Elder Evan A. Schmutz

Si Elder Evan Antone Schmutz mapasalamaton sa mga kasinatian sa pagpadayag nga gisalig kaniya sa Ginoo. Ang iyang pagkakabig sa ebanghelyo napalig-on pinaagi sa regular nga pagtuon, pagserbisyo sa gingharian, ug pagtuman sa iyang mga pasalig o komitment sa Dios.

Natawo niadtong Hunyo 6, 1954, sa St. George, Utah, USA, ngadto kang Richard ug Miriam Schmutz, si Elder Schmutz sayo nga nakakat-on mahitungod sa gahum sa pag-ampo. Isip usa ka Cub Scout nakabaligya siya og tiket nga nagkantidad og U.S. $17 sa usa ka jamboree apan dili makit-an ang kwarta dihang panahon na kining ihatag. Giawhag siya sa iyang mama nga mag-ampo, ug ang Ginoo mipadayag kaniya sa tukma gayud kon asa ang kwarta. Lig-on kadto nga kumpirmasyon sa gugma sa Dios ug kahibalo bahin kaniya.

Sa edad nga 18, nawad-an og magulang nga babaye si Elder Schmutz tungod sa aksidente sa awto. Dako kaayo kadto og epekto kaniya, nga nagdala og makahuluganong mga kasinatian nga espiritwal.

Wala madugay human niadto gitawag siya nga magmisyon ug moreport para sa training. Nag-ampo siya og personal nga saksi sa ebanghelyo. Samtang naniid sa pipila ka mga instruktor nga nagtudlo mahitungod sa Unang Panan-awon, miingon siya, “Nakadawat ko og pagpamatuod nga labihan ka kusog nga naglisud ko sa pagpabilin sa kwarto.”

Human sa pagserbisyo og misyon sa North Carolina Greensboro Mission, gitakda ni Elder Schmutz ang pagpadayon sa inadlawng pagtuon sa kasulatan sa nahibilin niyang kinabuhi. “Akong nakita ang labihang kalipay, personal nga pagkat-on, ug panabut pinaagi sa sayo sa buntag nga pagtuon sulod sa dugay kaayong panahon.”

Naminyo si Elder Schmutz kang Cindy Lee Sims niadtong Pebrero 3, 1978, sa Provo Utah Temple. Nakakuha si Elder Schmutz og degree sa English ug usa ka juris doctorate gikan sa Brigham Young University. Nagtrabaho siya nga propesyunal sa usa ka kompanya sa pamalaod sugod 1984 hangtud 2016.

Samtang nagdumala sa panginahanglan sa lima ka anak, si Elder Schmutz nakaserbisyo isip high councilor, bishop, sakop sa stake presidency, presidente sa Philippines Cebu Mission (2011–14), branch president sa missionary training center, ug sakop sa Ikalima nga Korum sa Seventy.