad sa mga magtutudlo nga mahisgutan ug makat-unan gikan sa usag usa ang mga baruganan sa Pagtudlo sumala sa Pamaagi sa Manluluwas. Kini nga mga miting, nga buhaton kausa sa usa ka bulan atol sa mga miting sa Dominggo, ipaila sa tibuok kalibutan sa tibuok tuig sa 2016.

3. Pagmakugihon nga tigkat-on sa ebanghelyo. Ang mga miyembro ug mga magtutudlo parehong giawhag nga magmakugihong mga tigkat-on sa ebanghelyo diha sa panimalay. Ang pagkat-on ug pagsunod sa ebanghelyo atol sa semana makaandam sa mga miyembro sa pag-apil sa mga leksyon sa Dominggo, nga maoy makamugna og mas makahuluganong mga kasinatian sa pagkat-on alang sa tanan.

Isip mga anak sa atong Langitnong Amahan, tanan kita dunay potensyal nga mahimong sama Kaniya. Si bisan kinsa nga andam sa pagkat-on ug mosunod sa ebanghelyo mas mahisama sa atong langitnong mga ginikanan ug makabalik sa pagpuyo uban kanila. Ang pagsimba sa diha sa simbahan ug sa panimalay makatabang nga atong mapalig-on kana nga matang sa pagtuo nganha sa Langitnong Amahan ug ni Jesukristo.