Sisitā Joy D. Jones

Naʻe hoko e ongomātuʻa ʻa Joy D. Jones, ko e moʻungaʻi tangata mo e moʻungaʻi fefine kiate iá.

Naʻe lea ʻa Sisitā Sōnasi ʻo fekauʻaki mo ʻene tamaí, ko ha tangata ngāue fakaʻuhila, ʻo pehē “Ne u ongoʻi hangē ka lava heʻeku tamaí ʻo fai ha faʻahinga meʻa pē.” Fekauʻaki mo ʻene faʻeé, naʻá ne pehē, “Ko ha fefine fakaofo ʻeku faʻeé” naʻá ne ngaohi e meʻa kotoa pē mei he meʻakai ne kai ʻe he fāmilí ki he vala ne nau tuí—mei he meʻa pē naʻa nau maʻú. “Kiate au, naʻe hangē ia ha fefine māʻoniʻoní, pea ne u fakaʻamu ke u tupu hake ʻo hangē ko iá.”

Makehe mei he ngaahi manatu fakaʻofoʻofa ʻa Sisitā Sōnasi ki heʻene ongomātuʻá, ʻa ia ko Aldo Harmon mo Eleanor Ellsworth Harmon, naʻá ne koloaʻaki foki ʻene manatu ki heʻene kei siʻí ʻi heʻene fakafanongo kia ʻEletā Robert L. Backman ʻi haʻane lea ʻi ha konifelenisi fakavahe ʻi ʻOlikoni, USA. Naʻe hoko ʻa ʻEletā Pekimeni, ʻoku hoko he taimí ni ko ha Fitungofulu Taki Māʻolunga mālōlō, ka naʻe palesiteni fakamisiona he taimi ko iá.

ʻOku pehē ʻe Sisitā Sōnasi, “Ne u maʻu ha ongo mālohi lolotonga ʻene leá. Ne u maʻu ha ongo ne kehe ange ia mei ha ongo kuó u maʻu kimuʻa. … ʻOku ou fakafetaʻi koeʻuhí ko e meʻa ko iá he ne u maʻu ai ha fakamoʻoni mei he Laumālié naʻe moʻoni e ngaahi meʻa naʻá ne leaʻakí.”

Naʻe fāʻeleʻi ʻa Joy Diane Harmon ʻi he ʻaho 20 ʻo Siulai 1954, ʻi The Dalles, Oregon. Naʻá na fakatou tupu hake mo e tokotaha ne hoko ko hono husepānití, ʻa ia ko Robert Bruce Jones, ʻi ʻOlikoni ka naʻá na fetaulaki ʻi he ʻUnivēsiti Pilikihami ʻIongí ʻi Polovo, ʻIutā, USA. Naʻá na mali ʻi he ʻaho 14 ʻo ʻAokosi 1974, ʻi he Temipale Manti Utah. ʻOku ʻi ai haʻana fānau ʻe toko nima mo e makapuna ʻe toko 17.

Hili pē ha taimi nounou mei heʻene maʻu hono mataʻitohi associate he saienisí ʻi he moʻui fakafāmilí, naʻá na hiki leva ki Pootileni, ʻOlikoni pea kimui ange ki Sanitā Losa, Kalifōnia, USA, ʻa ia naʻe ngāue ai ʻa Misa Sōnasi ko ha toketā ki he uouá mo e filosilivá (chiropractic). Naʻe ongoʻi mālohi ʻa Misa mo Sisitā Sōnasi ke na hiki ki Draper, ʻIutā ʻi he taʻu ʻe 22 kuohilí. Talu mei ai mo e fiefia ʻa Sisitā Sōnasi ʻi he tāpuaki ʻo e nofo ofi ki he temipalé.

ʻOkú ne pehē, “ʻNaʻe hoko e Temipale Jordan River Utah ko ha potu toputapu kiate au. Naʻá ku maʻu ha fakamoʻoni ki he mālohi ʻo e temipalé pea mo e nonga mo e taumuʻa kuó ne ʻomi ki heʻeku moʻuí.”

Kuo hoko ʻa Sisitā Sōnasi ko ha palesiteni Fineʻofa ʻi he uōtí mo e palesiteni Palaimeli pea mo ha tokoni ʻi he kau palesitenisī ʻo e Kau Finemuí mo e Palaimelí ʻi he uōtí mo e siteikí. Naʻá ne toki ngāue kimuí ni ʻi he poate lahi ʻa e Palaimelí.