Toe Fokotuʻutuʻu Foʻou e Konga ki he Konifelenisí ʻi he LDS.org

ʻE toe faingofua ange he taimí ni hono kumi mo ako he ʻinitanetí e ngaahi lea konifelenisí ʻo laka ia ʻi ha toe taimi kimuʻa, tupu mei hono toe fokotuʻutuʻu foʻou ʻo e konga ki he konifelenisi lahí ʻi he LDS.org. ʻOku kau he meʻa foʻoú:

• Faingofua hono ʻiloʻi e ngaahi lea ʻoku fie maʻú, mo e tā ʻo e tokotaha leá he tafaʻaki ʻo e tefito e ngaahi leá.

• Foʻi navigation bar pē ʻe taha he ʻū pēsí kotoa te ke lava ai ʻo (1) hū ki he ngaahi lea konifelenisi kotoa pē mei he 1971 ki he ʻahó ni, (2) malava ke kumi e hingoa ʻo e tokotaha leá pea mo e (3) malava ke kumi e ngaahi leá ʻo fakatatau mo e ngaahi tefito ʻo e ongoongoleleí.

• Founga faingofua ke tuku mai ʻaki e lea takitaha, mo ha fanga kiʻi fakaʻilonga he konga ki ʻolunga ʻo e pēsí ki he niʻihi ʻoku nau fie fanongo, download, paaki pe vahevahe ʻa e leá.

ʻOku tokoni lelei e fokotuʻutuʻu foʻou ko ʻení ki he niʻihi ʻoku nau fakaʻaongaʻi e desktop, laptop mo e mobile device. Kuo ʻosi fakahoko e ngaahi liliú ʻi he lea faka-Pilitāniá, faka-Sipeiní, mo e faka-Potukalí pea ʻe lava ke maʻu ia ʻi ha ngaahi lea fakafonua ʻe 80 tupu he ngaahi mahina ka haʻú.