Ko Hono Liliu ʻo e Ako mo e Akoʻi ʻo e Ongoongoleleí

ʻOku mahuʻinga ʻa hono ako, moʻuiʻaki mo akoʻi ʻo e ongoongoleleí ki heʻetau tupulaki fakatāutahá pea ʻoku fie maʻu ke kau ia heʻetau mōihū he ʻaho Sāpaté. Kuo hanga ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻo fakafeʻiloaki mai ʻi he ngaahi fakataha ako fakatakimuʻa ʻo e konifelenisi lahí, ha founga foʻou ke toe lelei ange ai hono akoʻi mo ako ʻo e ongoongoleleí, ʻi heʻenau faifeinga ke tokoni ki he kāingalotú ke langaki ʻenau tui ki he Tamai Hēvaní mo Sīsū Kalaisí pea ke toe fakalakalaka ange ai e mōihū he Sāpaté. ʻOku fakaafeʻi atu e kāingalotú ke nau:

1. Kamata fakaʻaongaʻi e ngaahi tefitoʻi moʻoni ʻi he Ko e Faiako ʻi he Founga ʻa e Fakamoʻuí. ʻOku nofotaha e tokanga ʻa e tohi lēsoni foʻou ko ʻení ʻi he ngaahi tefitoʻi moʻoni faingofua mo mālohi ne fakaʻaongaʻi ʻe he Faiako Tuʻukimuʻa. Ko e taumuʻa ʻa e faiako kotoa pē, hangē ko ia ʻi he tohi lēsoní, ke “akoʻi e tokāteline haohaoa ʻo e ongoongoleleí, ʻi he Laumālié, ke tokoni ʻi hono fakatupulaki e tui ʻa e fānau ʻa e ʻOtuá ki he Fakamoʻuí pea ke nau hoko lahi ange ʻo hangē ko Iá.”

Neongo ʻoku fakataumuʻa ʻa e tohi lēsoní kiate kinautolu ʻoku ui ke faiakó, ka ʻe lava ke ʻaonga ia ki he ako ke faiako ʻo hangē ko e Fakamoʻuí. ʻE lava ke ʻaonga ki he ngaahi mātuʻá kapau te nau fakaʻaongaʻi e ngaahi tefitoʻi moʻoni mei he kiʻi tohí ni ʻi heʻenau akoʻi ʻoku fai ʻi ʻapí.

2. Kau atu ki he fakataha alēlea ʻa e kau faiakó. ʻOku ʻikai tatau e ngaahi fakataha alēlea ʻa e kau faiakó mo e ngaahi kalasi fakalakalaka fakafaiako kimuʻá. ʻE hoko e fakataha alēlea ko ʻení ke maʻu ai ʻe he kau faiakó ha ngaahi faingamālie ke nau fealēleaʻaki mo feakoʻaki ʻa e ngaahi tefitoʻi moʻoni ʻo e Ko e Faiako ʻi he Founga ʻa e Fakamoʻuí. Ko e ngaahi fakataha ko ʻeni ke fakahoko tuʻo taha ia he māhina lolotonga e ngaahi houalotu ʻo e Sāpaté, pea ʻe kamata fakahoko ia he funga ʻo e māmaní ʻi he 2016.

3. Hoko ko ha kau ako faivelenga ʻo e ongoongoleleí. ʻOku poupouʻi e kāingalotú mo e kau faiakó fakatouʻosi ke nau ako mālohi e ongoongoleleí ʻi ʻapi. ʻOku hanga ʻe hono ako mo moʻuiʻaki e ongoongoleleí ʻi he lolotonga ʻo e uiké ʻo teuteuʻi e kāingalotú ke nau kau mai ki he ngaahi lēsoni ʻo e Sāpaté, ʻa ia ʻe lava ke kamataʻi ai ha aʻusia fakaako mahuʻingamālie ange ki he taha kotoa.

I heʻetau hoko ko e fānau ʻa e Tamai Hēvaní, ʻoku tau malava ai ke hoko ʻo hangē ko Iá.” ʻE lava ʻe ha faʻahinga taha pē ʻokú ne lotoʻaki ke ako pea moʻuiʻaki e ongoongoleleí, ke ne hoko ʻo hangē ko ʻetau ongomātuʻa fakalangí pea toe foki ʻo nofo mo kinaua. ʻOku tokoni ʻetau mōihū ʻi he lotú pea mo ʻapí ke tau langaki hake e tui ko ia ki he Tamai Hēvaní mo Sīsū Kalaisí.