Tokoni ki he Kumihūfangá: “Ko e Muli Au”
ʻI hono fakangofua ʻe he Kau Palesitenisī ʻUluakí, kuo ʻoatu ai ʻe he kau palesitenisī lahi ʻo e Fineʻofá, Kau Finemuí mo e Palaimelí ha fakaafe ki he kakai fefine ʻo e toʻu kotoa pē ke nau tokoni ki he kau kumihūfanga ʻi honau feituʻú mo e tukui koló ʻo fakafou ʻi ha polokalama tokoni ʻoku ui “Ko e Muli Au” (vakai, Levitiko 19:34; Mātiu 25:35).
Naʻe pehē ʻe Sisitā Linda K. Burton ko e palesiteni lahi ʻo e Fineʻofá, “ʻOku tokolahi siʻa kakai ʻi hotau lotolotongá ʻe lava ke faitāpuekina kinautolu ʻe haʻatau fakakaungāmeʻa mo fakahinohinoʻi kinautolu, kae pehē ki he ʻofa mo e tokoni kehe ʻoku faka-Kalaisí. ʻOku hoko e faʻahinga tokoni peheé ko ha konga mahuʻinga ʻo e ongoongoleleí.”
Naʻe pehē foki ʻe Sisitā Peatoni, “ʻOku ou manatu ki he potu folofola ʻoku pehē ‘ʻoua naʻa ngalo ke fakaafe ʻa e kakai mulí: he kuo fakaafe ai ʻe he niʻihi ʻa e kau ʻāngelo ʻi he taʻeʻilo’ [Hepelū 13:2].” ʻOku mau poupouʻi e kau fafiné ke nau fekumi ʻi he faʻa lotu ki ha ngaahi faingamālie pea fakakaukauʻi ha ngaahi founga ke poupou ai ki ha kautaha fakakolo mo ha ngaahi kautaha fakapuleʻanga ʻoku falalaʻangá. ʻE lava ke maʻu ha ngaahi fakakaukau ʻe tokoni atu mei he IWasAStranger.lds.org, pea ʻe lava ke ke vahevahe ʻa e ngaahi aʻusiá ʻaki haʻo ʻīmeili ki he IWasAStranger@ldschurch.org. ”
Naʻe ʻoatu ha tohi mei he Kau Palesitenisī ʻUluakí fekauʻaki mo e “Ko e Muli Aú” ki he ngaahi fakataha alēlea ʻa e siteikí, uōtí mo e koló ʻi he fakaʻosinga ʻo Māʻasí. Naʻe ʻoatu fakataha mo e tohí ha ngaahi fakahinohino ki he kau takí. Naʻe tapou atu e tohí, “ʻE lava ke kau mai e kakai fefiné ki he ngāué ʻo ka faingamālie honau taimí mo e tūkungá, pea fakapapauʻi ʻoku ʻikai “ke lele [ha fefine] ʻo vave ange ʻi he mālohi ʻokú ne maʻú” pea ko e meʻa kotoa pē ʻoku fai ia ʻi he “fakapotopoto mo e maau” (Mosaia 4:27). Naʻe ʻi ai foki ha tohi ʻa e Kau Palesitenisī ʻUluakí naʻe fakaʻaho ki he ʻaho 27 ʻo ʻOkatopa 2015, naʻe poupouʻi atu ai e kāingalotu kotoa pē ke nau fai ha tokoni faka-Kalaisi ki he niʻihi ʻoku faingataʻaʻiá.
Naʻe toki tufaki atu foki ha tohi mei he kau palesiteni lahi ʻo e Fineʻofá, Kau Finemuí mo e Palaimelí ʻo ʻoatu ai ha fakamatala ʻoku lahi angé fekauʻaki mo e “Ko e Muli Au,” ʻi he ngaahi fakataha ʻa e ngaahi houalotu ko iá.