ʻEletā Weatherford T. Clayton

ʻOku ongoʻi loto houngaʻia moʻoni ʻa ʻEletā Weatherford T. Clayton ko e faingamālie ke tokoni aí. ʻOkú ne fakamuʻomuʻa e ngāue ʻa e ʻEikí. ʻOkú ne ongoʻi ha ʻofa lahi ki hono kakaí peá ne vāofi moʻoni mo hono fāmilí.

Naʻe pehē ʻe ʻEletā Keleitoni, “ʻOku lava ke mau fakataha mai ki ʻapi ʻi he ongoongolelei ʻo Sīsū Kalaisí.” “Kuo ongoʻi ʻe hoku fāmilí e ivi tākiekina ʻo kinautolu kuo muʻomuʻá. ʻOku hangē tofu pē ʻoku nau ʻi heni mo kimautolú.”

Naʻe fāʻeleʻi ia ʻi Kalefōnia, USA, ʻi he ʻaho 1 ʻo Māʻasi 1952, kia Whitney Clayton Jr. pea mo Elizabeth Touchstone Clayton, pea naʻe maʻu ʻe ʻEletā Keleitoni ha fakamoʻoni mālohi ʻi heʻene kei talavoú ʻo fekauʻaki mo e faiako fakaʻapí. Naʻe makatuʻunga ʻi he ngaahi ngāue ʻa ha faiako fakaʻapi, naʻá ne hanga ai mo hono fāmilí ʻi hono taʻu 12, ʻo tali e ngaahi fuakava toputapu ʻo e ongoongoleleí pea silaʻi kinautolu ʻi he Temipale Sōlekí ʻi he 1964 ʻe ʻEletā Hāloti B. Lī ʻo e Kōlomu ʻo e Kau ʻAposetolo ʻe Toko Hongofulu Mā Uá.

ʻI he fakakaukau ʻa ʻEletā Keleitoni ki he founga kuo teuteuʻi ai ia ʻe he ʻEikí ke ngāué, naʻe faʻa fakalotoa ia ʻe he tā sīpinga ʻa e niʻihi kehé: “Ne u mātā hono fakatapui ʻe he kaungāmeʻá mo e fāmilí ʻenau moʻuí ki he ʻEikí pea ne u maʻu ha fiefia ʻi he tokoni kuo nau fai ki he ʻOtuá.”

Hili haʻane ngāue ʻi he Misiona French Canadian, naʻá ne hū ʻo ako he ʻUnivēsiti ʻo ʻIutaá peá me fetaulaki ai mo Lisa Thomas. Naʻá na mali ʻi he ʻaho 16 ʻo Māʻasi 1976 ʻi he Temipale Sōlekí. Ko e mātuʻa kinaua ki ha fānau ʻe toko nima.

Naʻe maʻu ha mataʻitohi fakasaikolosia ʻa ʻEletā Keleitoni pea naʻe lava kakato ʻene ako fakafaitoʻo he ʻUnivēsiti ʻo ʻIutaá. Naʻá ne ngāue fakafaitoʻo fakatāutaha pē ko ha toketā faifāʻele (obstetrician-gynecologist) mei he 1985 ki he 2013, kimuʻa pea ui ia ke palesiteni he Misiona Canada Toronto.

Kuó ne hoko ko ha taki faifekau fakauooti, faiako Tokāteline ʻo e Ongoongoleleí, palesiteni ʻo e Kau Talavoú, faifaleʻi hisitōlia fakafāmili, faiako toʻu tupu he Lautohi Faka-Sāpaté, pīsope, aleaʻanga māʻolunga tokoni ʻi he kau palesitenisī fakasiteikí pea mo ha palesiteni fakasiteiki.