ʻEletā S. Mark Palmer

ʻI he 1992, naʻe hoko e taimí ko ha koloa pelepelengesi moʻoni kia ʻEletā S. Maʻake Paame mo hono uaifi ko Sekiliní.

Naʻe ngāue ʻa ʻEletā Paame he aleaʻanga māʻolunga ʻa e siteikí he taimi ko iá. Naʻá ne ngāue mālohi ke fokotuʻu ʻene ngāue maʻuʻanga moʻuí. Naʻe tatau pē mo e ngāue mālohi ʻa Sisitā Pāmé. Naʻe ʻohake ʻe he ongomātuʻa Pāmé ha fānau ʻe toko ono ʻi hona ʻapi ʻi Austin, Texas, USA,—kau ai ha pēpē tangata māhina ʻe ono.

ʻI hono fakaafeʻi kinaua ʻe heʻena palesiteni fakasiteikí ke na tokoni ʻi he Temipale Dallas Texas, naʻe ʻikai ke na ʻilo pe te na fuesia fēfē ha toe fatongia kehe. Ka naʻá na tali e ui—peá na kolea e tokoni ʻa e ʻEikí ʻi he faʻa lotu.

Naʻe fie maʻu ha feilaulau mo ha palani fakalelei ka na siʻi heka pasi he māhina kotoa pē ʻo ngāue he ʻahó kakato ʻi he temipalé. Naʻe pehē ʻe ʻEletā Paame, “Ka naʻe faitāpuekina lahi ai ʻemau moʻuí.

Naʻá ne toe tānaki atu foki naʻe hoko ʻene ngāue ʻi he temipalé ke teuteuʻi fakalaumālie ai ia ki ha ngaahi uiuiʻi fakataulaʻeiki he kahaʻú. Naʻá ne hoko foki ai ko ha husepānit mo ha tamai lelei ange—pea naʻe napangapangamālie ai ʻene moʻui femoʻuekiná.

ʻOkú ne pehē, “ʻOku faʻa hanga ʻe he ʻalu ki he temipalé ʻo fokotuʻutuʻu lelei ange e ngaahi meʻa ʻokú ke fakamuʻomuʻá mo fakamanatu atu e ngaahi fuakava kuó ke fakahokó.”

Naʻe faʻeleʻi ʻa Sitanilei Maʻake Paame ʻi he ʻaho 11 ʻo Fēpueli 1956, ʻi Te Puke, Nuʻu Sila, kia Kenneth mo Jill Palmer. Naʻá ne kau kei siʻi pē ki he Siasí. Naʻá ne ngāue fakafaifekau taimi kakato ʻi he Misiona Nuʻu Sila Uelingatoní.

Hili hano maʻu hono ʻuluaki mataʻitohí mei he ʻUnivēsiti ʻo ʻOkalaní, naʻá ne kau atu ki he polokalama ako MA ʻi he ʻUnvēsiti Pilikihami ʻIongí. Lolotonga ʻene kei nofo ʻi Polovo, ʻIutā, USA, naʻá ne fetaulaki ai mo ha taʻahine toki ʻosi faifekau ko Jacqueline Wood ʻi haʻana fuofua teiti naʻe fokotuʻutuʻu ʻe ha taha kehe. Naʻá na mali ʻi he ʻaho 18 ʻo Tīsema 1981, ʻi he Temipale Sōlekí. ʻOku ʻi ai ha fānau ʻe toko ono mo e makapuna ʻe toko hiva ʻa e fāmili Pāmé.

Naʻe fokotuʻu ʻe ʻEletā Paame pea ko e palesiteni ia ʻo e kautaha SMP Ventures, ko ha kautaha fefakatauʻaki ʻapi/kelekele. Kuó ne hoko ko ha pīsope, palesiteni fakasiteiki, palesiteni ʻo e Misiona Washington Spokane (2009–12), palesiteni fakataimi ʻo e Misiona Australia Sydney South (2014), pea mo ha Fitungofulu Fakaʻēlia.