Ngaahi Temipale ʻe 150 ʻOku Ngāueʻakí
Lolotonga e fakataha pongipongi Sāpate ʻo e konifelenisí, naʻe fanongonongo ai ʻe Palesiteni Tōmasi S. Monisoni ha palani ke langa ha temipale kehe ʻe fā: ʻi Belém, Brazil; Quito, Ecuador; Lima, Peru; pea mo Harare, Zimbabwe.
Talu mei he konifelenisi lahi fakamuimuitahá, ko e ngaahi meʻa ʻeni kuo hoko ʻi he ngaahi ʻekitivitī fekauʻaki mo e temipalé:
Fakatapuí mo e Toe Fakatapuí
ʻI hono fakatapui ʻo e Temipale Polovo Siti Senitaá ʻi Polovo, ʻIutā, USA, ko e aʻu ia e ngaahi temipale ʻo e Siasí ʻoku ngāueʻaki he funga ʻo e māmaní ki he 150. Naʻe fakatapui e temipalé ʻi he ʻaho 20 ʻo Māʻasi 2016, ko e ngaahi ʻaho siʻi pē ia kimuʻa pea fakamanatu e taʻu 180 mei he ʻaho 27 ʻo Māʻasi 1836, ʻa ē naʻe fakatapui ai e Temipale Ketilani, ko e fuofua temipale ʻi hono toe Fakafoki mai e Ongoongoleleí.
Naʻe fakatapui pe toe fakatapui ha temipale kehe ʻe tolu: ʻa e Temipale Montreal Quebec ʻi Nōvema 2015, Temipale Tijuana Mexico ʻi Tīsema 2015, pea moe Temipale Suva Fisí ʻi Fēpueli 2016.
ʻOku toe fakataimitēpileʻi foki ke fakatapui e Temipale Sapporo Japan ʻi he ʻaho 21 ʻo ʻAokosi 2016; Temipale Philadelphia Pennsylvania ʻi he ʻaho 18 ʻo Sepitema 2016; Temipale Fort Collins Colorado ʻi he ʻaho 16 ʻo ʻOkatopa 2016; Temipale Star Valley Wyoming ʻi he ʻaho 30 ʻo ʻOkatopa 2016; pea mo e Temipale Hartford Connecticut ʻi he ʻaho 20 ʻo Nōvema 2016.
ʻE toe fakatapui e Temipale Freiberg Germany ʻi he ʻaho 4 ʻo Sepitema 2016.
Langa mo Fakaleleiʻí
ʻOku kei hokohoko atu hono langa ʻa e Temipale Concepcion Chile, Temipale Paris France, Temipale Rome Italy pea mo e ngaahi temipale ko ʻeni ʻi he ʻIunaiteti Siteití: Cedar City Utah, Meridian Idaho, mo e Tucson Arizona. ʻOku kamata pē taimi ʻe kakato ki aí mei he 2016 ki he 2018. ʻOku kei fakatatali ke langa kakato e Temipale Fortaleza Brazil. ʻOku kei fai hono fakaleleiʻi ʻo e Temipale Frankfurt Germany, Jordan River Utah, mo e Idaho Falls Idaho.
Ouau Tanupoú
Naʻe fakahoko hono tanupou ʻo e Temipale Lisbon Portugal ʻi Tīsema 2015 pea mo e Temipale Barranquilla Colombia pea mo e Temipale Kinshasha Democratic Republic of the Congo ʻi Fēpueli 2016. Naʻe tanupou foki mo e Temipale Durban South Africa ʻi he ʻaho 9 ʻo ʻEpeleli 2016.
Ko Hono Palaní mo e Teuteú
Kuo fanongonongo e ngaahi temipale ko ʻení ka ʻoku kei ʻi he tuʻunga palaní mo e teuteú:Abidjan Ivory Coast (Côte d’Ivoire), Arequipa Peru, Bangkok Thailand, Port-au-Prince Haiti, Rio de Janeiro Brazil, Urdaneta Philippines, pea mo Winnipeg Manitoba.