ʻEletā K. Brett Nattress

ʻOku fakamatalaʻi ʻe ʻEletā K. Brett Nattress mo hono uaifi ko Shauna Lee Adamson Nattress, ko kinauá ko ha “kakai taʻe haohaoa ʻoku fekumi ki ha ngaahi momeniti haohaoa.”

Naʻe pehē ʻe ʻEletā Natelese kuo lahi ha ngaahi momeniti pehē kuó na maʻu heʻena moʻuí—pea ʻoku fehokotaki kotoa ia mo e Fakamoʻui pea mo ʻEne Fakaleleí.

ʻOku pehē ʻe ʻEletā Natelese naʻe fāʻeleʻi ia ʻ ʻe ha ongomātuʻa lelei ko David mo Judy Sorensen Nattress, pea ʻokú ne manatuʻi hono lau ʻe heʻene faʻeé ʻa e Tohi ʻa Molomoná ki he fāmilí he ʻaho kotoa pē.

Naʻá ne foki mai ha taimi ʻe taha ki ʻapi he tutuku ʻa e akó. Naʻe fuʻu tokanga ia ki he sivi fainolo ne teu fakahokó peá ne ongoʻi ʻoku ʻi ai ha meʻa ʻoku ʻikai totonu, neongo naʻe ʻikai ke ne puke.

Naʻe talaange ʻe heʻene faʻeé, “Kapau ʻokú ke ongoʻi sai ka ʻoku ʻikai tonu e ongo ʻokú ke maʻú, ʻoku fie maʻu ke ke ʻalu ʻo tokoni ki ha taha.”

Naʻe faʻo leva ʻe Pāleti ha sāvolo tata sinou ki heʻene lolí peá ne fononga holo ʻo tata e sinoú he fanga kiʻi tauʻanga meʻalele ʻa e kau uitou ʻi he uōtí. Naʻá ne ongoʻi fiemālie ange ai.

Naʻá ne pehē, “Naʻe tukutaha pē ʻeku tokangá ʻiate au mo e sivi fainoló kae ngalo ʻa e taumuʻa totonu ʻo e moʻuí ko e tokoni ki he niʻihi kehé.”

Naʻe fāʻeleʻi ʻa ʻEletā Natelese ʻi he ʻaho 4 ʻo Māʻasi 1965, ʻi Pokatelo, ʻAitahō, USA. Naʻe hiki e fāmilí ki Līhai, ʻIutā, USA, ʻo tupu hake ai kinautolu fānaú ʻi ha kiʻi faama fakafāmili.

Naʻá ne fetaulaki mo e taʻahine te na malí lolotonga e taʻu fakaʻosi ʻo ʻena ako ʻi ha ongo ako māʻolunga ofi pē honau feituʻú. Hili ʻene foki mei heʻene ngāue fakafaifekau ʻi he Misiona California Sacramento mei he 1984 ki he 1986, ne na mali ai ʻi he Temipale Sōlekí ʻi he ʻaho 24 ʻo ʻEpeleli 1987. ʻOku ʻi ai ʻena fānau ʻe toko fitu.

Naʻá ne ako ʻi he ʻUnivēsiti Pilikihami ʻIongi ʻi Polovo ʻIutaá pea naʻe ʻosi mei he ʻUnivēsiti ʻIutaá ʻi he 1990 mo hono mataʻitohi ʻi he physical therapy. Naʻá ne fokotuʻu mo hono tokoua ko Tēvitá ʻa e kautaha David Corp. Health Care Fakalakalaka ʻi he 2000.

Kuo ngāue ʻa ʻEletā Natelese ʻi ha ngaahi uiuiʻi kehekehe he Siasi, kau ai ʻene hoko ko ha palesiteni ʻo e Kau Talavou ʻi he uōtí, pīsope, palesiteni ʻo e Kau Talavoú ʻi he siteikí, palesiteni fakasiteiki mo ha Fitungofulu Fakaʻēlia. Naʻá ne lolotonga tokangaʻi e misiona foʻou ko e Arizona Gilbert Mission ʻi he taimi naʻe uiuiʻi ai ia ki he fatongiá ni.