Sister Jean B. Bingham

Hapit mag-unom ka tuig, si Sister Jean Barrus Bingham malipayong nagserbisyo sa iyang calling sa Primary general board. Nakabisita siya sa balay sa mga miyembro ug nakatambong og mga Primary, nagsaksi sa lig-ong mga pagtuo sa mga Santos sa Ulahing mga Adlaw—ilabi na sa mga bata sa Primary—sa tibuok kalibutan.

Si Sister Bingham, nga bag-o lang gi-sustain isip unang magtatambag sa kinatibuk-ang kapangulohan sa Primary, migahin sa kadaghanan sa iyang panahon sa pagtudlo, pag-atiman, ug paghigugma sa mga bata. Kauban man sa nagtubo niyang mga manghod, sa kaugalingon niyang duha ka anak nga babaye, iyang sinagop nga duha ka anak nga babaye, mga apo, mga bisita sa iyang balay, o sa iyang mga nahimamat isip sakop sa Primary general board, siya ang dumadapig ug tinubdan sa kalig-on alang sa kadaghanan.

“Ang matag bata dunay talagsaong potensyal, ug kon tan-awon nato sila pinaagi sa mga mata sa Langitnong Amahan, matabangan nato silang mamahimo nga maoy gidesinyo para kanila,” miingon siya.

Natawo niadtong Hunyo 10, 1952, sa Provo, Utah, USA, ngadto kang Edith Joy Clark ug Robert Rowland Barrus, si Sister Bingham ang ikatulo sa siyam nga anak. Sa tulo pa lang ka bulan ang iyang edad, namalhin ang iyang pamilya ngadto sa Indiana aron ang iyang papa makapadayon sa iyang pag-eskwela. Sa unang unom ka tuig sa iyang kinabuhi, si Sister Bingham ug ang iyang pamilya nakapuyo og upat ka estado.

Human makagradwar sa high school sa New Jersey, si Sister Bingham mibalhin sa Provo, Utah, aron moeskwela sa Brigham Young University. Sa ikaduha niyang tuig didto, nahimamat niya ang umaabut niyang bana, si Bruce Bryan Bingham, usa ka batan-ong mag-uuma gikan sa Illinois kinsa nabunyagan sa tin-edyer pa dungan sa iyang mga ginikanan. Naminyo sila niadtong Disyembre 22, 1972, sa Provo Utah Temple.

Ang tibuok kinabuhi niyang pagserbisyo sa Simbahan naglakip sa panahon isip ward Primary president, Young Women president, magtatambag sa kapangulohan sa Relief Society, stake Young Women president, temple worker, ug titser sa early-morning nga seminary.

“Ang sumbanan nga akong nakita sa iyang kinabuhi, sulod sa 43 ka tuig namong kaminyoon, usa ka padayong pagsunod sa mga pag-aghat sa Espiritu,” miingon si Brother Bingham bahin sa iyang asawa. “Siya, sa tanang higayon, mihimo sa unsay gusto sa Ginoo nga iyang buhaton.”