Elder Valeri V. Cordon

Sugod sa iyang inahan, kinsa namiyembro sa Simbahan sa edad nga 16, si Elder Valeri Vladimir Cordón Orellana nakadawat og pundasyon sa ebanghelyo nga nakatabang kaayo kaniya dihang mibalhin siya og 95 ka milyas (150 km) ang gilay-on gikan sa iyang lungsod nga gipuy-an sa Zacapa, Guatemala, aron mag-high school sa Siyudad sa Guatemala ug moeskwela og computer science.

“Ang pinakaimportanting butang nga akong nadawat gikan sa akong inahan mao ang pagtahud sa tanang butang sa Simbahan sa hilabihan nga kabalaan,” miingon si Elder Cordón, anak ni Ovidio ug Ema Orellana Cordón.

Si Elder Cordón natawo niadtong Pebrero 19, 1969, sa Siyudad sa Guatemala, ug sa pagkabata nagpuyo sa Zacapa. Ang iyang papa miadto sa Chicago, Illinois, sa Estados Unidos sa pagpanarbaho. Samtang tua didto, naimpluwensya siya sa mga miyembro sa Simbahan ug nakadawat sa mensahe sa ebanghelyo gikan sa mga misyonaryo. Ang pamilya na-sealed sa Mesa Arizona Temple niadtong 1972, dihang si Valeri tulo ka tuig pa ang edad.

Si Elder Cordón miingon nga nagtubo siya nga ganahan sa ebanghelyo samtang kanunay niyang madungog ang iyang mama nga mokanta sa mga himno sa Simbahan ug sa mga kanta sama sa “Ako Anak sa Dios” ug “Unta Tawgon ko Nila og Misyon.” Si Elder Cordón miserbisyo sa El Salvador Mission sugod 1987 hangtud 1989.

Naminyo siya ni Glenda Zelmira Zea Diaz niadtong Marso 25, 1995, sa Siyudad sa Guatemala Guatemala Temple. Si Sister Cordón nagplano gayud nga magmisyon, apan nausab ang iyang plano dihang nahimamat niya si Valeri. Sa wala madugay nakita ni Sister Cordón si Elder Cordón nga mao ang batan-ong lalaki nga nakakuha sa iyang atensyon dihang nakita niya ang iyang litrato sa usa ka magasin sa Simbahan pila ka tuig nang milabay. Sila dunay tulo ka anak nga babaye.

Si Elder Cordón nakakuha og bachelor’s degree sa Mariano Galvez University sa Guatemala niadtong 2010 ug usa ka degree sa master sa business administration gikan sa Massachusetts Institute of Technology niadtong 2012. Nagtrabaho siya isip information systems director sa usa ka pharmaceutical nga kompanya ug sukad niadtong 2012 sa Pepsico Foods Mexico, Central America ug sa Caribbean.

Sa panahon sa iyang tawag, si Elder Cordón nagserbisyo sa Ikaupat nga Korum sa Seventy sa Central America Area. Nagserbisyo siya sa kapangulohan sa Costa Rica San José East Mission sugod 1998 hangtud 2000.