ʻEletā Massimo Di Feo
Fitungofulu Taki Māʻolunga
Kimuʻa pea tali ʻe ʻEletā Māsima Tī Fio hono ui ke ngāue fakafaifekau taimi kakató, naʻá ne ako ha ngaahi lēsoni mahuʻinga ʻo e feilaulaú mo e ʻofá, mei heʻene tamai ko Vitolio Tī Fió.
Naʻe siʻi pē maʻuʻanga paʻanga ʻa e fāmili Tī Fió, pea ʻikai foki kau ʻa Vitolia pe ko hno uaifi ko Vilá ki he Siasí. Ka naʻe fakaʻapaʻapaʻi ʻe he tangataʻeiki ko Tī Fió e loto hono foha lahí ke vahevahe ʻa e ongoongoleleí.
ʻOku manatu ʻa ʻEletā Tī Fio ʻo pehē, “Naʻe fehuʻi mai heʻekeu tamaí ʻo pehe, ‘Ko ho lotó moʻoni ke fai ʻeni?’” “Naʻá ku tali ange, ‘ʻIo, ʻoku ou fakaʻamu ʻaki hoku lotó kotoa ke u tauhi ki he ʻEikí.’”
Naʻe palōmesi ʻa Vitolio te ne fai e meʻa kotoa pē te ne lavá ke tokoni ki hono fua e fakamole e taʻu ʻe ua ʻo e ngāue ʻa hono fohá ʻi he Misiona ʻĪtali Lomá.
Naʻe pehē ʻe ʻEletā Tī Fio “ʻOku ou lau ko ha paʻanga toputapu ia—ko ha fua ia ʻo ha feilaulau maʻongoʻonga mei he tangata naʻe ʻikai tui ki he Siasí. “Ko ia naʻá ku ngāue fakafaifekau ʻaki hoku lotó, iví, ʻatamaí, mo e mālohí kotoa pē ko ʻeku ʻofa ki he ʻEikí pea mo ʻeku tamaí.”
Kuo tokoni ʻa e ngaahi tefitoʻi moʻoni ʻo e Ongoongoleleí hangē ko e feilaulau, ngāue mālohí, fāmilí, mo e tokoní ke ʻiloʻi ai ʻa ʻEletā Tī Fio.
Naʻe fāʻeleʻi ʻa ʻEletā Māsima Tī Fio ʻi Taranto, ʻĪtali ʻi he ʻaho 14 ʻo Tīsema 1960, pea naʻá ne ʻilo ki he Siasí ʻi hono taʻu hivá ʻi ha tukituki ange ha ongo faifekau ʻi honau ʻapí. Ne ʻikai fuoloa kuo papitaiso ʻa Lisiate mo hono taʻokete ko ʻAlapetí.
Naʻe fiefia e ongo tamaiki Tī Fió ʻi he ʻofa mo e pouou ʻa e kau taki fakakoló ʻi heʻena ō ki he Palaimelí, pea mo e Mutualé kimui ange. Naʻe kaungāmeʻa mamae foki ʻa Māsima mo ha toʻu tupu kehe ʻi he koló—kau ai hono kaungā ului ko Loredana Galeandro, ʻa ia naʻá na mali kimui ange ʻi hono misioná. Naʻá na sila ʻi he ʻaho 14 ʻo ʻAokosi 1984 ʻi he Temipale Bern Switzerland. ʻOku ʻi ai haʻana fānau ʻe toko tolu.
Kimuʻa pea hoko ʻa ʻEletā Tī Fio ko ha Fitungofulu Taki Māʻolungá, naʻá ne nofo ʻi Loma ʻo ngāue ʻi ha taʻu ʻe 30 tupu ai ki he U.S. State Department. Naʻá ne hoko ko ha palesiteni fakakolo, palesiteni fakavahefonua, palesiteni fakasiteiki, mo e Fitungofulu Fakaʻēlia.