Pagpahimutang Kon Asa Kita Angay
Ni Elder Randy D. Funk
Sa Seventy
Paghulagway pinaagi ni Mark Robison
IBABAW: PAGHULAGWAY PINAAGI NI MARK ROBISON; TUO PAGHULAGWAY PINAAGI NI ALYSSA TALENT
Sa nag-edad pa ako og 11, mipuyo ko sa Manti, Utah, USA. Sa sinugdanan sa tuig, ang akong magtutudlo sa Primary nagdala og gamay, maanindot nga atsa nga imong magamit sa pagbugha og kahoy.
“Kon si kinsa man ang makaadto sa Primary og kadaghan niining tuiga makaangkon niining atsa,” miingon siya. Sukad ato mihukom ko nga moadto matag semana. Sa katapusan sa tuig, akong naangkon ang atsa!
Sa wala madugay miabut ang akong ika-12 nga adlawng natawhan. Gi-orden ko nga usa ka deacon. Niining panahona, ang akong pamilya mibalhin ngadto sa Madison, Wisconsin, USA. Gimingaw ko sa akong mga higala, apan malipay kaayo ko nga makaamigo og bag-o. Ang Madison mas dako kay sa Manti. Dako ang akong bag-ong eskwelahan. Walay daghang miyembro sa Simbahan. Usa ka adlaw ang pipila ka inila nga mga bata midapit kanako sa usa ka party. Apan ang party naatol sa samang gabii sa kalihokan sa Simbahan. Ako nakat-on base sa akong kasinatian sa Primary nga ang mga nindot nga butang mahitabo kon ako magmatinud-anon sa akong sa akong mga meeting sa simbahan. Gipasalamatan nako sila sa pagdapit nako, ug akong gipasabut nganong dili ko moadto.
Sa adlaw human sa party, ang tanan sa eskwelahan naghisgot mahitungod niini. Sila nag-inom og ilimnong makahubog didto sa party, ug ang tanan nga mikuyog nalambigit og kasamok! Mapasalamaton kaayo ko nga didto ko kon asa ko angay magbarug.
Mapasalamaton ko nga miadto ko sa Primary ug sa ubang mga miting sa Simbahan samtang nagtubo ko. Akong nakat-unan didto ang importanting mga leksyon mahitungod sa ebanghelyo. Ug nalingaw ko sa mga kalihokan. Ang Langitnong Amahan mopanalangin kanato kon kita maningkamot nga maanaa kon asa kita angay ug mobuhat sa unsay angay natong buhaton. Siya mopalig-on sa atong hugot nga pagtuo. Siya moprotekta kanato gikan sa tintasyon ug sa sala.
Sa atong pagtambong sa mga miting sa simbahan, lakip na niana ang sacrament meeting, kita nagpaduol sa atong Langitnong Amahan ug ni Jesukristo. Kita makakat-on og importanteng mga kamatuoran nga mogiya sa atong mga desisyon sa tibuok semana, bisan pa kon wala kita sa simbahan o napalibutan sa uban nga sama nato og tinuohan. Kon kita magpuyo nga matarung, ang Espiritu Santo motabang kanato aron atong mahibaloan kon asa kamo angay og kon unsay kinahanglan ninyong buhaton.