Fai Lelei ʻi he Funga Māmaní

ʻOku kei hokohoko atu pē muimui e Kāingalotu ʻo e Siasí ki he sīpinga ʻa e Fakamoʻuí ʻo nau “[feʻaluʻaki] ʻo fai lelei” (Ngāue 10:38). Ko ha ngaahi sipinga ʻeni kimuí ni.

{3}ʻI Abu Dhabi, United Arab Emirates, ne fakataha mai ai ha kāingalotu mo e kaungāmeʻa ʻo e Siasí ʻi ha ngaahi fonua ʻe hiva ʻi he Hahake Lotolotó—ka ʻoku nau nofo ʻi ha ngaahi fonua ʻe ono—ke fai ha konifelenisi mo ha ngāue tokoni ʻofa fakaetangata fakataha mo e ngaahi siasi kehé. Naʻa nau fakatahatahaʻi mo tufaki ha fanga kiʻi nāunau haisini mo e meʻakai ʻe 8,500.

ʻI ʻIukanitā, ne feʻunga mo ha uike ʻe taha e ngāue ʻa ha ongo toketā nifo mo ha kau mataotao fakahaisini ʻe toko tolu, ʻa ia ko ha kau mēmipa kotoa ʻo e Siasí, ke fakafonu, taʻaki mo fufulu e nifo ʻo e kakaí, akoʻi e moʻui haisiní pea mo fakahinohinoʻi e kau toketā nifo fakalotofonuá mo e kau ako toketā nifó ki he founga lelei taha ʻo e ngāué.

ʻI Malēsiá, ne nofotaha e tokanga ʻa e Kāingalotu ʻo e Siasí ʻi he fāmilí lolotonga hono kātoangaʻi e Taʻu Foʻou Faka-Siainá, ko ha polokalama tukufakaholo ʻoku kau ai e ʻaʻahi ki faʻitoká ke fakamanatua, fakalāngilangiʻi mo fakaʻapaʻapaʻi e ngaahi kui kuo pekiá.

ʻI Tailení, ne fakataha mai ha kāingalotu mei he taʻu 18 ki he 35 ʻi Pengikoki ki ha feʻauhi feimeʻatokoni pea mo ha ngāue tokoni.

ʻI Fisí, ne fai eʻ he kāingalotú mo e kau faifekaú ha ngaahi ngāue ke tokoni ki he niʻihi ne uesia ʻi he Saikolone ko Uinisitoní. Naʻe ngāue e kau taki ʻo e Siasí mo e ngaahi kautaha fakapuleʻanga mo ʻikai fakapuleʻangá, ke ʻoatu ha meʻatokoni, vai, tēniti, nāunau haisini, mo e ngaahi nāunau tokoni fakatuʻupakē kehe.